Ezekyɛli 39 - Cebaara Bible 2010

Joogbanna níìgēle Gɔgi kánmi na

¹ «Mɔ syɔɔn-pya, kérigèle nyaa mi joo Gɔgi kánmi na! Mɔ a gi joo si jo: ‹Kàfɔw Yawe wi syɛ́ɛnri naa joo níì jo: Wéle, mii a keele tɛ́ʔɛ mɔ na Gɔgi, mɔ wi lè Mesyɛki, ní Tubali kùndigikpɔɔw!

² Mii a mɔ kɔ́ri kári, mii a kíni mɔ yɛ́ɛgi na, mii a mɔ kɔ́ri yìrige solomɔkulo láʔali ma yaà píri, mii a mɔ yaʔa mɔ í pan Isirayɛli nyanbeleyi kánma na.

³ Mii a mɔ sedegi kpúmɔn cáan ki nyɛ lè mɔ kamɔnɔ kɔ́gi ni, si mɔ ŋáayi yaʔa yi too, yi lè mɔ kaliige kɔ́gi ni.

⁴ Mɔ a too Isirayɛli nyanbeleyi na, mɔ ní mɔ sulasiibèle kabiya myɛw, ní syɛɛnfeleyee yi a pye ní mɔ ní lè. Mii a mɔ kaan kàcɔʔɔri, ní féjɛɛnri féleye myɛ, ní sìnbirigi yaweere ma lìile.

⁵ Mɔ a too tári na sìnbirigi ni, níì cán mii, mii wi joo, Kàfɔw Yawe wi jo nya.

⁶ Mii a náagi tórigo ki sa jée Magɔgi ni, ní bele nínge ni pe tɛ́ɛn lè lǒgi nínge tátɛɛgéle ni sági yɛɛ̀nyinge na. Pe a gi cán bi cán mii wi nyɛ Yawe.

⁷ Mii a ní mii mɛ́ɛcǎngi yaʔa gi cán mii syɛ́ɛnbèle Isirayɛli ye níngi ni, mii a ní mii mɛ́ɛcǎngi yaʔa gi kálagi í. Syɛɛnfeleyi a gi cán bi cán mii wi nyɛ Yawe, wi lè Wojanw, Isirayɛli ni.

⁸ Wéle, kérigèle bee i maa, ke a foro, Kàfɔw Yawe wi jo nya, cángi bee kéele mii joo.

⁹ Lǎli bee ni, Isirayɛli kěyi syɛ̀ɛnnɛ a yiri, pe a sórigolo kpéʔele, si kapɛɛnkpumɔn-yáriri le naanyǐngi ni, di lè tunmɔzige-yapiigèle, ní wogboloyi, ní sedeyi, ní wɛ̀ɛ́gèle, ní kókpaanbèle, ní tàbaabèle. Pe a ra náagi nii ní di ní yɛ̀ʔɛlɛ kɔrɔsiin fúngo ni.

¹⁰ Pe a kàjere caa sìnbirigi ni í, pe a tée tàa cɛnɛ kɔliyi ni í, níì cán kapɛɛnkpumɔn-yáriri pe a ra téeri bàā náagi nii. Bele pe da be kpéʔele lè yakoliro, pe a bele bee kpéʔele yakoliro, bele pe da ni be fuguri lè, pe a ba ra bele bee fuguri, Kàfɔw Yawe wi jo nya.

¹¹ Cángi bee na mii a kútɔndɛʔɛ kaan Gɔgi ma Isirayɛli ni, kozɔ̀lɔbèle jǐnlɔgɔ ki a pye, ki lè sólomi lɔ̀ʔɔ canʔafolomɔ ma. Ki a kólogi tɔ́n kozɔ̀lɔbèle na, nɛɛ bee pe a Gɔgi tɔ́n ní wi syɛɛnnɛʔɛmi myɛ ní, pe a ra gi yiri Gɔgi Syɛɛnnɛʔɛmi Jǐnlɔgɔ.

¹² Isirayɛli kpáagi wòolo a be tɔ́n, koro ga pye bi tári jée mùnu. Gee bee a kpéʔele yeye kɔrɔsiin fúngo ni.

¹³ Tári syɛ̀ɛnnɛ myɛ a be tɔ́n, pe a tɔ̀nɔ́ mɛ́ɛkpɔʔɔ taa kéeli bee ni, cángee na mii a kpɔʔɔrɔ taa lè, Kàfɔw Yawe wi jo nya.

¹⁴ Pe a nǎnbèle pèle yirige yaʔa kɔlɔ̀ na ki pye be falì, paa tári sɔ̀lɔ́ da máari. Pe a ra kúbèle tɔ́ngi poro bele pe ga kòro tári yɛ́ʔɛ kurugo lè, pe a koro pye jàngó bi tári jée mùnu, pe a ra be caa da máari yéyi kɔrɔsiin fúngo ni.

¹⁵ Syɛ́ɛnbèle bee ga ni tári nyaari ni máari, pe wàa ga syɔɔn kaceleye nyaa, wi a yarigaa kóri yi taana bi taa weètugubèle í pan ba yi tɔ́n Gɔgi Syɛɛnnɛʔɛmi Jǐnlɔgɔ ni.

¹⁶ Kègaa a wɔ́ɔ pye yaà paa gi yiri Hamona. Kánmi bee na tári a jée mùnu.›

¹⁷ Mɔ syɔɔn-pya, Kàfɔw Yawe wi syɛ́ɛnri naa joo níì jo: ‹Ki joo féjɛɛnri féleye myɛ ma, ní sìnbirigi yaweere myɛ ma, mí jo: Ye yeyɛɛ gbóʔoro yaa maa, ye kpóʔoro ye yìri kàbanyi myɛ na, mii sárigaw kéele na, wee mii tiimaa wóo bi kaan yele ma lè, sárigakpɔɔɔ wii, Isirayɛli nyanbeleyi na! Yele a cere káa si wɔ́ɔ sìsyaan gbaa.

¹⁸ Yele a nànniribēle cére káa, si wɔ́ɔ tári fànʔafɔbiigéle sisyaan gbaa, bàpɔbèle ní bàpiigèle, ní sikepɔbèle, ní náapegèle sìndɛʔɛ ni, toro dee myɛ di sìnmɛ le lè Basyan ni.

¹⁹ Yele a kaasǐnmi lìi bi tín si sìsyaanw gbaa waa yele yɛ́ɛyi wóo mii sárigaw na mii wóo yele ma lè.

²⁰ Yele a tín mii lìigbɔɔli na, li lè syɔ́ɔnyi, ní syɔɔnfanbèle cére, ní nànniribèle, ní kapɛɛnkpumɔn-nǎnbèle féleye myɛ cére, Kàfɔw Yawe wi jo nya.

²¹ Mii a mii nìjangbɔɔri tɛ̀ɛn syɛɛnfeleyi nínge ni. Syɛɛnfeleyi myɛ a kútiiw kèlē nyaa, gele mii a kpéʔele lè, bi mii kɔ́gi nyaa, gee mii a taʔa yi na lè.

²² Bi séli cángi bee na bàā syée yaà, Isirayɛli kpáagi wòolo a gi cán bi cán mii wi nyɛ Yawe poro Kolocɔlɔw.

Ezekyɛli syɛ́ɛnri nyùngboloyo kéele

²³ « ‹Syɛɛnfeleyi a gi cán bi cán Isirayɛli kpáagi wòolo kolomɔ kele kéele na pe da be cò n kári, pe sìnzinmi kèlē kéele na pe kpéʔele mii na lè. A mii si wɔ́ɔ̀ mii yɛ́ɛgi làriga be na, níì be le pe kàsiitun-nyɛ́nbèle kɔ́yɔ ni, koro ga pye ŋɔséew í pe myɛ kpóo cáan.

²⁴ Mii n be cò n yɛlɛ ní be nɔ́nʔɔri, ní be kapeeyi ní, níì mii yɛ́ɛgi làriga be na.

²⁵ Awá, Kàfɔw Yawe wi syɛ́ɛnri naa joo níì jo: Tɔ́ɔliw ni, Zyakɔbi wóbèle be cò n kári lè, mii a be lúrugo pan, mii a nyinimɛ taa Isirayɛli kpáagi wòolo myɛ na, mii mɛ́ɛcǎngi yéjaʔa si pye mii ni.

²⁶ Lǎli bee ni pe a fɛ̀ʔɛ be faʔari na, ní sìnzinmi kèlē myɛ na be kpéʔele mii na lè. Pe a tɛ́ɛn fyáara fun pe tásaligi na, syɔɔn faala a ra be tɔ́ɔrɔ í.

²⁷ Lǎli ni mii ga be yirige yaà syɛɛnfeleyi nínge ni n lúrugo n pan lè, lǎli ni mii ga be kpóʔoro n yirige yaà pe nigoobèle tátɛɛyɛ ni lè, mii a pye wojaɔn ní pe kéeli na syɛɛnfeleye saʔa nyɛ́nɛ na.

²⁸ Pe a gi cán bi cán mii wi nyɛ Yawe, poro Kolocɔlɔw, wee wi da poro cò n tórigo syɛɛnfeleyi ma lè, koro kàdoʔo ma níì poro kpóʔoro n baa télege poro tásaligi na. Mii a tée pe wàa nibin yaʔa yaà í.

²⁹ Mii a ní mii yɛ́ɛgi làriga be na í, níì cán mii a mii Pǐli tìrige bi tɔ́n Isirayɛli kpáagi wòolo na, Kàfɔw Yawe wi jo nya.› »