Ezekyɛli 38 - Cebaara Bible 2010

Joogbanna, Gɔgi kánmi na

¹ Yawe syɛ́ɛnri n nan mii na, wi n jo:

² «Syɔɔn-pya, mɔ yɛ́ɛgi wáa Gɔgi kàbangi na, Magɔgi tári kàbaan na, Mesyɛki, ní Tubali kùndigikpɔɔw kàbaan na, mí kérigèle nyaa mi joo wi kánmi na.

³ Mɔ a gi joo si jo: ‹Kàfɔw Yawe wi syɛ́ɛnri naa joo níì jo: Wéle, mɔ ní mii cáan, Gɔgi, mɔ wi lè Mesyɛki, ní Tubali kùndigikpɔɔw!

⁴ Mii a mɔ kíle kári, mii a kàrafée le mɔ kpacɔʔɔlɔyi na. Mii a mɔ kɔ́ri bi yirige, mɔ ní mɔ sulasiibèle myɛ ní n fàra syɔ́ɔnyi, ní syɔɔnfanbèle na, poro bele be peyɛɛ zámaga n pwɔɔ lè, pe lè kabinɛʔɛyɛ, poro bele má tunmɔzige-yakpoloyi, ní wobiigèle nyɛ lè, bele myɛ be nyɛ lè ŋɔséew cánvɔɔlɔ.

⁵ Pɛrisi, ní Etyopii, ní Puti tári wòolo wɔ́ɔ i nyɛ ní be ní. Tunmɔzige-yáriyi, ní túnmɔri nyùndɔnyɔ si i nyɛ pe myɛ ma.

⁶ Gomɛɛri ní wi sùlasiibèle kabiya myɛw, ní Togarima kpáagi wòolo, pe yaà lè píri solomɔkulo láʔali na, ní wi sùlasiibèle kabiya myɛw, syɛɛnfele-nɛʔɛyɛ i nyɛ ní mɔ ní.

⁷ Ki n yɛlɛ mi miyɛɛ zámaga, sámaga mi yaʔa, mi yére, mɔ ní syɛɛnnɛʔɛmi myɛ bi kpóʔoro n mɔ màʔa lè, mɔ a pye be kɔ̀rɔsiifɔw.

⁸ Làlaa saʔa ga kwɔ́ɔ, pe a mɔ télege mɔ fáliw na. Làrigèle kwɔ́ɔmɔ na, mɔ a tánʔa kári tári kánma na, toro dee syɛ̀ɛnnɛ pe a syɔɔ ŋɔséew ma lè, si kpóʔoro syɛɛnfele-nɛʔɛyɛ nínge ni, Isirayɛli nyanbeleyi na, yi da kòro lè tɛɛ̀kalagiga n làla saʔa kwɔ́ɔ. Pe ga yiri syɛɛnfeleyi wozanya nínge ni, pe a ba tɛ́ɛn sági yɛɛ̀nyinge na be tɛɛkòroyi ni.

⁹ Mɔ a lúgu, mɔ a pan àmɛɛ káfalakpɔʔɔ nyɛ lè, mɔ a pye àmɛɛ fàfanʔa nyɛ, gee ki a tári tɔ́n lè, mɔ ní mɔ sulasiibèle kabiya myɛw n fàra syɛɛnfele-nɛʔɛyi na yi nyɛ ní mɔ ní lè.› »

¹⁰ Kàfɔw Yawe wi syɛ́ɛnri naa joo níì jo: «Cángi bee na sɔ̀nguraa a yìri mɔ fúngi ni, mɔ a kanbeemɛ tímana.

¹¹ Mɔ a gi joo si jo: ‹Mii a lúgu kári táraa kánma na, dee di múgu n yaʔa lè, mii a sa too syɛ̀ɛnnɛ na, bele be nyɛ lè sági yɛɛ̀nyinge na be tɛɛkòroyi ni, ní i nyɛ wodɛ́ɛnbéle ní pe myɛw, tòbēle fun keye ni, yasɔʔɔyɔ, ní kɔ̀riyɔ fun.

¹² Mii a sa yáriri koli, mii a sa yáriri fuguri láa. Mɔ a mɔ kɔ́gi taʔa kataya na, yee ni syɛ̀ɛnnɛ tɛ́ɛn lè tɔ́ɔliw ni bi gi taʔa syɛɛnfelegaa na, gee be yirige syɛɛnfeleyi nínge ni lè, koro gee má yaweere, ní lɔrɔ nyɛ lè ki si i nyɛ wodɛ́nʔɛ ní dulunyanw nínge ni.›

¹³ Seba, ní Dedan, pe lè Tarisiisi jàgiwáabèle, ní be càarabɔ-yɛlɛbèle myɛ a gi joo mɔ ma si jo: ‹Yáriri lé mɔ pan ba koli? Yáriri fuguri-mí-láala kéele na lé mɔ syɛɛnnɛʔɛmi naa kpóʔoro, bi ba wálifiio ní tɛɛ̀ koli, si wɔ́ɔ yaweere ní lɔrɔ koli, bi fàra yanɛʔɛrɛ na?›

¹⁴ Awá, kérigèle nyaa mi joo syɔɔn-pya. Ki joo Gɔgi ma, mí wi pye: ‹Kàfɔw Yawe wi syɛ́ɛnri naa joo níì jo: Kányɛʔɛ na, cángee na mii syɛ́ɛnbèle Isirayɛli ye a tɛ́ɛn yɛɛ̀nyinge na lè sági, mɔ a gi cán.

¹⁵ Mɔ si a yìri solomɔkulo láʔali ma yaà píri mɔ tɛɛkòrogi ma bi lúru pan, mɔ, n fàra syɛɛnfele-nɛʔɛyɛ na yi a pye ní mɔ ní lè, pe myɛ a pye syɔɔnyɔ na, ki a pye syɛɛnnɛʔɛmɛ kpóʔorolo bi pye kapɛɛnkpumɔn-syɛɛnnɛʔɛmɛ.

¹⁶ Ee Gɔgi, mɔ a lúgu kári mii syɛ́ɛnbèle Isirayɛli ye kánmi na, àmɛɛ fàfanʔa nyɛ, gee ki a tári tɔ́n lè. Làrigèle kwɔ́ɔmɔ na gee bee a pye, mii a mɔ yaʔa mɔ í pan mii tári kánma na, jàngó syɛɛnfeleyi í mii cán lǎli ni mii ga mɔ kéeli tɛ́ʔɛ n niyɛɛ dɛ̀ɛn lè wojaɔn ní pe nyɛnɛ na.› »

¹⁷ Kàfɔw Yawe wi syɛ́ɛnri naa joo níì jo: «Mɔ kéeli lé mii da joo booma ni mii falipyebèle ma a be joo pe lè Isirayɛli kanyaajoobèle, bele be kérigèle nyaa n joo lè cányi bee ni yɛ̀ʔɛlɛ saʔa fúngo ni, níì jo mii a mɔ yaʔa mɔ í pan mii syɛ́ɛnbèle kánma na?

¹⁸ Cángi bee na, cángee na Gɔgi a pan Isirayɛli tásaligi kánma na lè, mii fúngi a tɔ̀nɔ́ tugo yìri gbanʔama, Kàfɔw Yawe wi jo nya.

¹⁹ Mii i gi nyuu n mii yaʔa mii yejaagi, ní mii fúngi yìrile náa ni, níì jo: ‹Cángi bee na, kàfulogbɔʔɔ a tɔ̀nɔ́ pye yaà Isirayɛli tári ni.

²⁰ Sólomi lɔ̀ʔɔ fàala, ní nyɛ̀ʔɛni féjɛɛngèlē a ra cɛ̀lɛ́ mii yɛ́ʔɛ ma, n fàra sìnbirigi yaweere, ní yáriri myɛ na di fulolo tári na lè, ní syɛ́ɛnbèle myɛ be nyɛ tári yɛ́ʔɛ kurugo lè. Nyanbeleyi a wáa cíbele, fálaweeyi a kabagi too, tǒbèle myɛ í too tári na.

²¹ Mii a ŋɔséew yeri wi kánmi na, bi yìri mii nyanbeleyi myɛ ma, Kàfɔw Yawe wi jo nya. Syɔɔn o syɔɔn a wi ŋɔsée kàriga wi senyɛnnɛ kánma na.

²² Mii a káfalagi yáama, ní sìsyaanw tɛ́ʔɛ bi kútiiw kúun wi na, mii a zěbingaʔa, ní zěsolo-kùnguruyo, ní naà, ní dìrigí cáan wi na, ní wi sùlasiibèle kabiya, ní syɛɛnnɛʔɛmi na pi a pye ní wi ní lè.

²³ Mii a mii kpɔ́ʔɔganmi tɛ̀ɛn, ní àmɛɛ mii nyɛ wojaɔn ní lè. Mii a gi yaʔa syɛɛnfele-nɛʔɛyi í mii nyaa bi mii cán, yoro yee yi a gi cán lè lǎli bee ni bi cán mii wi nyɛ Yawe.›