Ezekyɛli 37 - Cebaara Bible 2010

Kacelewaari yanyaʔa

¹ Yawe kɔ́gi maa pye mii na, a Yawe mii láa n yirige wi Pǐli báriga ni n sáà tɛ́ʔɛ jǐnlɔgi nínge ni, koro gee ki da nyìn kacere na lè.

² A wi mii pye a mii fàn n foro foro di ni n di màʔa n kpàra. Bi gi taa ti maa tɔ̀nɔ n nɛʔɛ jǐnlɔgi yɛ́ʔɛ kurugo, níì waʔa cama.

³ A wi mii pye: «Syɔɔn-pya, a kaceri naa a ní gbǎn yìri lé bi pye sìi na?» A mii wi yari: «Kàfɔw Yawe, mɔ wi gee bee cán.»

⁴ A wi mii pye: «Kérigèle nyaa mi joo kaceri naa na! Mɔ a di pye: ‹Kacelewaara, ye Yawe syɛ́ɛnri lóʔo!

⁵ Kàfɔw Yawe wi syɛ́ɛnri naa joo kaceri naa ma, níì jo: Wéle, mii a pìle yaʔa li ba jée yele ni, yele a pye sìi na.

⁶ Mii a kapanra le yele ni, mii a cere yaʔa ti yiri yele na, mii a ní césaliga tɔ́n yele na, mii a pìle le yele ni, yele a pye sìi na, yele a gi cán bi cán mii wi nyɛ Yawe.› »

⁷ A mii i kérigèle nyaagi ni nyuu n yɛlɛ ní gee ní ki da joo n gbàn mii ma lè. Amɛɛ mii pye ni kérigèle nyaagi ni nyuu lè, a kàfulogo pye, wéle, a cɛ̀lɛlɛ kpéʔele, a kaceri nùuni tiyɛɛ na.

⁸ A mii gi kɔ̀rɔsíi n gi nyaa kapanra i nyɛ di na a cere i yirigi di na, á césaliga níì di tɔ́n. Kàjáa pìle da pye di ni í.

⁹ A wi mii pye: «Kérigèle nyaa mi joo mí joo pǐli ma, kérigèle nyaa mi joo syɔɔn-pya! Mɔ a gi joo pǐli ma si jo: ‹Kàfɔw Yawe wi syɛ́ɛnri naa joo níì jo: Pìle, yìri káfalagi kàbanya sicɛrɛ ma mi pan, ŋɔ́n mi wáa kúbèle naa na, pe ní pye sìi na.› »

¹⁰ A mii i kérigèle nyaagi ni nyuu n yɛlɛ ní gee ní wi da joo n gbàn mii ma lè. A pǐli baa jée be ni a be níì pye sìi na níì yìri n yére be tɔ́lɔyi na. Pe maa pye kapɛɛnkpumɔn-syɛɛnnɛʔɛtelemɛ.

¹¹ A wi mii pye: «Syɔɔn-pya, kaceri naa, toro di nyɛ Isirayɛli kpáagi wòolo myɛ. Wéle, pe i gi nyuu níì jo: ‹Wolo kaceri n waʔa, wolo sɔ̀ngumi tɛɛtaʔaga n kálagi, wolo n kwɔ́ɔ gi ni!›

¹² Koro na kérigèle nyaa mi joo! Mɔ a gi joo be ma si be pye: ‹Kàfɔw Yawe wi syɛ́ɛnri naa joo níì jo: Ee mii syɛ́ɛnbèle, wéle, mii wi yele nyányi múru wee, mii a yele yìrige bi yirige yele nyányi ni, mii a yele lúrugo tórigo Isirayɛli tásaligi ma.

¹³ Ee mii syɛ́ɛnbèle, lǎli ni mii ga yele nyányi múgu lè níì yele yirige yele nyányi ni, yele a gi cán bi cán mii wi nyɛ Yawe!

¹⁴ Mii a mii Pǐli le yele ni, yele a pye sìi na. Mii si ní yele télege yele tásaligi na. Yele a gi cán bi cán mii Yawe, mii wi joo, ní wɔ́ɔ̀ gi kpéʔele.› » Yawe wi jo nya.

Yawe a ní syɛɛnfelegi lúrugo pínɛ

¹⁵ Yawe syɛ́ɛnri n nan mii na, wi n jo:

¹⁶ «Mɔ syɔɔn-pya, tiicerige láa mí gi sɛ́bɛ gi na mí jo: ‹Zyuda ní Isirayɛli wóbèle bele be nyɛ ní wi ní lè.› Mí ní tiicerigaa láa, mí gi sɛ́bɛ gi na mí jo: ‹Zyozɛfu, Efirayimi tíigi ní Isirayɛli kpáagi wòolo myɛ be nyɛ ní wi ní lè.›

¹⁷ Yi nùuni mi sígi yiyɛɛ na yi pye mɔ ma tiige nibin, yi pínɛ pye nibin mɔ kɔ́gi ni.

¹⁸ Lǎli ni mɔ syɛɛnfelegi wòolo ga mɔ yíbe lè níì jo: ‹Mɔ a gi kɔ́rɔw joo wolo ma, gee mɔ caa bi tɛ̀ɛn lè ì?›

¹⁹ Mɔ a be yari: ‹Kàfɔw Yawe wi syɛ́ɛnri naa joo níì jo: Wéle, mii wi Zyozɛfu tíigi lée wee, koro gee gi nyɛ Efirayimi kɔ́gi ni lè, ní Isirayɛli syɛɛnfelegi wòolo be nyɛ ní wi ní lè. Mii a be pínɛ ní Zyuda tíigi ní bi pye tiige nibin. Pe a pínɛ pye nibin mii kɔ́gi ni.›

²⁰ Tiiceriyee na mɔ a sɛ́bɛ lè, yi a pye mɔ kɔ́gi ni pe nyɛnɛ na.

²¹ Mɔ a gi joo be ma si jo: ‹Kàfɔw Yawe wi syɛ́ɛnri naa joo níì jo: Wéle, mii wi Isirayɛli ye lée wee bi yirige syɛɛnfeleyi nínge ni, beè be kári lè. Mii a be kpóʔoro bi yirige yaà kàbanyi myɛ na, bi lúrugo pan pe ba pye be tásaligi na.

²² Mii a be pye syɛɛnfelege nibin tári ni, Isirayɛli nyanbeleyi na. Fànʔafɔlɔ nibin wi a pye pe myɛ nyúngo na, pe a ní pye syɛɛnfeleye siin í, pe a ní tíla fànya siin í.

²³ Pe a ní da peyɛɛ nɔ́ɔnri ní be yasunyi, ní be yanɔnʔɔyi, ní be kapeebyeri féleye myɛ ní í. Mii a be syɔɔ bi yirige tɛ́ɛyi myɛ ni beè be sáà pye lè, ní beè be kapeegèle pye lè, mii a be jée mùnu, pe a pye mii syɛ́ɛnbèle, mii si pye be Kolocɔlɔw.

²⁴ Mii falipyew Davidi a pye be fànʔafɔw, bànaʔaɔ nibin wi a pye pe myɛ nyúngo na. Pe a peyɛɛ daʔa mii làlwaw kajoogéle na, pe a mii làlwaw kèlē cò sáā ge kpéʔele.

²⁵ Pe a ba tɛ́ɛn tári ni, dee mii kaan mii falipyew Zyakɔbi ma lè, dee ni yele tóobèle da tɛ́ɛn lè. Pe a ba tɛ́ɛn di ni, poro ní be pìíbèle, ní be pìinyanbiiyi làla o làla kwɔ́ɔmɔ fun, mii falipyew Davidi si pye fǎngi na pe nyúngi na làla o làla kwɔ́ɔmɔ fun.

²⁶ Mii a bɛ̀ɛlɛ joogaanna kpéʔele ní be ní, bàngwɔɔ joogaanna a pye yaà ní be ní. Mii a be télege, mii a be nɛʔɛ, si mii tɛɛcǎngi kpéʔele pe níngi ni ki kòro yaà làla o làla kwɔ́ɔmɔ fun.

²⁷ Mii tɛɛkòrogi a pye be níngi ni. Mii a pye be Kolocɔlɔw, pé pye mii syɛ́ɛnbèle.

²⁸ Syɛɛnfeleyi a gi cán bi cán mii wi nyɛ Yawe, wee wi Isirayɛli sámagi ni nyɔɔgi lè, lǎli ni mii tɛɛcǎngi ga pye be níngi ni lè làla o làla kwɔ́ɔmɔ fun.› »