Ezekyɛli 36 - Cebaara Bible 2010

Isirayɛli ye a ní be tári fáliga taa

¹ «Mɔ si na, syɔɔn-pya, kérigèle nyaa mi joo mi wáa Isirayɛli nyanbeleyi ma! Mɔ a gi joo si jo: ‹Isirayɛli nyanbeleyi, ye Yawe syɛ́ɛnri lóʔo!

² Kàfɔw Yawe wi syɛ́ɛnri naa joo níì jo: Amɛɛ nigoobèle gi nyuu yele kéeli na lè níì jo: Ɔnhɔ́ɔ̀n! Booma lɛ́ɛlɛ njoyi bee n baa pye wolo kɔ́lɔ na!

³ Awá, kérigèle nyaa mi joo, mɔ a gi joo si jo: Kàfɔw Yawe wi syɛ́ɛnri naa joo, wi n jo: Níì cán pe maa tɔ̀nɔ ni caa bi yele kálagi kàbanyi myɛ na bi yele jɔ́ɔ, jàngó yele í ba pye syɛɛnfeleyi wozanya kɔ́lɔ na, níì cán yele n pye syɛ́ɛnbèle joonɛʔɛgɛ ní be kàfuloyi nyúngo.

⁴ Awá, Isirayɛli nyanbeleyi, ye Kàfɔw Yawe syɛ́ɛnri lóʔo! Kàfɔw Yawe wi syɛ́ɛnri naa joo nyanbeleyi, ní dǎndamayi, ní gòrógoroweeyi, ní jǐnlɔyi, ní gurubɛɛri, ní tɛɛ̀kalagiyi, ní syɛ̀ɛnnɛ fun keyi ma yi yaʔa lè kolili ma n pye kataanra yáriya syɛɛnfeleyi wozanya ma, yoro yee yi yi màʔa lè.

⁵ Awá, Kàfɔw Yawe wi syɛ́ɛnri naa joo, wi n jo: Mii yejaagbangatɔw, mii i nyuu syɛɛnfeleyi wozanya kánma na, ní Edɔmi wobow myɛ kánma na, poro bele be mii tári syɔɔ n pye lè peyɛɛ wóro ní be fundaanri myɛ ní, ní wɔ́ɔ̀ di faʔa be fúnyi ni, jàngó bi yaweenaʔa-tɛ́ɛyi fuguri!

⁶ Awá, kérigèle nyaa mi joo Isirayɛli tásaligi kéele na, mɔ a gi joo nyanbeleyi, ní dǎndamayi, ní gòrógoroweeyi, ní jǐnlɔyi ma, si jo: Kàfɔw Yawe wi syɛ́ɛnri naa joo, wi n jo: Wéle, mii yejaʔatɔw, ní mii fundanʔagbɔɔrɔtɔw wi nyuu wee, níì cán syɛɛnfeleyi n tɔ̀nɔ n faʔara wáa yele na.

⁷ Awá, Kàfɔw Yawe wi syɛ́ɛnri naa joo, wi n jo: Mii n mii kɔ́gi yìrige níì kàli níì jo: Mii n tɔ̀nɔ n jo syɛɛnfeleyi yi yele màʔa lè, yi faʔari a lúru kòro yi tiimaw na!

⁸ Yele si na, Isirayɛli nyanbeleyi, yele a ra yele káganbiiri yirigi sáā yele yasanri sangi mii syɛ́ɛnbèle Isirayɛli ye ma, níì cán kérigèle bee làrivorolo n nan n kwɔ́ɔ.

⁹ Mii wéle wee ní yele ní, mii a fíige yele ma, pe a yele fála si lùguro lùgu yele na.

¹⁰ Mii a syɔɔn ye nɛʔɛ yele ǹjoyi ni, Isirayɛli kpáagi wobogo woolo myɛw. Syɛ̀ɛnnɛ a ni pye kěyi ni, pe a ní faan gurubɛɛri na.

¹¹ Mii a syɔɔn ye ní yaweeri nɛʔɛ yele ǹjoyi ni, pe a nɛʔɛ sáā sii saʔa. Mii a yele kpéʔele syɛɛnnɛʔɛmɛ àmɛɛ gi pye yele sélimi na lè, mii a kacànya saʔa kpéʔele yele na bi sɔ̀lɔ booma lali na. Yele a gi cán bi cán mii wi nyɛ Yawe.

¹² Mii a syɔɔn ye yaʔa paa táanri yele na, pe lè mii syɛ́ɛnbèle Isirayɛli ye, pe a mɔ syɔɔ taa. Mɔ a pye be kɔ́rigi, mɔ a ní kòro bàā be bɔ̀nɔ́ pìibēle ni í.

¹³ Kàfɔw Yawe wi syɛ́ɛnri naa joo, wi n jo: Amɛɛ pe gi nyuu yele ma lè níì jo: Mɔ n syɛ̀ɛnnɛ káa, mɔ n mɔ tiimaa syɛɛnfelegi bɔ̀nɔ pìibēle ni,

¹⁴ gee bee kéele na mɔ a ní syɛ̀ɛnnɛ káa í, mɔ a ní mɔ syɛɛnfelegi bɔ̀nɔ pìibēle ni í, Kàfɔw Yawe wi jo nya.

¹⁵ Mii a ní mɔ yaʔa mɔ í syɛɛnfeleyi tɛʔɛlɛyɛ lóʔo í, syɛɛnfeleyi faʔara a ní nan mɔ na í. Mɔ a ní mɔ syɛɛnfelegi yaʔa gi kpírige í, Kàfɔw Yawe wi jo nya.› »

Yawe a ní Isirayɛli ye kpóʔoro

¹⁶ Yawe syɛ́ɛnri n nan mii na, wi n jo:

¹⁷ «Syɔɔn-pya, lǎli ni Isirayɛli kpáagi wòolo pye wodɛ́ɛnbéle ní be tásaligi na lè, a be gi nɔ́nʔɔ ní be tánʔaganmi, ní be kapyegèle ní. Pe tánʔaganmi maa pye mii yɛ́ʔɛ ma àmɛɛ cɔlɔɔ nɔ́nʔɔrɔ nyɛ lè wi lòweligi làla ni.

¹⁸ Lǎli bee ni, a mii mii fundanʔagbɔɔri yàli be na sìsyaanw kéele na pe wo lè tári ni, ní yasunyi kéele na, yee ní pe di nɔ́nʔɔ lè.

¹⁹ Mii n be cariga n lége syɛɛnfeleyi nínge ni, pe n cariga n tórigo tátɛɛyɛ saʔa ma, mii n kútiiw kúun be na n yɛlɛ ní be tánʔaganmi, ní be kapyegèle ní.

²⁰ Pe n nan syɛɛnfeleyi tɛ́ʔɛ na, beè pe da ni syée lè, a be mii mɛ́ɛcǎngi nɔ́nʔɔ, a gi pye pe i gi nyuu be kéeli na níì jo: ‹Yawe syɛ́ɛnbèle bɛɛ, woro tári ni be yiri yaà.›

²¹ Mii si maa ni caa bi mii mɛ́ɛcǎngi sámaga, koro gee Isirayɛli kpáagi wòolo da ni nɔ́ɔnri lè syɛɛnfeleyi nínge ni, yoro yee má be kári lè.

²² Awá, ki joo Isirayɛli kpáagi wòolo ma mí be pye: ‹Kàfɔw Yawe wi syɛ́ɛnri naa joo níì jo: Yele kéeli na ban mii gee bee pye í, Isirayɛli kpáagi wòolo, mii mɛ́ɛcǎngi kéele na wii, koro gee yele nɔ́nʔɔ lè syɛɛnfeleyi nínge ni, yee má yele kári lè.

²³ Mii a mii mɛ́ɛkpɔɔgi sámaga nyɔɔ, gee ki da nɔ́nʔɔ lè syɛɛnfeleyi nínge ni, koro gee yele nɔ́nʔɔ lè yi níngi ni. Syɛɛnfeleyi si a gi cán bi cán mii wi nyɛ Yawe, lǎli ni mii ga yele kéeli tɛ́ʔɛ n niyɛɛ sámaga n nyɔɔ lè pe yɛʔɛ̀ ma, Kàfɔw Yawe wi jo nya.

²⁴ Mii a yele kíle bi yirige syɛɛnfeleyi nínge ni, mii a yele kpóʔoro bi yirige tátɛɛyi myɛ ni, mii a yele lúrugo pan yele tiimaa tásaligi ma.

²⁵ Mii a lòcànga nyari nyari yele na, yele a jée mùnu. Mii a yele jée mùnu bi yele nɔ́nʔɔri myɛ, ní yele yasunyi myɛ láʔa yele na.

²⁶ Mii a funvɔngɔ kaan yele ma, mii a pìifɔnnɔ le yele ni. Mii a kàdɛnɛgi fúngo yirige yele céri ni, si cere fúngo kaan yele ma.

²⁷ Mii a mii Pǐli le yele ni, si gi yaʔa gi pye yele í taʔa mii làlwaw kèlē na, si mii kajoodɛɛngèle cò sáā ge kpéʔele.

²⁸ Yele a tɛ́ɛn tári ni, dee mii kaan yele tóolɛɛbèle ma lè. Yele a pye mii syɛ́ɛnbèle, mii si pye yele Kolocɔlɔw.

²⁹ Mii a yele syɔɔ yele nɔ́nʔɔri myɛ ma. Mii a bilew yeri, mii a wi nɛʔɛ. Mii a ní kateʔe cáan yele na í.

³⁰ Mii a tíiri yasanra nɛʔɛ, ní séyi yataara ní, koro ga pye kateekpɔɔgi faʔara a ní kɔ́ nan yele na syɛɛnfeleyi nínge ni í.

³¹ Lǎli bee ni yele a sɔ̀ngí taa yele tánʔaganbeemi na, ní yele kapyegèle na, gele ge lè ke da nyɔɔ í. Yele láagi a kwɔ́ɔ yeyɛɛ ni yele kolomi kèlē, ní yele yanɔnʔɔyi kéele na.

³² Yele kéeli na ban mii gi kpéʔele í, Kàfɔw Yawe wi jo nya, ki n yɛlɛ ye gee bee cán! Ki n yɛlɛ fɛ̀ɛrɛ í yele taa, yé curugo yele tánʔaganmi kéele na, yele Isirayɛli kpáagi wòolo.› »

³³ Kàfɔw Yawe wi syɛ́ɛnri naa joo níì jo: «Cángee na mii ga yele kolomi kèlē myɛ jée n láʔa yele na lè, mii a ní syɛ́ɛnmi yaʔa bi nɛʔɛ kěyi ni, pe a ní da faanri gurubɛɛri na.

³⁴ Tári di kálagi lè pe a ní da di fála, sáni di kòro lè kozɔ̀lɔbèle í da di nyaagi tɛɛ̀kalagiga.

³⁵ Pe a ra gi nyuu si jo: ‹Tári naa ti da kálagi lè nya, ti n baa kàri n pye àmɛɛ Edɛn nángwɔɔ nyɛ lè, ní di kěyi yi pye lè kataya, níì kálagi, níì kpúmɔn n cáan, pe n níì yi sámaga a yi nìri, syɛ̀ɛnnɛ si i nyɛ yi ni.›

³⁶ Syɛɛnfeleyee yi a kòro beè bi yele màʔa lè, yi a gi cán bi cán mii Yawe, mii n níì gi faan, gee ki da kpúmɔn n cáan lè, ní níì gi cɔ́rɔ, gee ki da kálagi lè. Mii Yawe, mii wi joo, mii si a gi kpéʔele.»

³⁷ Kàfɔw Yawe wi syɛ́ɛnri naa joo níì jo: «Mii a ní gi yaʔa Isirayɛli kpáagi wòolo í da mii nyɛ́ɛri gbanʔama mii í poro dɛ̀ɛmɛ, mii a lóʔo be ma si be kpéʔele be nɛʔɛ àmɛɛ yaweere kurugo nyɛ lè.

³⁸ Kěyee yi lè kataya yi a nyìn syɛ̀ɛnnɛ kuruyo na gi pye àmɛɛ yaweere kuruyo nyɛ, yee yi yaʔa kɔlɔ̀ na Kolocɔlɔɔ ma lè, bi pye àmɛɛ yaweere kuruyo nyɛ, yee ní be syée Zyerusalɛmi ma lè, wi kpóʔorojǎngèle canya ni. Pe a gi cán bi cán mii wi nyɛ Yawe.»