Ezekyɛli 35 - Cebaara Bible 2010

Joogbanna Edɔmi ye kánmi na

¹ Yawe syɛ́ɛnri n nan mii na, wi n jo:

² «Syɔɔn-pya, mɔ yɛ́ɛgi wáa Seyiiri nyanbelegi kàbaan na, mí kérigèle nyaa mi joo gi kánmi na.

³ Mɔ a gi pye: ‹Kàfɔw Yawe wi syɛ́ɛnri naa joo níì jo: Wéle, mɔ ní mii cáan, Seyiiri nyanbelegi, mii a kɔ́gi sánʔa bi taʔa mɔ na, mii a mɔ kàriga tɛɛwaʔa, ní tɛɛ̀kalagiga.

⁴ Mii a mɔ keyi kàriga gurubɛɛrɛ, mɔ a ba pye tɛɛ̀kalagiga, mɔ a gi cán bi cán mii wi nyɛ Yawe.

⁵ Amɛɛ kwɔ́ɔmɔ fun paraga da pye mɔ ni lè, á mɔ Isirayɛli ye le ŋɔséew kɔ́yɔ ni pe wɔʔɔli làla ni lè, lǎlee ni pe kolomi da baa nyìn n foro lè,

⁶ mii woweew mɛ́ʔɛ na, Kàfɔw Yawe wi jo nya, mii a mɔ cáan sìsyaan ni, sìsyaanw si pye mɔ kurugo. Amɛɛ gi nyɛ lè sìsyaan wori ga mɔ bɛɛn í, sìsyaanw a pye mɔ kurugo.

⁷ Mii a Seyiiri nyanbelegi kàriga tɛɛyaʔaga ní tɛɛwaʔa, mii a kárifɔbèle, ní panvɔbèle láʔa yaà gi na.

⁸ Mii a gi nyanbeleyi nyìn kúbèle na. Bele pe a fúrugu ní ŋɔséew ní lè, bele bee a ra tuun mɔ dandamayi, ní mɔ jinlɔyi, ní mɔ gorógoroweeyi ni.

⁹ Mii a mɔ kàriga kwɔ́ɔmɔ fun tɛɛyaʔaga, syɛ̀ɛnnɛ a ní pye mɔ keyi ni í, Yele a gi cán bi cán mii wi nyɛ Yawe.

¹⁰ Ncan mɔ n gi joo níì jo: Syɛɛnfeleyi siin, ní tátɛɛyi siin a pye mii wóyo, wolo a yi syɔɔ bi taa, bi gi taa Yawe maa pye yaà.

¹¹ Awá, mii woweew mɛ́ʔɛ na, Kàfɔw Yawe wi jo nya, mii a tɔ̀nɔ́ gi pye ní fundanʔara, ní yejaʔa ní bi yɛlɛ ní gee ní mɔ kpéʔele lè àmɛɛ be kéeli mɔ bɛɛn lè, mii si a niyɛɛ dɛ̀ɛn pe níngi ni lǎli ni mii ga kútiiw ceri mɔ na lè.

¹² Mɔ a gi cán bi cán mii Yawe n faʔari syɛ́ɛnrɛ myɛ lóʔo, dee mɔ joo n wáa Isirayɛli nyanbeleyi na lè, níì jo: Yi n pye tɛɛ̀kalagiya, yi n kaan wolo ma lìile.

¹³ Yele n yìri mii kánmi na yele syɛɛnjóori báriga ni, yele n joogbɔɔmɔ joo mii kánmi na, mii tiimaa n di lóʔo.

¹⁴ Kàfɔw Yawe wi syɛ́ɛnri naa joo níì jo: Lǎli ni tári myɛ ga pye fundaanra na lè, mii a mɔ kpéʔele tɛɛ̀kalagiga.

¹⁵ Amɛɛ mɔ da fundaanra kpéʔele lè lǎli ni Isirayɛli kpáagi wòolo kɔ́rigɔ da kálagi lè, gee bee félege mii a kpéʔele mɔ na. Mɔ a pye tɛɛ̀kalagiga, Seyiiri nyanbelegi, mɔ ní Edɔmi myɛ bìnɛw. Pe a gi cán bi cán mii wi nyɛ Yawe.›