Ezekyɛli 34 - Cebaara Bible 2010

Gee gi joo lè Isirayɛli yɛɛ̀kinibèle kánma na

¹ Yawe syɛ́ɛnri n nan mii na, wi n jo:

² «Syɔɔn-pya, kérigèle nyaa mi joo bele kánma na be nyɛ lè bànaʔabēle, ni Isirayɛli ye nàʔá, kérigèle nyaa mi joo mí be pye gee gi joo bànaʔabèle ma lè, Kàfɔw Yawe wi syɛ́ɛnri naa joo níì jo: ‹Wɔʔɔli a pye bànaʔabèle na be Isirayɛli ye nàʔá lè, poro bele be peyɛɛ tiimaw nàʔá lè! Bǎbèle ban gi yɛlɛ bànaʔabèle í da nàʔá ì?

³ Yele i kaasǐnmi líi, yele i bàsiiri búroyo nii, yele n sǐnmi yaweere kpóo n wòlo sáriga, yele si o bǎbèle nàʔá í.

⁴ Yele ga fànʔa le fànʔa fun wóbèle ni í, yele ga tiinmɛ kpéʔele bele na be yáa lè í, yele ga wogbalibèle námiya pwɔɔ í. Bele be còolo lè, yele ga be lúrugo a be pan í, bele be pùuni lè, yele ga be caa í. Fwɔɔ a yele i be kàragí ní fànʔa, ní fungbanga ní.

⁵ Pe n cariga bànaʔaɔ fɔ̀ngɔ báriga ni. Pe n baa pye sìnbirigi yaweere myɛ kaacòro. Pe n cariga.

⁶ Mii bǎbèle i curugu ni máari nyanbeleyi myɛ, ní dǎndama-tɔ́nɔyi myɛ na, mii bǎbèle n cariga n fala tári myɛ yɛ́ʔɛ kurugo. Syɔɔn faala o be kɔ̀rɔsíi í, syɔɔn faala o be caa í.

⁷ Koro na, bànaʔabèle, ye Yawe syɛ́ɛnri lóʔo!

⁸ Mii woweew mɛ́ʔɛ na Kàfɔw Yawe wi jo nya, àmɛɛ pe mii bǎbèle koli n kári lè, ní àmɛɛ mii bǎbèle baa pye lè sìnbirigi yaweere myɛ kaacòro bànaʔaɔ fɔ̀ngɔ kéele na, àmɛɛ gi nyɛ lè mii bànaʔabèle da ni mii bǎbèle kɔ̀rɔsíi í, ní àmɛɛ bànaʔabèle da kòro ni peyɛɛ tiimaw nàʔá lè, pe si o mii bǎbèle nàʔá í,

⁹ gee bee na, bànaʔabèle, ye Yawe syɛ́ɛnri lóʔo!

¹⁰ Kàfɔw Yawe wi syɛ́ɛnri naa joo níì jo: Wéle, bànaʔabèle ní mii cáan! Mii a be yíbe mii bǎbèle na pe nyɛ lè be kɔ́yi ni, mii a ní be yaʔa paa mii bǎbèle nàʔá í, jàngó bànaʔabèle a ní kɔ́ ra peyɛɛ tiimaa nàʔá í, mii a mii bǎbèle kíle láʔa pe nyɔ́ɔyi na, pe a ní pye be ma kaara í.

¹¹ Níì cán Kàfɔw Yawe wi syɛ́ɛnri naa joo níì jo: Mii tiimaa wi a ra mii bǎbèle kɔ̀rɔsíi, sáā be saanri da wéle.

¹² Amɛɛ bànaʔaɔ wi bàtogo saanri ni wéle lè, lǎli ni wi nyɛ wi bǎbèle nínge ni be yàli n màʔa lè, ànbée mii a ra mii bǎbèle saanri da wéle, mii a be yirige yaà tɛ́ɛyee myɛ ni be cariga n fala lè fàfanʔa, ní nìgolowirige canʔa na.

¹³ Mii a be yirige yaà syɛɛnfeleyi ni, beè be nyɛ lè, mii a be kpóʔoro bi yirige yaà tátɛɛyɛ saʔa ni, bi be lúrugo pan pe tásaligi ma. Mii a ra be nàʔá Isirayɛli nyanbeleyi na, ní lònyɔɔw, ní tári tɛ́ɛyɛ myɛ ni, beè syɛ̀ɛnnɛ a gbǎn kòro lè.

¹⁴ Mii a ra be nàʔá nyàácànga tɛ́ʔɛ ni, pe tɛɛsùlugi si pye Isirayɛli ǹjoʔo ma tári nyanbeleye na. Nɛɛ bee pe a ra ŋɔ́ngi da daagi tɛɛsùlujànga ni, pe a ra nyàácànga taagi bàā káa Isirayɛli nyanbeleyi na.

¹⁵ Mii wi a ra mii bǎbèle nàʔá, mii wi a ra be sínɛgi paa ŋɔ́ngi bàā daagi, Kàfɔw Yawe wi jo nya.

¹⁶ Wee wi pùuni lè mii a wi caa, wee wi còolo lè mii a wi lúrugo pan, wee wi kpàli lè mii a wi námiyi pwɔɔ, wee wi yáa lè mii a fànʔa le wi ni. Wee si ni sìnmɛ nyɛ lè, á wi nìri, mii a wee bee kálagi. Mii a ra be nàʔá ní sínnɛ ní.

Kolocɔlɔɔ a wi syɛ́ɛnbèle syɔɔ

¹⁷ « ‹Yele si na, mii bǎbèle, Kafɔw Yawe, wi syɛ́ɛnri naa joo níì jo: Wéle, mii a kútiiw joo byà ní wi bànyɛnnɛ níngi ni, ní bàpɔlɔ, ní sikepɔlɔ níngi ni.

¹⁸ Pe i yele nàʔá nyàácǎngi tɛ́ʔɛ ni, a koro cɛ́rɛ lé yele ni, fwɔɔ a gi nyaa yele í da yele nyàásangi tánʔana ní yele tɔ́lɔyi ní? Yele í da lòyeli-yeligi gbo, a koro cɛ́rɛ lé yele ni fwɔɔ a gi nyaa yele í da wozangi mɔ́nɔgi ní yele tɔ́lɔyi ní?

¹⁹ Ki n pye ŋàʔanaga mii bǎbèle í da nàʔá gee ni yele tánʔana ní yele tɔ́lɔyi ní lè, si wɔ́ɔ ra gi gbo, gee yele mɔ́nɔgɔ ní yele tɔ́lɔyi ní lè!

²⁰ Gee bee na Kàfɔw Yawe n syɛ́ɛnri naa joo be ma níì jo: Wéle, mii tiimaa wi a kútiiw ceri sìnmɛ byà, ní bàwaʔa níngi ni.

²¹ Amɛɛ yele fànʔa fun bǎbèle myɛ cínɛ lè ní lɛ̀ʔɛgèle, ní fókaannyunyi ní, ní i be fologi ní yele nyɛ́ngèle ní, bi taa yele í be cariga yirige kàfugo ma,

²² mii a mii bǎbèle syɔɔ jàngó pe a ní kɔ́ be koli í, mii a kútiiw ceri byà ní wi bànyɛnnɛ níngi ni.

²³ Mii a bànaʔaɔ nibin télege be na, wi a ra be nàʔá, woro wi nyɛ mii falipyew Davidi, woro wi a ra be nàʔá, wi a pye be bànaʔaw.

²⁴ Mii Yawe, mii wi a pye be Kolocɔlɔw, mii falipyew Davidi si pye fànʔafɔbili, pe níngi ni, mii Yawe wi jo nya.

²⁵ Mii a yɛɛ̀nyinge joogaanna kpéʔele ní be ní, mii a sìnbirigi yaweere kwɔ́ɔ bi yirige tári ni. Pe a tɛ́ɛn yɛɛ̀nyinge na sági fìími tára ni, sáā ŋúnɔ kɔ́liyi nínge ni.

²⁶ Tɛ́ɛyi yi mii dǎndamagi màʔa lè, mii a dùba taʔa pe ní yoro na. Mii a ra zěyi kaangi yi lǎli ni, yi a pye dùba zěye.

²⁷ Sìnbirigi tíire a ra sangi, tári a ra ti yasanri kaangi. Pe a pye yɛɛ̀nyinge na sági pe tásaligi na. Pe si a ba gi cán bi cán mii wi nyɛ Yawe lǎli ni mii ga be zúuw yapwɔɔrɔ cɛnɛ lè, níì be yirige bele kɔ́yɔ ni pe be kɔ́ri pe i báara poro ma lè.

²⁸ Pe a ní pye yakoliro syɛɛnfeleyi ma í, tári yaweere a ní da be káa í, pe a tɛ́ɛn yɛɛ̀nyinge na sági, syɔɔn faala a ní da be tɔ́ɔrɔ í.

²⁹ Mii a tiire séʔe sámaga be ma, gee mɛ́ʔɛ ki a yiri lè, kateegi a ní be kálagi tári ni í. Pe a ní pye faʔara yáriya syɛɛnfeleyi ma í.

³⁰ Pe a gi cán bi cán mii Yawe wi lè poro Kolocɔlɔw, mii i nyɛ ní poro ní, poro si i nyɛ mii syɛ́ɛnbèle, poro Isirayɛli kpáagi wòolo, Kàfɔw Yawe wi jo nya.

³¹ Yele mii bǎbèle, bǎbèle bele be nyɛ lè mii yaweenaʔa-tɛ́ɛgi wòolo, yele i nyɛ syɛ̀ɛnnɛ. Mii si na, mii wi nyɛ yele Kolocɔlɔw, Kàfɔw Yawe wi jo nya.› »