Ezekyɛli 32 - Cebaara Bible 2010

Funbɛɛnrɛ ŋúnugo Ezyipiti ní wi fànʔafɔw kéele na

¹ Yɛ̀ʔɛlɛ kɛɛ ní siin wóli, yeye kɛɛ ní siin wóʔo cânzelige na, a Yawe syɛ́ɛnri nan mii na, wi n jo:

² «Syɔɔn-pya, funbɛɛnrɛ ŋúnugo ŋùu Faraɔnw kéele na, Ezyipiti fànʔafɔw! Mɔ a wi pye: ‹Mɔ maa pye àmɛɛ càarabɔ-yɛlɛɔ nyɛ lè syɛɛnfeleyi nínge ni. Mɔ maa pye àmɛɛ wócɔɔn nyɛ lè sólomi lòyo ni, mɔ maa ni yegi ni jǐn mɔ cábiyi ni, mɔ maa ni lǒyi nɔ́nʔɔrɔ ní mɔ tɔ́lɔyi ní, mɔ maa ni yi kùnguruyi fúugu,

³ Kàfɔw Yawe wi syɛ́ɛnri naa joo níì jo: Mii a mii cɔ̀ɔ́w cáan mɔ na syɛɛnfele-nɛʔɛyɛ kpóʔorolo ni, yi a mii kùruw tɛ́ʔɛ bi mɔ kíle yirige.

⁴ Mii a mɔ wáa tári na, mii a mɔ cáan sánʔa sefii-tári na. Mii a nyɛ̀ʔɛni féjɛɛngèlē myɛ yaʔa ke ba ra tɛ̀ɛ́n mɔ na, mii a mɔ tɛ́ʔɛ bi tári yaweere myɛ tín.

⁵ Mii a mɔ céri taʔa nyanbeleyi na, bi jǐnlɔyi nyìn mɔ cefɔnʔɔri na.

⁶ Mii a tári kaan ti gbaa mɔ sisyaanw na wi fóo ni yirigi mɔ ni lè fwɔɔ bi sa nan nyanbeleyi na, gòrógoroweeyi a nyìn wi na.

⁷ Lǎli ni mɔ ga fígi lè mii a nyɛ̀ʔɛgèle tɔ́n, mii a ge ŋɔripiigèle pye yébilimɛ, mii a cángi tɔ́n ní fàfanʔa ní, yégi a ní ki gbɛ̀ɛ́nmi kaan í.

⁸ Mii a nyɛ̀ʔɛni gbɛ̀ɛnyirige-yariya myɛ kàriga yébilimɛ mɔ kéeli na, si yébiliwɔɔlɔ tɔ́n mɔ tári na, Kàfɔw Yawe wi jo nya.

⁹ Mii a syɛɛnfeleye saʔa fúnyo tanʔa, lǎli ni mii ga mɔ kálagili kéele yaʔa a li nan lè syɛɛnfeleyi na, tátɛɛyi ni yi lè mɔ da yi cán í.

¹⁰ Mii a funjurugoro wáa syɛɛnfeleye saʔa na mɔ kéeli na, fyáara a yi fànʔafɔbèle cò mɔ kéeli na, lǎli ni mii ga mii ŋɔséew nyáʔana pe yɛʔɛ̀ ma lè. Pe a ra cɛ̀lɛ́ làrinijanni ni, pe myɛ nibin nibin pe sìíw kéele na, mɔ tooli canʔa na.›

¹¹ Níì cán Kàfɔw Yawe wi syɛ́ɛnri naa jo níì jo: ‹Babilɔni fànʔafɔw ŋɔsée a nan mɔ na.

¹² Mii a kapɛɛnkpumɔn-sànbalibéle ŋɔsée tɛ́ʔɛ bi mɔ syɛɛnnɛʔɛmi kpóo cáan, poro bele myɛ be tanʔa n sɔlɔ lè syɛɛnfeleyi nínge ni. Pe a Ezyipiti nɛ̀ɛnyɛnɛgi kpúmɔn nyáʔami, wi syɛɛnnɛʔɛmi myɛ a kálagi.

¹³ Mii a wi yaweeri myɛ kpóo bi léeli lòkpoloyi nyɔ́ɔ na. Syɔɔn nyɔnnɔ a ní da yi nɔ́ʔɔrɔ í, yaweʔe fèriye a ní da yi nɔ́ʔɔrɔ í.

¹⁴ Lǎli bee ni mii a be lǒyi yérige sági. Mii a be cábiyi yaʔa yaa fóo àmɛɛ sìnmɛ nyɛ lè, Kàfɔw Yawe wi jo nya.

¹⁵ Lǎli ni mii ga Ezyipiti tári pye lè tɛɛ̀kalagiga, yáriri di nyɛ tári ni lè, a ti myɛ koli n yirige yaà, ní wɔ́ɔ̀ syɛ́ɛnbèle myɛ kpúmɔn, bele be nyɛ di ni lè, pe a gi cán bi cán mii wi nyɛ Yawe.›

¹⁶ Gee bee gi nyɛ funbɛɛnrɛ ŋúnugi, pe a gi ŋùu. Syɛɛnfeleyi càbala a funbɛɛnrɛ ŋúnugi bee ŋùu. Pe a gi ŋùu Ezyipiti ní wi syɛɛnnɛʔɛmi myɛ kéele na,» Kàfɔw Yawe wi jo nya.

Kayaagi nyɛnigɛ syɛɛnfeleyi jáala kéele na

¹⁷ Yɛ̀ʔɛlɛ kɛɛ ní siin wóli na, yégi canya kɛɛ ní kagunɔ wóʔo na, a Yawe syɛ́ɛnri nan mii na, wi n jo:

¹⁸ «Syɔɔn-pya, da cɛ́ɛn Ezyipiti syɛɛnnɛʔɛmi kéele na, mí bi tìrige, poro ní fànnɛʔɛgɛ syɛɛnfeleyi wòolo ní, táàma tátɛɛyi ni, ní bele ní be tíri lè weecurugi ni.

¹⁹ Wi pye: ‹Wìí na mɔ sɔ̀lɔ nìjanri kàbaan na? Tìgi pe mɔ sínɛgɛ ní sìngɛ́nɛbèle ní.

²⁰ Pe a too bele nínge ni ŋɔséew da súu n fúrugu lè. Ŋɔsée n kaan, ye Ezyipiti ní wi syɛɛnnɛʔɛmi myɛ kɔ́ri ye kári.

²¹ Séekpɔɔw nànniribēle a syɛ́ɛnri joo wi ma kúbèle tɛɛkòrogo ninge ni, woro ní wi dɛ̀ɛmɛfɔbèle ní. Pe n tìgi yaà, pe n sínɛ, sìngɛ́nɛbèle ŋɔséew súu n fúrugu lè.›

²² Asirii wéle wee, ní wi kapɛɛnkpumɔnbèle kabiya myɛ ní, á wi kɔ̀ɔ́ngèle wi màʔa. Ŋɔséew wi bele bee myɛ fúrugu n kpóo n cáan.

²³ Wi kɔ̀ɔ́ngèle maa tɛ́ʔɛ weecurugi fúngo ni, á wi kapɛɛnkpumɔnbèle wi kɔ̀ɔ́nni màʔa, ŋɔséew wi be myɛ fúrugu n kpóo n cáan, poro bele pe da ni fyáakpɔɔri wáa niweebèle tára na lè.

²⁴ Elami wéle wee, ní wi syɛɛnnɛʔɛmi myɛ ní n wi kɔ̀ɔ́nni màʔa. Ŋɔséew wi be myɛ fúrugu n kpóo n cáan. Pe n tìgi sìngɛ́nɛbéle, táàma tátɛɛyi ni, poro bele pe da ni fyáakpɔɔri wáa niweebèle tára na lè, pe n be fɛ̀ɛ́ri tugo ní bele ní be tíri weecurugi ni lè.

²⁵ Pe n wi tɛɛ̀sinɛgi pye ní bele ní pe kpóo lè, ní wi syɛɛnnɛʔɛmi myɛ ní, a wi kɔ̀ɔ́ngèle wi màʔa. Ŋɔséew maa sìngɛ́nɛbèle bee myɛ fúrugu, níì cán pe fyáakpɔɔri maa cariga niweebèle tára ni, á pe be fɛ̀ɛ́ri tugo ní bele ní be tíri weecurugi ni lè. Pe n be tɛ́ʔɛ bele nínge ni be kpóo lè.

²⁶ Nɛɛ bee Mesyɛki, ní Tubali ní be syɛɛnnɛʔɛmi nyɛ, á be kɔ̀ɔ́ngèle be màʔa. Ŋɔséew wi sìngɛ́nɛbèle bee myɛ fúrugu, níì cán pe maa ni be fyáakpɔɔri cáan niweebèle tára na.

²⁷ Pe ga kùu n sínɛ ní nànniribèle ní í, poro bele be too sìngɛ́nɛbèle nínge ni lè. Nànniribèle n tìgi kúbèle tɛɛkòrogo ni ní be kapɛɛnkpumɔn-yáriri ní, á pe be ŋɔséebèle le pe nyúnyi láara ni, pe tunmɔzige-yáriyi si i nyɛ be kaceleyi na, níì cán nànniribèle fyáakpɔɔrɔ maa pye niweebèle tára na.

²⁸ Mɔ si na, sìngɛ́nɛbèle nínge ni mɔ a tɔ́nʔɔnɔ, mɔ a kùu bi sínɛ ní bele ní be fúrugu ní ŋɔséew ní lè.

²⁹ Edɔmi wéle wee, wi ní wi fànʔafɔbèle, ní wi fànʔafɔbiigèle myɛ ní, pe ní be gbǎnmi ní gi myɛ ní, pe n be pínɛ ní bele ní be fúrugu ní ŋɔséew ní lè! Pe n kùu n sínɛ ní sìngɛ́nɛbèle ní, ní bele ní be tíri weecurugi ni lè.

³⁰ Solomɔkulo kàbangi fànʔafɔbiigéle myɛ wéle gele, n fàra Siidɔn ye myɛw na, pe n tìgi ní wogboobèle ní, fɛ̀ɛrɛ wòolo ní, fyáakpɔɔri ní gi myɛ ní, dee be sànbalimi da ni wáa lè. Sìngɛ́nɛbèle bee n kùu n sínɛ ní bele ní pe da fúrugu lè, pe n be fɛ̀ɛ́ri tugo ní bele ní be tíri weecurugi ni lè.

³¹ Faraɔnw a be nyaa, koro a wi kpɛʔɛlɛ wi syɛɛnnɛʔɛmi myɛ kéele na, Faraɔnw wòolo, ní wi sùlasiibèle myɛ pe da fúrugu ní ŋɔséew ní lè, Kàfɔw Yawe wi jo nya.

³² Níì cán mii n mii fyáakpɔɔri cáan niweebèle tára na. Pe a wi sínɛgɛ sìngɛ́nɛbèle nínge ni, ní bele ní pe da fúrugu ní ŋɔséew ní lè, Faraɔnw, ní wi syɛɛnnɛʔɛmi myɛ, Kàfɔw Yawe wi jo nya.»