Ezekyɛli 31 - Cebaara Bible 2010

Ezyipiti fànʔafɔw n tímana ní sɛdiri tíige ní

¹ Yɛ̀ʔɛlɛ kɛɛ ní nibin wóli yedaanri wóʔo cânzelige na, a Yawe syɛ́ɛnri nan mii na, wi n jo:

² «Syɔɔn-pya, ki joo Faraɔnw ma, Ezyipiti fànʔafɔw, ní wi syɛɛnnɛʔɛmi ma, mí jo: ‹Wìí mɔ wíri mɔ tɔnɔri ni?

³ Wéle, Asirii maa pye Liban sɛdiri tíige, ní káganjànya, ní nyínnɛʔɛmɛ kɔ́ligɔ, á gi níngi tɔnɔ, a gi fínaani tɔnɔ n yiri tiitɔnri nínge ni.

⁴ Lǒyi maa gi kaan a gi tɔnɔ, weecurugi maa gi kaan a gi tɔnɔ n kári ǹjoʔo ma n gi cábiyi yaʔa a yi i fóo ni gi tíiri séʔe máari, ní i gi lòfóozɔ̀lɔyi tórogi sìnbirigi tíire myɛ ma.

⁵ Koro na ki níngi da tɔnɔ n sɔ̀lɔ sìnbirigi tíire myɛ na, a gi káganyi i nɛʔɛgi, a gi káganbiiri i cábagi, lònɛʔɛgi báriga ni ki da ni púlo gi taana lè.

⁶ Nyɛ̀ʔɛni féjɛɛngèlē myɛ maa ni ge zyàári téeri ki káganyi na, sìnbirigi yaweere myɛ maa ni sii gi káganyi láara ni, syɛɛnfele-nɛʔɛyi myɛ maa ni tɛ̀ɛ́n ki nyínmi ni.

⁷ Ki maa nyɔɔ ki tɔnɔri báriga ni, ní ki káganyi cábagila báriga ni, níì cán ki nǐnri maa ni kéle lònɛʔɛyi ni.

⁸ Kolocɔlɔɔ nángwɔɔw sɛdiri tíigaa da sɔ̀lɔ gi na í, siipirɛ tíiyi da yɛlɛ ní gi káganyi ní í, pilatani tíiyi da gi kágannaa kwɔ́ɔ nìjanri na í. Kolocɔlɔɔ nángwɔɔw tíigaa faala da gi kwɔ́ɔ nìjanri na í.

⁹ Mii maa gi kágannɛʔɛri tɛ́ʔɛ n gi fère, a gi nyabɛɛnni pye Edɛn tíiri myɛ na Kolocɔlɔɔ nángwɔɔw ni.›

Ezyipiti fànʔafɔw a tɔ́nʔɔnɔ àmɛɛ sɛdiri tíige nyɛ lè

¹⁰ «Gee bee na Kàfɔw Yawe syɛ́ɛnri naa joo níì jo: ‹Amɛɛ gi sámaga n tɔnɔ lè, á gi fínaani tɔnɔ n yiri tiitɔnyi nínge ni, á kpɔɔmɔ jée gi fúngi ni gi tɔnɔri kéele na,

¹¹ gee bee na mii gi le syɛɛnfeleyi yɛɛ̀kinio kɔ́yɔ ni, wi gi cò bi yɛlɛ ní gi péemi ní. Mii n gi nɛnɛ.

¹² Nibɔɔnnɔ n gi kpúmɔn n cáan níì fala níì gi yaʔa, poro bele be tanʔa n sɔ̀lɔ syɛɛnfeleyi nínge ni lè. Ki káganyi n too nyanbeleyi, ní jǐnlɔyi myɛ ni. Ki káganyi n tɔ́nʔɔnɔ tári gòrógoroweeye myɛ ni, a tári syɛɛnfeleye myɛ yiri ki nyínmi ni, níì fala níì gi yaʔa.

¹³ Ki káganyi be cɛnɛ lè, a nyɛ̀ʔɛni féjɛɛngèlē myɛ pan n baa tɛ́ɛn yi na, a sìnbirigi yaweere myɛ baa di tɛɛ̀sinɛyi pye ki káganbiiri nínge ni.

¹⁴ Kánmi bee na, tíiyi yi nyɛ lè lǒyi nyɔ́ɔ na, ki kàa a ní tɔnɔ bi gi fínaani yirige tiitɔnyi nínge ni í. Kánmi bee na syɛni tíiyi yi wɔ́ɔ̄ taagi lǒgi na lè, ki kàa a ní tɔnɔ í. Níì cán ti myɛ n kaan kùúw ma, táàma tátɛɛyi ni, syɔɔn ye níngi ni, ní bele ní be tíri weecurugi ni lè.› »

¹⁵ Kàfɔw Yawe wi syɛ́ɛnri naa joo níì jo: «Cángee na gi tìgi kúbèle tɛɛkòrogo ni lè, a mii kùu káyaagi càmi, mii n wéegi lúrugo n tɔ́n gi na, mii n gi cábiyi yérige. Lòkpoloyi fóolo n yére. Mii n Liban kàriga yébilimɛ gi kéeli na, a sìnbirigi tíire myɛ waʔa gi kéeli na.

¹⁶ Mii n syɛɛnfeleyi kaan a yi cɛ̀lɛ gi tooli kàfulogo báriga ni, lǎli ni mii gi tìrige lè kúbèle tɛɛkòrogo ni, ní bele ní be tíri lè weekpɔɔgi ni. A koro Edɛn tíiri myɛ kpɛʔɛlɛ táàma tátɛɛyi ni, gee bee n jo ní Liban wóri ti nyɔɔ n sɔ̀lɔ lè níì pɔ́rɔ n sɔ̀lɔ ti myɛ na, dee myɛ di lǒgi taagi lè.

¹⁷ Bele bee n wɔ́ɔ̀ tìgi ní gi ní kúbèle tɛɛkòrogo ni, bele kurugo pe nyɛ lè ŋɔséew wogboobéle. Poro na ki da kiyɛɛ zígi, poro bele pe da pye lè ki nyínmi ni, syɛɛnfeleyi nínge ni.

¹⁸ Wìí mɔ wíri kánmi bee na nìjanri, ní tɔnɔri kàbaan na Edɛn tíiri nínge ni? Pe a mɔ tìrige ní Edɛn tíiri ní táàma tátɛɛyi ni. Mɔ a sínɛ sìngɛnɛbèle nínge ni, ní bele ní ŋɔséew kpóo lè. Faraɔnw wi a pye ànbée ní wi syɛɛnnɛʔɛmi ní, Kàfɔw Yawe wi jo nya.»