Ezekyɛli 30 - Cebaara Bible 2010

Yawe a wi fundanʔari tɛ̀ɛn Ezyipiti kánmi na

¹ Yawe syɛ́ɛnri n nan mii na, wi n jo:

² «Syɔɔn-pya, kérigèle nyaa mi joo mí jo: ‹Kàfɔw Yawe wi syɛ́ɛnri naa joo níì jo: Yaa nyaan yaa peele yé jo: Ee, cânbeʔe!

³ Níì cán cángi i nùuní, Yawe cángi i nùuní, fàfaanra canʔa gii, syɛɛnfeleyi làla li a pye.

⁴ Ŋɔséew i maa Ezyipiti ma, wɔʔɔgɔ a pye Etyopii ni, bele be kpóo lè lǎli ni poro ga pye wodoobéle ní Ezyipiti ni lè, lǎli ni pe ga wi lɔ́ri láʔa yaà lè, á wi kàpɔɔnbèle kpúmɔn n cáan.

⁵ Etyopii, ní Puti, ní Ludi, ní Arabii tári myɛw, ní Kubi, ní nyɔɔfaligi tára piibéle a pínɛ too ní be ní ŋɔséew báriga ni.

⁶ Yawe wi syɛ́ɛnri naa joo níì jo: Ezyipiti dɛ̀ɛmɛfɔbèle a too, wi nɛ̀ɛnyɛnɛgi fànʔa a too sánʔa. N séli Migidɔli na n sáà nan Syɛni na, pe a too ŋɔséew báriga ni, Kàfɔw Yawe wi jo nya.

⁷ Pe a kálagi tátɛɛyi nínge ni yi kálagi lè, wi kěyi a pye kataya, kěyee nínge ni yi nyɛ lè kataya.

⁸ Lǎli ni mii ga náagi le Ezyipiti na lè á wi dɛ̀ɛmɛfɔbèle myɛ tɔ́nʔɔnɔ, lǎli bee ni pe a gi cán bi cán mii wi nyɛ Yawe.

⁹ Cángi bee na n Etyopii yaʔa wodɛ́ɛɔn ní sági, mii a tundunbéle yirige pe kári bàtobéle ni bi sa wi fúugo waa cɛ̀lɛ́. Wɔʔɔgɔ a pye pe níngi ni Ezyipiti cángi na, níì cán ki i maa gee.›

¹⁰ Kàfɔw Yawe wi syɛ́ɛnri naa joo níì jo: ‹Mii a Babilɔni fànʔafɔw Nebukadinezari kɔ́gi tɛ́ʔɛ bi Ezyipiti syɛɛnnɛʔɛmi kwɔ́ɔ bi yirige yaà.

¹¹ Woro, n fàra wi syɛ́ɛnbèle na pe nyɛ ní wi ní lè, poro bele be tanʔa n sɔ̀lɔ syɛɛnfeleyi nínge ni lè, bele bee a kɔ́ri kári bi sa tári kálagi. Pe a be ŋɔséebèle kɔ́nɔgi Ezyipiti kánmi na, si tári nyìn kúbèle na.

¹² Mii a Niili lòfarami waʔa, mii a Ezyipiti tári le syɛɛnpeebéle kɔ́yɔ ni. Mii a nibɔɔnnɔ kɔ́yɔ tɛ́ʔɛ bi tári kálagi n fàra yáriri myɛ na di nyɛ di ni lè. Mii Yawe, mii wi gi joo.› »

¹³ Kàfɔw Yawe wi syɛ́ɛnri naa joo níì jo: «Mii a yasunyi kwɔ́ɔ bi yirige yaà, mii a jànvaa kolocɔlɔbèle láʔa yaà Nɔfi ni. Fànʔafɔbile a ní pye Ezyipiti tári ni í, mii a fyáari cáan Ezyipiti tári na,

¹⁴ Mii a Paturɔsi kálagi, mii a naà le Sowan na, mii a kútii kèlē kpéʔele foro No na.

¹⁵ Mii a mii fundanʔagbɔɔri yàli Sɛn na ki lè Ezyipiti kènirigi, mii a No syɛɛnnɛʔɛmi kwɔ́ɔ bi yirige yaà.

¹⁶ Mii a náagi le Ezyipiti na. Sɛn a ra cɛ̀lɛ́, weʔe a kúun No na bi wi múgu yaʔa, nigoobèle a Nɔfi jáa cânvulɛɛlɛ na.

¹⁷ Ŋɔséew a Ɔn ní Pi-Bezɛti nìgɔcaribèle kpóo cáan, kěyi bee si kári púlori na.

¹⁸ Cángi a kàri yébilimɛ Takipanɛsi ni, lǎli ni mii ga Ezyipiti zúubèle kabagi yaà lè, á wi nɛ̀ɛnyɛnɛgi fànʔa kwɔ́ɔ. Fàfanʔa a Takipanɛsi tɔ́n, wi wóbèle si kári púlori na.

¹⁹ Mii a kútii kèlē kpéʔele foro Ezyipiti na, pe a gi cán bi cán mii wi nyɛ Yawe.»

Babilɔni fànʔafɔw i nyɛ Kolocɔlɔɔ falipye-yariga

²⁰ Yɛ̀ʔɛlɛ kɛɛ ní nibin wóli yezelige canya kɔrɔsiin wóʔo na, a Yawe syɛ́ɛnri nan mii na, wi n jo:

²¹ «Syɔɔn-pya, mii n Faraɔnw kɔ́lɔ kabi, Ezyipiti fànʔafɔw. Wi wéle, kpàligi ga pwɔɔ wi na jàngó bi wi pɔʔɔ í, namipwɔɔ-fàni ga taʔa gi na bi gi cò yérige jàngó ki gbǎn ra kpúmɔn ní ŋɔsée ní í.

²² Gee bee na Kàfɔw Yawe syɛ́ɛnri naa joo níì jo: ‹Wéle, mii a keele tɛ́ʔɛ Faraɔnw na, Ezyipiti fànʔafɔw. Mii a kɔ́yi kabagi wi na, gee gi nyɛ lè wojanga ní, ní gee gi kabi lè si ŋɔséew yirige wi kɔ́gi ni bi cáan.

²³ Mii a Ezyipiti ye cariga bi màʔa syɛɛnfeleyi nínge ni, mii a be cariga bi lége tátɛɛyɛ saʔa ni.

²⁴ Mii a fànʔa le Babilɔni fànʔafɔw kɔ́yɔ ni, si mii ŋɔséew le wi kɔ́gi ni. Mii a Faraɔnw kɔ́yɔ kabagi, wi a ra cɛ́ɛn wi yɛʔɛ̀ ma àmɛɛ wàa nyɛ, wee wi nyɛ kúkoliw na lè.

²⁵ Mii a fànʔa le Babilɔni fànʔafɔw kɔ́yɔ ni, Faraɔnw kɔ́yɔ si pe bi too yílɛ. Pe a gi cán bi cán mii wi nyɛ Yawe, lǎli ni mii ga mii ŋɔséew le lè Babilɔni fànʔafɔw kɔ́yɔ ni, á wi wi yìrige Ezyipiti tári kánma na.

²⁶ Mii a Ezyipiti ye cariga bi màʔa syɛɛnfeleyi nínge ni, mii a be cariga bi lége tátɛɛyɛ saʔa ni, pe a gi cán bi cán mii wi nyɛ Yawe.› »