Ezekyɛli 3 - Cebaara Bible 2010

¹ A wi mii pye: «Syɔɔn-pya, gee mɔ taa lè, gi káa. Sɛ́bɛmigiw naa káa, mí kári mi sa joo ní Isirayɛli kpáagi wòolo ní.»

² A mii nyɔ́ɔgi múgu, a wi mii pye mii í sɛ́bɛmigiw bee káa.

³ Wi n mii pye: «Syɔɔn-pya, mɔ fícɛnni kaan lìile na, mɔ láagi nyìn sɛ́bɛmigiw naa na mii kaangi lè wee mɔ ma.» A mii wi káa, a wi tɛ́nɛ mii nyɔ́ɔgi na àmɛɛ sárigā nyɛ lè.

⁴ A wi mii pye: «Syɔɔn-pya, da syée Isirayɛli kpáagi wòolo ma mi sa mii syɛ́ɛnri joo be ma!

⁵ Níì cán syɛɛnfelegaa má ban mii mɔ tun, gee syɛ́ɛnrɛ di nyɛ lè syɛɛnnibɔnrɔ, dee di cánma bɛɛn lè í. Isirayɛli kpáagi wòolo má mii mɔ tun.

⁶ Syɛɛnfele-nɛʔɛyɛ má ban í, yee syɛ́ɛnrɛ di nyɛ lè syɛɛnnibɔnrɔ, dee di cánma bɛɛn lè í, yee yi lè mɔ o yi syɛ́ɛnri lúro í. Ki si ga maa caà pye yoro má mii mɔ tun, yi mǎà dée lóʔo mɔ ma.

⁷ Kàjáa Isirayɛli kpáagi wòolo a ra caa bi lóʔo mɔ ma í, ncan pe o caa bi lóʔo mii ma í. Níì cán Isirayɛli kpáagi wòolo myɛ nyúnyo n waʔa, a be zɔ̌nbèle gbàn.

⁸ Wéle, mii n mɔ yɛ́ɛgi waʔa jàngó gi pye be wóyi kánma na, n mɔ nyúngi waʔa jàngó gi pye be wóyi kánma na.

⁹ Mii a mɔ nyúngi waʔa gi pye àmɛɛ jaman nyɛ lè, ki nìri bi sɔ̀lɔ fálaga na. Mɔ a kɔ́ ra fɛ̀ɛgí be na í. Zɔ̀nviige a kɔ́ ra mɔ kɔɔn be yɛʔɛ̀ ma í. Níì cán niceebéle narigbaʔa gii.»

¹⁰ A wi níì mii pye: «Syɔɔn-pya, syɛ́ɛnree myɛ mii a joo mɔ ma lè, ki n yɛlɛ mi fɔ̀lɔ di na mɔ fúngi ni, mí di sámaga mi lóʔo mɔ líiweegèle ni.

¹¹ Kári wojo-mí-káribèle ma, pe lè mɔ syɛ́ɛnbèle pìibēle. Mɔ a sa joo be ma, a be lóʔo yoo, a pe náà pye pe ga fɔ̀lɔ n gi kpéʔele í yoo, mɔ a be pye: ‹Kàfɔw Yawe wi jo nya.› »

¹² A Pǐli mii láa n yìrige, a mii kàfulogbɔʔɔ lóʔo niyɛɛ kàdoʔo ma a gi jo: «Kpɔ́ʔɔri n yɛlɛ bàā taari Yawe nìjangbɔɔri na, wi tɛɛkòrogi ni.»

¹³ A mii yaweeyi fókaanya tìnmɛ lóʔo, a yi i kpúmɔn yiyɛɛ na, ní sàkoyi tìnmɛ, yi taana, ní kàfulogbɔʔɔ tinmɛ.

¹⁴ A Pǐli mii láa n yìrige, níì kári ní mii ní. A mii i syée, á mii fúngi tanʔa níì tɔ̀nɔ n yìri gbanʔama, Yawe kɔ́gi si maa ni báara mii na ní séekpɔɔɔ ní.

¹⁵ A mii sáà nan Tɛli-Aviivi na wojo-mí-káribèle tɛ́ʔɛ na, pe pye lè wodɛ́ɛnbéle ní Kebaari cábigi nyɔ́ɔ na, ní tɛ́ɛgee ni pe da pye lè wodɛ́ɛnbéle ní. A mii tɛ́ɛn canya kɔrɔsiin pe níngi ni wovɔrɔɔ ní gbanʔama.

Ezekyɛli a pye kɔ̀rɔsiifɔlɔ Isirayɛli ye ma

¹⁶ Cányi kɔrɔsiin kwɔ́ɔmɔ na, a Yawe syɛ́ɛnri nan mii na, wi n jo:

¹⁷ «Syɔɔn-pya, mii n mɔ télege kpaàweleo Isirayɛli kpáagi wòolo nyúngo na. Syɛ́ɛnri di yirigi mii nyɔ́ɔgi ni lè, ti lóʔo mí be sàmi mii ma.

¹⁸ Mii ga gi joo syɛɛnpeew ma níì wi pye: ‹Mɔ a tɔ̀nɔ́ kùu wii.› Mɔ ga pye mɔ ga wi sàmi í, mɔ ga pye mɔ ga joo n syɛɛnpeew sàmi wi láʔa wi kobeegi na, jàngó bi wi sìíw syɔɔ í, syɛɛnpeew bee a kùu wi sìnzinmi ni, mii si a mɔ yíbe wi sìsyaanw kéele na.

¹⁹ Kàjáa mɔ ga syɛɛnpeew sàmi, wi si ga fɔ̀lɔ n láʔa wi péemi ní wi kobeegi na í, wi a kùu wi sìnzinmi ni, mɔ si na, mɔ a mɔ siiw syɔɔ.

²⁰ Syɛɛnsiɔn ga láʔa wi sínni na, ní i kakoloyi kpéʔele, mii a karinyanga le wi yɛʔɛ̀ ma, wi a kùu. Mɔ ga pye mɔ ga wi sàmi í, wi a kùu wi kapeeli ni. Pe a ní sɔ̀ngi bi taa wi sínni kapyegèlē na wi kpéʔele lè í, mii si a mɔ yíbe wi sìsyaanw kéele na.

²¹ Kàjáa mɔ na, mɔ ga syɛɛnsinw sàmi jàngó wi a kɔ́ kapeele pye í, wi ga wɔ́ɔ̀ pye wi ga kapeele pye í, wi a pye sìi na, níì cán pe n wi sàmi, mɔ si na, mɔ a mɔ siiw syɔɔ.»

Kolocɔlɔɔ n Ezekyɛli kàriga boboo làlaa kánma ni

²² Nɛɛ bee Yawe kɔ́gi níì pye mii na, a wi mii pye: «Yìri mi yiri mi sa jée jǐnlɔgi ni, mii a joo yaà beè ní mɔ ní.»

²³ A mii yìri n yiri n sáà jée jǐnlɔgi ni. Wéle, Yawe nìjangbɔɔri maa pye yaà àmɛɛ mii da di nyaa Kebaari cábigi nyɔ́ɔ na lè. Lǎli bee ni a mii too n yɛ́ɛgi cíbele tári na.

²⁴ A Pǐli jée mii ni n mii yérige mii tɔ́lɔyi na. A Yawe joo ní mii ní, níì mii pye: «Da syée mi sa jée mɔ kpáagi ni, mí gi tɔ́n mi wáa miyɛɛ na.

²⁵ Mɔ syɔɔn-pya, wéle, pe a mɛɛngéle le mɔ na, gele ní pe a mɔ pwɔɔ lè, mɔ a ní kɔ́ yiri pye be níngi ni í.

²⁶ Mii a mɔ nyínni táriga mɔ gbǎdanw na, jàngó mɔ í pye boboo, koro ga pye mɔ a ní kɔ́ gbǎn fúlo be na í. Níì cán niceebéle narigbaʔa gii.

²⁷ Kàjáa lǎli ni mii ga joo ní mɔ ní lè, mii a mɔ nyɔ́ɔgi múgu jàngó mɔ í gi joo be ma si jo: ‹Kàfɔw Yawe wi syɛ́ɛnri naa joo.› Wee wi ga ni jà lóʔo lè, wi lóʔo, wee si ga pye lè wi a fɔ̀lɔ́ gi kpéʔele í, wi a kɔ́ gi kpéʔele í, níì cán niceebéle narigbaʔa gii.