Ezekyɛli 29 - Cebaara Bible 2010

Joogbanna Ezyipiti kánmi na

¹ Yɛ̀ʔɛlɛ kɛɛ wóli, yeye kɛɛ wógi, ki cányi kɛɛ ní siin wóʔo na, a Yawe syɛ́ɛnri nan mii na, wi n jo:

² «Syɔɔn-pya, mɔ yɛ́ɛgi wáa Faraɔnw kàbaan na, Ezyipiti fànʔafɔw kàbaan na, mí kérigèle nyaa mi joo wi kánmi na, ní Ezyipiti myɛw kánma na.

³ Da nyuu! Ki joo mí jo: ‹Kàfɔw Yawe wi syɛ́ɛnri naa joo níì jo: Wéle, mɔ ní mii cáan, Faraɔn, Ezyipiti fànʔafɔw. Wócɔɔngbɔʔɔ, mɔ wee wi sìnɛ́ mɔ cábiyi nínge ni lè, ní i gi nyuu níì jo: Mii Niiliw i nyɛ mii wóo, mii wi niyɛɛ gbéʔele!

⁴ Mii a mɛ̀ʔɛgboloyo le mɔ kpacɔʔɔlɔyi na, si mɔ cábiyi fàala táriga mɔ kagɔriri na, si mɔ kíle bi yirige mɔ cábiyi ni, ní mɔ cábiyi fàala myɛ ní, pe a pye wodarabéle ní mɔ kagɔriri na lè.

⁵ Mii a mɔ wáa fìími tára ni, mɔ ní mɔ cábiyi fàala myɛ ní. Mɔ a sa too yaà sefii-tári ni, pe a mɔ jóo í, wàlá bi mɔ tɔ́n í. Mii a mɔ kpéʔele kaara tári yaweere, ní nyɛ̀ʔɛni féjɛɛnrɛ ma.

⁶ Ezyipiti wóbèle myɛ a gi cán bi cán mii wi nyɛ Yawe, níì cán pe dɛ̀ɛmɛni maa pye Isirayɛli kpáagi wòolo ma àmɛɛ gbàlɔɔ̀ kàgaanna nyɛ lè.

⁷ Lǎli ni pe mɔ cò kɔ́yi ni lè, a mɔ kabi n láʔa, a mɔ be fókaannyunyi myɛ sulugu. Lǎli ni pe peyɛɛ zígi mɔ na lè, a mɔ kabi, a mɔ be sárigèle ceri.

⁸ Gee bee na Kàfɔw Yawe, syɛ́ɛnri naa joo níì jo: Wéle, mii a ŋɔséew yaʔa wi pan mɔ kurugo bi ba syɛ́ɛnbèle ní yaweeri kwɔ́ɔ bi yirige mɔ níngi ni.

⁹ Ezyipiti tári a ba kàri tɛɛ̀kalagiga, ní gurubɛɛrɛ, pe a gi cán bi cán mii wi nyɛ Yawe, níì cán wi n jo: Niiliw i nyɛ mii wóo, mii wi wi kpéʔele.

¹⁰ Koro na, wéle, mii a keele tɛ́ʔɛ mɔ ní mɔ cábiyi na, mii a Ezyipiti tári pye tɛɛ̀kalagiga, ti a kálagi bi pye gurubɛɛrɛ bi séli Migidɔli na bi sa nan Syɛni na, Etyopii láʔagoloyi na.

¹¹ Syɔɔn tɔ́lɔgɔ a ní sɔ̀lɔ yaà í, yaweele tɔ́lɔgɔ a ní sɔ̀lɔ yaà í, ti a kòro nya yɛ̀ʔɛlɛ togoye siin, syɔɔn a tɛ́ɛn di ni í.

¹² Mii a Ezyipiti tári pye tɛɛ̀kalagiga tátɛɛyee nínge ni yi kálagi lè, di kěyi a kálagi kěyee nínge ni yi nyɛ lè kataya, bi taa yɛ̀ʔɛlɛ togoye siin. Mii a Ezyipiti ye cariga bi lége syɛɛnfeleyi nínge ni, mii a be cariga bi tórigo tátɛɛyɛ saʔa ma.

¹³ Kàfɔw Yawe wi syɛ́ɛnri naa joo níì jo: Yɛ̀ʔɛlɛ togoye siin ga kwɔ́ɔ, mii a Ezyipiti ye yirige yaà syɛɛnfeleyi nínge ni, beè pe a cariga bi fala lè, bi be kpóʔoro.

¹⁴ Ezyipiti wóbèle be cò n kári lè mii a be lúrugo pan, mii a be yaʔa pe lúru ba tɛ́ɛn Paturɔsi tári ni, pe ba tɛ́ɛn pe táseeri ni, nɛɛ bee pe a foomɔ fànʔa télege.

¹⁵ Ki a pye foomɔ wóʔo ní bi sɔ̀lɔ fǎnyi myɛ na, ki a ní tée yìri bi pye syɛɛnfeleyi nyúngo na í, mii a be cɛ́rɛ koro ga pye pe a ní kɔ́ tɛ́ɛn syɛɛnfeleyi nyúngo na í.

¹⁶ Ki a ní pye Isirayɛli kpáagi wòolo ma tágala yáriga í, pe ní sɔ̀ngí taa be kolomi kéele na be kpéʔele lè àmɛɛ pe da wàli n fala Ezyipiti ye ma lè í, pe a gi cán bi cán mii wi nyɛ Kàfɔw Yawe.› »

Fànʔafɔw Nebukadinezari a Ezyipiti jáa

¹⁷ Yɛ̀ʔɛlɛ toko ní kɔrɔsiin wóli, yezeligi cânzelige na, a Yawe syɛ́ɛnri nan mii na, wi n jo:

¹⁸ «Syɔɔn-pya, Nebukadinezari wi lè Babilɔni fànʔafɔw, wi n wi kapɛɛnkpumɔnbèle wáa faligbaɔn na Tiiri kánmi na. Nyǔnyi myɛ n folo, fókaannyunyi myɛ n fórogi, wi si ga tɔ̀nɔ faala taa Tiiri ni í, woro yoo, wi kapɛɛnkpumɔnbèle yoo, fáliw kéele na wi kpéʔele wi kánmi na lè.

¹⁹ Gee bee na Kàfɔw Yawe, syɛ́ɛnri naa joo níì jo: Wéle, mii a Ezyipiti tári kaan Nebukadinezari ma wi lè Babilɔni fànʔafɔw. Wi a di lɔ́ri koli bi kári, wi a di sámaga fuguri, wi a wi kapɛɛnni yataara láa, gee bee a pye wi kapɛɛnkpumɔnbèle sàra.

²⁰ Sàraw mii a kaan wi ma fáliw kéele na wi a kpéʔele lè, woro wi nyɛ, mii a Ezyipiti tári kaan wi ma. Níì cán wi nǎnbèle n báara mii ma, Kàfɔw Yawe wi jo nya.

²¹ Cángi bee na, mii a kàa fàra Isirayɛli kpáagi wòolo fanʔa na, si mɔ nyɔ́ɔgi múgu pe níngi ni. Pe a gi cán bi cán mii wi nyɛ Yawe.»