Ezekyɛli 28 - Cebaara Bible 2010

Joogbanna Tiiri fànʔafɔw kánma na

¹ Yawe syɛ́ɛnri n nan mii na, wi n jo:

² «Syɔɔn-pya, ki joo Tiiri fànʔafɔw ma mí jo: ‹Kàfɔw Yawe wi syɛ́ɛnri naa joo níì jo: Kpɔɔmɔ n baa jée mɔ fúngi ni, a mɔ gi joo níì jo: Mii i nyɛ Kolocɔlɔɔ, mii n tɛ́ɛn kolocɔlɔbèle kòlo na sólomi lòyo nínge ni! Bi gi taa mɔ na, mɔ i nyɛ syɔɔn, kolocɔlɔɔ ban mɔ nyɛ í, á mɔ si mɔ sɔnguri pye mɔ a jo Kolocɔlɔɔ wóri dii.

³ Wéle, mɔ n cìlige n sɔ̀lɔ Danyɛli na, kalaralaa faala o nyɛ yébilimɛ mɔ ma í.

⁴ Mɔ sícilimi ní mɔ cánni báriga ni mɔ n lɔrɔ caa n taa miyɛɛ ma, mɔ n tɛɛ̀ ní wálifiio taa n kpóʔoro mɔ lɔ́ri tɛɛkɔnyɔ ni.

⁵ Amɛɛ mɔ jàgiw cán lè gbanʔama, a mɔ kàa fàra mɔ lɔ́ri na, mɔ lɔ́ri báriga ni, a kpɔɔmɔ jée mɔ fúngi ni.

⁶ Gee bee na Kàfɔw Yawe syɛ́ɛnri naa joo níì jo: Amɛɛ mɔ mɔ sɔnguri córo lè mɔ a jo Kolocɔlɔɔ wóri dii,

⁷ wéle, mii a nibɔɔnnɔ kɔ́ri wáa mɔ na, bele be tanʔa syɛɛnfeleyi nínge ni n sɔ̀lɔ lè. Pe a be ŋɔséebèle kɔ́nɔgi mɔ sícilijǎngi kánma na. Pe a mɔ nijanri darigala nɔ́nʔɔ.

⁸ Pe a mɔ ŋɔrigɔ tìrige weecurugi ni, mɔ a kùu wozuu-gbóobéle kuuganma na sólomi lòyo nínge ni.

⁹ A mɔ a ní gi joo lé mɔ kpóofɔw yɛ́ʔɛ ma si jo: Mii i nyɛ kolocɔlɔɔ? Mɔ a kòro syɔɔn mɔ kpóofɔw kɔ́lɔ láara ni, mɔ a tée pye kolocɔlɔɔ í.

¹⁰ Mɔ a kùu sìngɛ́nɛbéle kuuganma na nibɔɔnnɔ kɔ́yɔ báriga ni. Níì cán mii wi joo, Kàfɔw Yawe wi jo nya.› »

¹¹ Yawe syɛ́ɛnri n nan mii na, wi n jo:

¹² «Syɔɔn-pya, ki n yɛlɛ mi funbɛɛnrɛ ŋúnugo ŋùu Tiiri fànʔafɔw kéele na! Mɔ a gi joo wi ma si jo: ‹Kàfɔw Yawe wi syɛ́ɛnri naa joo níì jo: Mɔ maa pye fɛ̀ɛ tɛɛlɛfunmi kàbaan na, mɔ maa nyìn sícilimi na, níì nyɔɔ n foro.

¹³ Mɔ maa pye Edɛn ni, wi lè Kolocɔlɔɔ nángwɔɔw. Lɔgbanri kàdɛɛngèlē féleye myɛ maa mɔ tɔ́n, ke lè wurubii, ní topazi, ní jaman, ní kirizoliiti, ní onikisi, ní zyasipi, ní safiiri, ní ɛsikaribukili, ní emerodi, ní tɛ́ɛw. Mɔ tamabèle ní mɔ máagèle maa pye mɔ fáliw na, toro maa sámaga yaà mɔ ma nlaa yaà mɔ cângbeʔelegi na.

¹⁴ Mɔ maa pye kpaàwele-syerubɛɔn, wee fókaanya yi sánʔa n yaʔa lè. Mii maa mɔ télege a mɔ pye Kolocɔlɔɔ nyanbejǎngi na. Mɔ maa ni nyaari ni máari naagbanga kàdɛnɛrɛ nínge ni.

¹⁵ Mɔ tánʔaganmi maa nyɔɔ n foro nlaa mɔ faan lè, fwɔɔ n taa n baa nan cángi na, gee ni sìnzinmɛ nyaa mɔ ni lè.

¹⁶ Mɔ jagiw kpɔ́ʔɔlɔ báriga ni mɔ baa nyìn péemi na, a mɔ kapeele pye. Mii n mɔ ŋɔrigɔ n láʔa yaà Kolocɔlɔɔ nyanbelegi na, kpaàwele-syerubɛnw, mii n mɔ kwɔ́ɔ n yirige yaà naagbangi kàdɛnɛrɛ nínge ni.

¹⁷ Kpɔɔmɔ n baa jée mɔ fúngi ni, mɔ nijanri kéele na, mɔ n mɔ sícilimi kálagi mɔ darigali báriga ni. Mii n mɔ tìrige n cáan tári na, mii n mɔ kpéʔele yawelege fànʔafɔbèle ma.

¹⁸ Mɔ n mɔ tɛɛcǎnyi kálagi mɔ kolomi kèlē nɛʔɛnɛ báriga ni, ní mɔ jagiwáari sìnzinmɛ báriga ni. Mii n naà yaʔa a gi yiri mɔ níngi ni bi mɔ lìi. Mii n mɔ kàriga cɔnʔɔ tári na, bele myɛ nyɛ́nɛ na pe mɔ wéle lè.

¹⁹ Bele myɛ pe mɔ cán syɛɛnfeleyi nínge ni lè, pe fúnyi n curugo mɔ kéeli na. Mɔ a pye fyáara yáriga, mɔ a ní tée pye yafyɛn í.› »

Joogbanna Siidɔn ye kánmi na

²⁰ Yawe syɛ́ɛnri n nan mii na, wi n jo:

²¹ «Syɔɔn-pya, mɔ yɛ́ɛgi wáa Siidɔn kàbangi na, mí kérigèle nyaa mi joo wi kánmi na.

²² Mɔ a gi joo si jo: ‹Kàfɔw Yawe wi syɛ́ɛnri naa joo níì jo: Wéle, mɔ ní mii cáan, Siidɔn! Mii a kpɔʔɔrɔ taa mɔ níngi ni. Lǎli ni mii ga baa kútiiw kèlē kpéʔele n foro wi na lè, pe a gi cán bi cán mii wi nyɛ Yawe. Mii a pye wojaɔn ní wi níngi ni.

²³ Mii a káfalagi yáama tórigo yaà, si sìsyaanw yaʔa waa ŋuu wi kàlari-kóloyi ni. Woguubèle a too wi níngi ni ŋɔséew báriga ni, wee wi a yìri kàbanyi myɛ na bi tórigo wi kánmi na lè, pe a gi cán bi cán mii wi nyɛ Yawe.

Isirayɛli a tɛ́ɛn yɛɛ̀nyinge na sági

²⁴ « ‹Kánmi bee na wúugo a ní pye Isirayɛli kpáagi wòolo na bàā be síbele í, wàlá wúuro tiipiige bàā be sulugu, bele myɛ nínge ni pe be màʔa ní i be faari lè í, lǎli bee ni pe a gi cán bi cán mii wi nyɛ Kàfɔw Yawe.› »

²⁵ Kàfɔw Yawe wi syɛ́ɛnri naa joo níì jo: «Lǎli ni mii ga Isirayɛli kpáagi wòolo cɔɔnri n yirige yaà lè syɛɛnfeleyi nínge ni, beè be cariga n lége lè, mii a niyɛɛ dɛ̀ɛn wojaɔn ní syɛɛnfeleyi na pe bárigaw ni, pe a ba tɛ́ɛn be tásaligi na, gee mii kaan mii falipyew Zyakɔbi ma lè.

²⁶ Pe a tɛ́ɛn yaà yɛɛ̀nyinge na sági, pe a kpaaya faan, si wɔ́ɔ ɛrɛzɛn tírire cɔ́rɔ. Pe a tɛ́ɛn di ni yɛɛ̀nyinge na sági, lǎli ni mii ga kútiiw kèlē kpéʔele n foro bele myɛ na pe be màʔa lè ní i be faari. Pe a gi cán bi cán mii wi nyɛ Yawe poro Kolocɔlɔw.»