Ezekyɛli 27 - Cebaara Bible 2010

Funbɛɛnrɛ ŋúnugo Tiiri kálagili kéele na

¹ Yawe syɛ́ɛnri n nan mii na, wi n jo:

² «Mɔ, syɔɔn-pya, ki n yɛlɛ mi funbɛɛnrɛ ŋúnugo ŋùu Tiiri kéeli na!

³ Mɔ a gi joo Tiiri ma wi nyɛ lè wodɛ́ɛɔn ní sólomi lɔ̀ʔɔ lógbê na, ní i nyɛ syɛɛnfeleyi jàgiwáacaa, woro wee wi kári lè lǒgi nínge tátɛɛgéle saʔa ma, si wi pye Kàfɔw Yawe wi syɛ́ɛnri naa joo níì jo: ‹Ee Tiiri, mɔ maa ni gi nyuu níì jo: Mii n tɔ̀nɔ n nyɔɔ n foro.

⁴ Mɔ láʔagologi i nyɛ sólomi lòyo nínge ni. Bele be mɔ faan lè, pe n mɔ kpéʔele a mɔ nyɔɔ n foro.

⁵ Ní Seniiri siipirɛ tíire ní pe mɔ kagomi myɛ tɔ́n. Liban sɛdiri tíigaa be cɛnɛ bi pye mɔ bato fàniyi tíige.

⁶ Pe n mɔ kɔrɔbiniyi sámaga ní Basyan syɛni tíiye ní, n mɔ yatɛnɛyi sámaga ní Asirii sogànʔana ní, gele ní be yìri Kitiimi lǒgi nínge tátɛɛgéle ma n pan lè.

⁷ Ezyipiti lɛn fàni fɛɛlɛfɛɛlɛw be súu lè, woro wi pye mɔ nyundɔn-fànibèle, ní mɔ káfaliw. Fàninyɛɛn-súruyi ní fàninyɛɛnw wi yìri Elisya lǒgi nínge tátɛɛgéle ma lè, woro wi pye mɔ fanikpaayi fàniya.

⁸ Siidɔn ye ní Arivadi ye be pye mɔ batofanbèle, bele si be pye lè kacandelebèle mɔ níngi ni, ee Tiiri, poro be pye mɔ batow falipyebèlē.

⁹ Gebali wolɛɛbèle ní wi kacánbèle n pye yaà mɔ ma n pye mɔ batobèle tɛɛ̀kalagiya sámagafɔɔlɔ. Sólomi lɔ̀ʔɔ bàtobéle myɛ, ní be fànvɔbèle n pye yaà mɔ ma, bàā mɔ jagiw yárira fɛ̀ɛ́.

¹⁰ Pɛrisi wóbèle, ní Ludi wóbèle, ní Puti wóbèle n pye ni báara ní mɔ kapɛɛnkpumɔnbèle ní, mɔ kapɛɛnkpumɔn-nànbēle be pye. Pe maa ni be tunmɔzige-yáriyi, ní túnmɔri nyùndɔnyɔ cɔ̀rɔ́ yaà mɔ ni. Pe maa ni nìjanra taari mɔ na.

¹¹ Arivadi ye, ní mɔ kapɛɛnkpumɔnbèle maa mɔ tobèle màʔa n kpàra, kpaàwelebéle maa pye mɔ tɛɛniriyi ni. Pe maa ni be tunmɔzige-yapiigèle cɔ̀rɔ́ ni mɔ tobèle máari, pe maa ni mɔ nijanri kpéʔele ti i nyɔ́ɔgi ni forogi.

Tiiri wi lè jàgiwáa-kèkpɔɔgi

¹² « ‹Tarisiisi wóbèle maa pínɛ ni jàgiw wáa ní mɔ ní, yacanri myɛ kéele na ti pye yaà lè mɔ ma saʔa. Pe maa ni syée mɔ ma ní wálifiiw, ní túnmɔri, ní kafiiri, ní tunmɔgbanri ní.

¹³ Yavan ye, ní Tubali ye, ní Mesyɛki ye maa bɛ̀ɛ jàgiwáari na ní mɔ ní. Pe maa ni púlobèle, ní kanyɛɛnri yárira fɛ̀ɛ́ mɔ jagi-yáriri na.

¹⁴ Togarima kpáagi wòolo maa ni syée n sa ni syɔ́ɔnyi, ní kàfyaali syɔ́ɔnyɔ, ní jòfanikàriyi pára mɔ ma.

¹⁵ Dedan yòdaʔayi maa bɛ̀ɛ jàgiwáari na ní mɔ ní. Lǒgi nínge tátɛɛgéle saʔa jagi-yárira maa ni sɔ̀lɔ́ mɔ kɔ́yi ni. Sogànʔana nyɛ́ngéle, ní ebɛni tiire pe da ni téeri ni mɔ yáriri sàrá.

¹⁶ Edɔmi ye maa bɛ̀ɛ jàgiwáari na ní mɔ ní, mɔ yanɛʔɛri kéele na. Pe maa ni ɛsikaribukili ní fàninyɛɛn-súruw, ní fànisuuw, ní lɛn fàniw, ní korayi, ní wurubii pára mɔ ma.

¹⁷ Zyuda ní Isirayɛli tári maa bɛ̀ɛ jàgiwáari na ní mɔ ní. Pe maa ni syée ní Miniti bilew ní, n fàra súgèle, ní sárigi, ní sǐnmi, ní céyaa-sǐnmi na.

¹⁸ Damasi ye maa bɛ̀ɛ jàgiwáari na ní mɔ ní, mɔ yanɛʔɛri kéele na ti da ni sámagi mɔ ni lè, yacanri myɛ kéele na ti pye mɔ ni lè saʔa. Pe maa ni Ɛlibɔn dùvɛɛnw ní bàsiifiiri fɛ̀ɛ́ mɔ yáriri na.

¹⁹ Vedan ní Yavan, n séli yaà Uzali ma, poro maa ni maa ní yapárari ní mɔ cɛ́nɛyi ma. Toro di nyɛ túnmɔri pe báara lè, n fàra kasi tíiri, ní nùndaanni nyɛ́nɛrɛ na, n ba ni pára mɔ ma.

²⁰ Dedan ye maa bɛ̀ɛ ní mɔ ní syɔɔnkòrigèle fàni jàgiwáara na.

²¹ Arabii ye, ní Kedaari fànʔafɔbiigèle myɛ maa pye mɔ yasyɔɔbèlē. Bàpiigèle, ní bàpɔbèle, ní sikepɔbèle pe da ni téeri ni syɔɔli kpéʔele.

²² Saba, ní Arayema jàgiwáabèle maa bɛ̀ɛ be jàgiwáari na ní mɔ ní. Pe maa ni nùndaanni yárira myɛ pára mɔ ma, dee di nyɔɔ n sɔ̀lɔ lè, n fàra lɔgbanri kàdɛɛngèlē féleye myɛ, ní tɛ́ɛw na.

²³ Haran, ní Kane, ní Edɛn, ní Saba, ní Asirii, ní Kiilimadi jàgiwáabèle maa bɛ̀ɛ be jàgiwáari na ní mɔ ní.

²⁴ Pe maa bɛ̀ɛ yacandeleri jàgiwáara na ní mɔ ní ti lè fàninyɛɛn-súruw búrogboloyo, yi lè wozuuyi, ní feleye saʔa fanimiimɛ, ní mɛ́ɛngèle be sámaga n tìin níì ge mígi keyɛɛ na lè, koro n pye mɔ jagiw kéele na.

²⁵ Tarisiisi bàtobèle maa ni mɔ jagi-yáriri tugu. Lɔnɛʔɛri, ní nìjanri maa mɔ nyìn sólomi lòyo nínge ni.

²⁶ Mɔ batofanbèle n curugo n màʔa ní mɔ ní lòkpoloyi ǹjoyo ni, canʔafolomɔ káfalagi n mɔ tɔ́nʔɔnɔ sólomi lòyo nínge ni.

²⁷ Mɔ lɔ́ri, ní mɔ cɛ́nɛyi, ní mɔ jagi-yáriri, ní mɔ batow falipyebèlē, ní mɔ batofanbèle, ní mɔ batosamagabèle, ní bele be pínɛ ní mɔ ní jàgi na lè, ní kapɛɛnkpumɔn-nǎnbèle myɛ be yaà mɔ ma lè, ní syɛɛnkpoʔolomi ní bi yaà mɔ níngi ni lè, pe a too sólomi lòyo nínge ni, mɔ candoogi na.

²⁸ Sólomi lòyo nyɔ́ɔ a ra cɛ̀lɛ́ mɔ batow falipyebèlē wɔʔɔgɔ supiiwáara kéele na.

²⁹ Bele myɛ si be bàtobèle fé lè, pe a tìgi pe bàtobèle na. Bàtow falipyebèlē, ní sólomi lɔ̀ʔɔ bàtofanbēle myɛ a sa yiri bi yére tári na.

³⁰ Pe a gi yaʔa poro yákpogèle í da lúro mɔ kéeli na, sáā yákpobɛɛnyɛ wáa. Pe a ra támiigi koli bàā wáa peyɛɛ nyúnyi ni, sáā kòlogí cɔ́ɔngi ni.

³¹ Pe a nyǔnyi kùnu mɔ kéeli na. Pe a gɔ̀nvaʔaya le buroyo, sáā nyaan mɔ kéeli na pe funbɛɛnri báriga ni ti lè kùu káyaagi funbɛɛnrɛ.

³² N be yaʔa be kùu káyaagi na, pe a funbɛɛnrɛ ŋúnugo ŋùu mɔ kéeli na, pe a ra nyaan bàā peele mɔ kéeli na si jo: Wìí wi da pye àmɛɛ Tiiri nyɛ lè, àmɛɛ kěgi naa nyɛ, gee gi kálagi sólomi lɔ̀ʔɔ nínge ni lè?

³³ Lǎli ni mɔ da ni mɔ jagi-yáriri tugu ni yirigi sólomi lòyo ni lè mɔ maa ni syɛɛnfeleye saʔa tíngi yáriri na. Mɔ maa ni tári fànʔafɔɔlɔ kpéʔele lɔrɔfɔɔlɔ mɔ jagi-yáriri nɛʔɛnɛ báriga ni.

³⁴ Tɔ́ɔliw ni, mɔ wi tɔ́nʔɔnɔ wee lǒgi kùnguruyo báriga ni, sólomi lòyo nínge ni. Mɔ jagi-yáriri ní mɔ syɛ́ɛnmi n pínɛ n kòro ní mɔ ní lǒyi fúngo ni.

³⁵ Lǒgi nínge tátɛɛgéle woolo myɛ fúnyo n curugo mɔ kéeli na, fyáara n be fànʔafɔbèle cò, pe yɛ́ɛyi n wáa n kàri.

³⁶ Syɛɛnfeleyi jàgiwáabéle i féfeegèle wíi mɔ kéeli na. Níì cán mɔ n pye fyáara yáriga, mɔ a ní tée pye yafyɛn í!› »