Ezekyɛli 26 - Cebaara Bible 2010

Joogbanna Tiiri kánmi na

¹ Yɛ̀ʔɛlɛ kɛɛ ní nibin wóli yéʔe cânzelige na, a Yawe syɛ́ɛnri nan mii na, wi n jo:

² «Syɔɔn-pya, àmɛɛ Tiiri gi joo Zyerusalɛmi kéeli na lè níì jo: ‹Ɔnhɔ́ɔ̀n! Syɛɛnfeleyi kɔ̀rigɔ n tɔ́nʔɔnɔ. Ki i kàragí mii kàbangi na. Mii a niyɛɛ nyìn, ki i nyɛ tɛɛ̀kalagiga.›

³ Gee bee na Kàfɔw Yawe syɛ́ɛnri naa joo níì jo: ‹Wéle, mɔ ní mii cáan, Tiiri! Mii a syɛɛnfele-nɛʔɛyɛ kɔ́ri tórigo mɔ kurugo yi pye àmɛɛ sólomi lɔ̀ʔɔ gi kùnguruyi yìrigí lè.

⁴ Yi a Tiiri tǒbèle kálagi, yi a wi kpaataʔa-tɔ́nɔyi kpúmɔn cáan, mii si támiigi fàari. Mii a wi pye fálawaʔa fée.

⁵ Wi a pye sólomi lɔ̀ʔɔ ni, tɛɛgaa, gee ni pe a ra cɔ̀ɔ́bèle cɛ̀ɛ́ lè. Níì cán mii wi joo, Kàfɔw Yawe wi jo nya. Wi a pye syɛɛnfeleyi kaacòro.

⁶ Wi kěyi yi nyɛ lè sìnbirigi ni, pe a yee bee kálagi ní ŋɔsée ní. Pe a gi cán bi cán mii wi nyɛ Yawe.›

⁷ Níì cán Kàfɔw Yawe wi syɛ́ɛnri naa joo níì jo: ‹Wéle, mii wi Babilɔni fànʔafɔw Nebukadinezari yìrigí wee solomɔkulo ma wi lè fànʔafɔbèle fànʔafɔlɔ bi tórigo Tiiri kurugo, ní syɔɔnyɔ, ní kapɛɛnkpumɔn-wòtorobéle, ní syɔɔnfànbēle ní, n fàra syɛɛnkpoʔoromɔ ní syɛɛnnɛʔɛmɛ na.

⁸ Mɔ keyi yi nyɛ lè sìnbirigi ni, wi a yee bee kálagi ní ŋɔsée ní. Wi a bǒboliyo sámaga mɔ kánmi na, bi tɛɛ̀lúguyo yìrige mɔ kánmi na, si tunmɔzige-yariya yérige mɔ kánmi na.

⁹ Wi a wi tòjaa-mazinbèle kúruyo tórigo mɔ tobèle kánma na, si mɔ kpaataʔa-tɔ́nɔyi túgu cáan ní wi kàmayi ní.

¹⁰ Wi syɔ́ɔnyi nɛʔɛnɛ cíbige a mɔ tɔ́n. Mɔ tobèle a ra cɛ̀lɛ́ syɔɔnfanbèle tinmɛ ní kapɛɛnkpumɔn-wòtorobèle sàkoyo tìnmɛ báriga ni, lǎli ni pe a ra jǐn mɔ kpaanweegèle ni àmɛɛ be jǐn kàʔa ni, gee na be fànʔa taa lè.

¹¹ Wi a mɔ kalari-kóloyi myɛ tánʔana ní wi syɔ́ɔnyi fèriye ní, wi a mɔ syɛ́ɛnbèle kpóo ní ŋɔsée ní, mɔ gaangèle ge lè mɔ séew fɛ̀ɛ yáriga, koro si too tári na bi kabagi.

¹² Pe a mɔ lɔ́ri láa, pe a mɔ jagi yáriri fuguri bi láa àmɛɛ kapɛɛnnɛ yataara nyɛ lè, pe a mɔ tobèle kpúmɔn cáan, pe a mɔ kpaanidaanmayi cáan, si mɔ kadɛnɛyi ní mɔ tíiyi ní mɔ támiigi fàari bi wáa lǒyi nínge ni.

¹³ Mii a mɔ ŋúnuyi ŋùumɔ kàfulogo kwɔ́ɔ, syɔɔn a ní mɔ kɔríbèle kpúmɔnmɔ lóʔo í.

¹⁴ Mii a mɔ pye fálawaʔa fée. Mɔ a pye tɛɛgaa, gee ni pe a ra cɔ̀ɔ́bèle cɛ̀ɛ́ lè, mɔ a ní tée faan í. Níì cán mii Yawe wi joo, Kàfɔw Yawe wi jo nya.› »

¹⁵ Kàfɔw Yawe wi syɛ́ɛnri naa joo Tiiri ma, wi n jo: «Mɔ tooli kàfulogo kéele na, lǎli ni pe ga ni cɛ́ɛn, bele be nyɛ kúkoliw na lè, lǎli ni kpóogbɔɔli ga pye mɔ níngi ni lè, lǒgi nínge tátɛɛgéle o gáā cɛ̀lɛ́ ì?

¹⁶ Sólomi lɔ̀ʔɔ fànʔafɔbiigéle myɛ a tìgi ge fàngorigèle na, ke a ge burogboloyi wòlo, ke a ge burozuuyi yirige. Ke a keyɛɛ dɔ́n ní fyáakpɔɔrɔ ní, si tɛ́ɛn tári na, sáā cɛ̀lɛ́ sìnyére ni, ke fúnyi a curugo mɔ kéeli na.

¹⁷ Ke a ra funbɛɛnrɛ ŋúnugo ŋúu mɔ kéeli na si mɔ pye: Acaa! Mɔ wi kwɔ́ɔ wee gi ni, bele be sólomi lòyo fé ni forogi lè, mɔ ni pe da pye, mɔ mɛ́ɛkpɔʔɔ kaʔa, gee gi pye lè ní séekpɔɔɔ ní sólomi lɔ̀ʔɔ na, koro ní gi syɛ́ɛnbèle ki da be kaan pe i cɛ̀lɛ́, bele myɛ pe gi màʔa lè!

¹⁸ Tɔ́ɔliw ni lǒgi nínge tátɛɛgéle i cɛ̀lɛ́ mɔ candoogi na. Zɔ̀nviikɔnirɔ i nyɛ sólomi lɔ̀ʔɔ nínge tátɛɛgéle na mɔ kwɔ́ɔli kéele na.

¹⁹ Níì cán Kàfɔw Yawe wi syɛ́ɛnri naa joo níì jo: ‹Lǎlee ni mii a mɔ kàriga lè gurubɛɛrɛ kaʔa àmɛɛ syɛ̀ɛnnɛ fun keyi nyɛ lè, lǎli ni mii a weecurugi múgu wáa mɔ na lè, lòkpoloyi si mɔ tɔ́n,

²⁰ mii a mɔ pínɛ tìrige ní bele ní be tíri weecurugi ni lè booma syɛ́ɛnbèle kurugo, mii a mɔ télege táàma tátɛɛyi ni, yee yi bàngwɔɔ gurubɛɛrɛ wíri lè, ní bele ní be tíri weecurugi ni lè, jàngó syɔɔn a ní kɔ́ tɛ́ɛn mɔ ni í. Mii si nìjanri kɔn bi yaʔa niweebèle tára ma.

²¹ Mii a mɔ kpéʔele fyáara yáriga, mɔ a ní pye yafyɛn í. Pe a mɔ caa bi màʔa, syɔɔn a ní mɔ nyaa nyáana í, Kàfɔw Yawe wi jo nya.› »