Ezekyɛli 25 - Cebaara Bible 2010

Joogbanna Amɔn ye kánmi na

¹ Yawe syɛ́ɛnri n nan mii na, wi n jo:

² «Syɔɔn-pya, mɔ yɛ́ɛgi fíige Amɔn ye kàbangi na, mí kérigèle nyaa mi joo be kánmi na.

³ Mɔ a gi joo Amɔn ye ma si be pye: ‹Ki n yɛlɛ ye Kàfɔw Yawe syɛ́ɛnri lóʔo. Kàfɔw Yawe wi syɛ́ɛnri naa joo níì jo: Lǎli ni pe mii tɛɛcǎngi kálagi lè, ní lǎli ni be Isirayɛli tári kàriga wowaara ní lè, ní lǎli ni be Zyuda wóbèle cò n kári púlori na lè, yele maa jo: Ɔnhɔ́ɔ̀n!

⁴ Gee bee na, wéle, mii a canʔafolomɔ kabangi wòolo yaʔa paa mɔ kafalimi táanri. Pe a be bùguri kpúmɔn mɔ níngi ni, pe a be fànikpaayi kóri mɔ níngi ni. Poro pe a ra mɔ yasanri líi, poro pe a ra mɔ nɔ́nɔw gbo.

⁵ Mii a Araba kpéʔele fàlibaaya tɛɛ̀gboʔo, si Amɔn tári pye bàala tɛɛkòrogo. Yele a gi cán bi cán mii wi nyɛ Yawe.›

⁶ Níì cán Kàfɔw Yawe wi syɛ́ɛnri naa joo níì jo: ‹Amɛɛ mɔ kadaagèle kóri lè, ní wɔ́ɔ̀ yédaali súu tári na, ní wɔ́ɔ̀ fundaanra pye, á mɔ fúngi nyìn faʔari na Isirayɛli tári kéele na lè,

⁷ gee bee kéele na, wéle, mii a mii kɔ́gi sánʔa bi taʔa mɔ na, mii a mɔ kaan syɛɛnfeleyi ma kaacòro. Mii a mɔ kwɔ́ɔ bi yirige yaà syɛɛnfeleyi nínge ni, mii a mɔ kwɔ́ɔ tátɛɛyi ni, mii a mɔ kálagi. Mɔ a gi cán bi cán mii wi nyɛ Yawe.› »

Joogbanna Mowabi ye kánmi na

⁸ Kàfɔw Yawe wi syɛ́ɛnri naa joo níì jo: «Amɛɛ Mowabi ní Seyiiri gi joo lè níì jo: ‹Zyuda kpáagi wòolo wéle, pe i nyɛ àmɛɛ syɛɛnfeleyi myɛ nyɛ lè,›

⁹ gee bee kéele na, wéle, mii a Mowabi tásaligi múgu yaʔa, kěyi kàbaan ma, gee bee n jo wi kěyi yi nyɛ lè wi láʔagoloyi na, yi lè tári fèrere, yoro yi nyɛ Bɛti-Yesyimɔti, ní Baali-Meyɔn, ní Kiiriyatayimi.

¹⁰ Mii a di múgu yaʔa canʔafolomɔ wóbèle ma pe pan Amɔn ye kánmi na lè, mii a di kaan be ma di pye be worò jàngó Amɔn ye mɛ́ʔɛ a ní kɔ́ ra yiri syɛɛnfeleyi nínge ni í.

¹¹ Mii a kútiiw kèlē kpéʔele foro Mowabi ye na, pe a gi cán bi cán mii wi nyɛ Yawe.»

Joogbanna Edɔmi ye kánmi na

¹² Kàfɔw Yawe wi syɛ́ɛnri naa joo níì jo: «Gɔ̀lɔ́-wòlori Edɔmi ye kpéʔele Zyuda kpáagi wòolo na, n kolo àmɛɛ wi gɔ̀lɔw wòlo be na lè,

¹³ gee bee kéele na, Kàfɔw Yawe, syɛ́ɛnri naa joo níì jo: ‹Mii a mii kɔ́gi sánʔa bi taʔa Edɔmi ye na, mii a syɛ́ɛnbèle ní yaweeri kwɔ́ɔ yirige yaà, mii a di pye tɛɛ̀kalagiga bi séli Teman na fwɔɔ bi sa nan Dedan na. Ŋɔséew a be kpóo cáan.

¹⁴ Mii a mii syɛ́ɛnbèle Isirayɛli ye kɔ́gi tɛ́ʔɛ bi mii gɔ̀lɔ́w wòlo Edɔmi ye na. Pe a Edɔmi ye cò bi yɛlɛ ní mii fundanʔari, ní mii fundanʔagbɔɔri ní. Pe si a mii gɔ̀lɔ́-wòlori cán, Kàfɔw Yawe wi jo nya.› »

Joogbanna Filisitini ye kánmi na

¹⁵ Kàfɔw Yawe wi syɛ́ɛnri naa joo níì jo: «Amɛɛ Filisitini ye peyɛɛ le gɔ̀lɔ́-wòlori ni lè, ní àmɛɛ be gɔ̀lɔ́w wòlo ní faʔara ní lè, ní be fúnyi myɛ ní, bi kálagili kpéʔele ní bàngwɔɔ paraga ní lè,

¹⁶ gee bee kéele na, Kàfɔw Yawe n jo: ‹Wéle, mii a mii kɔ́gi sánʔa bi taʔa Filisitini ye na, mii a Kerɛti ye kwɔ́ɔ bi yirige yaà, bele be kòro wodɛ́ɛnbéle ní sólomi lɔ̀ʔɔ nyɔ́ɔ na lè, bi bele bee kwɔ́ɔ láʔa yaà.

¹⁷ Mii a gɔ̀lɔ́ wòlo be na, wee wi a kpɔ́ʔɔ lè, si pye ní fundanʔagbɔɔrɔ ní. Pe a gi cán bi cán mii wi nyɛ Yawe, lǎli ni mii ga mii gɔ̀lɔ́w wòlo be na lè.› »