Ezekyɛli 24 - Cebaara Bible 2010

Zyerusalɛmi n tímana ní tátɔɔn nɛ̀ʔɛdaʔaga ní

¹ Yɛ̀ʔɛlɛ kpanjɛrɛ wóli, yeye kɛɛ wógi, canya kɛɛ wóʔo na, a Yawe syɛ́ɛnri nan mii na, wi n jo:

² «Syɔɔn-pya, cángi naa sɛ́bɛ mi yaʔa miyɛɛ ma cángi naa tiimaa! Cángi naa tiimaa ni Babilɔni fànʔafɔw gi séli bi too Zyerusalɛmi na.

³ Kàseele wáa niceebèle narigbaʔa ma. Mɔ a be pye: ‹Kàfɔw Yawe n jo: Nɛ̀ʔɛdaʔagi taʔa. Ki taʔa mí lɔ̀ʔɔ le gi ni.

⁴ Kaacɛnɛri le yaà, kaacɛnɛri myɛ ti nyɔɔ lè, ti lè céeli, ní fókaangi wóro. Wi nyìn kacelejǎnyi na.

⁵ Yaweeyiligèle wojangéle cò, mí kàjeri kpoʔolo nɛ̀ʔɛdaʔagi láara ni, mí kaacɛnɛri sɔʔɔ di pe. Kaceleri di nyɛ gi ni lè, toro í wɔ́ɔ pe.

⁶ Koro na Kàfɔw Yawe, wi syɛ́ɛnri naa joo níì jo: Wɔʔɔli a pye sìsyaanw kàʔa na, ki lè nɛ̀ʔɛdaʔagi, gee tátɔɔnw foro lè, gee gi lè ki tátɔɔnw a láʔa í! Da kaacɛnɛri yirigi tiyɛɛ gurugo taʔalagèlē taʔalagèlē, gɔ̌nwáara a kɔ́ pye gi ni í.

⁷ Níì cán sìsyaanw gi wo lè, wi n kòro ki níngi ni. Ki n wi taʔa fálawaʔa na, ki ga wi wo tári na si wi tɔ́n ní támiige ní í.

⁸ Mii si n sìsyaanw yaʔa fálawaagi na sìndɔn ni jàngó wi mii fundanʔagbɔɔri yìrige si gi yaʔa mii í mii gɔ̀lɔ́w wòlo.

⁹ Gee bee na, Kàfɔw Yawe syɛ́ɛnri naa joo níì jo: Wɔʔɔli a pye sìsyaanw kàʔa na! Mii wɔ́ɔgēle, mii a sórigolo kajenɛʔɛrɛ náa le.

¹⁰ Kàjere saʔa kpoʔolo, mí náagi le mi káari sɔʔɔ, sólomi le di ni, kaceri si kùu púrɔ.

¹¹ Koro kàdoʔo ma, nɛ̀ʔɛdaʔawaagi taʔa naàniganw na ki wári, kanyɛɛnri í wári bi nyɛ́nɛgɛ, koro ga pye nɔ́nʔɔri di nyɛ gi ni lè toro í gbàla, tátɔɔnw í sógi.

¹² Koro n pye n wáa gbanzan, tátɔɔnw wi gi foro lè, náagi ga wi tátɔɔnw láʔa í.

¹³ Kapeegi i nyɛ mɔ nɔ́nʔɔri ni, mii maa ni caa bi mɔ jée mùnu, mɔ si ga miyɛɛ yaʔa a mɔ jée n mùnu n mɔ nɔ́nʔɔri láʔa í, koro na mɔ nɔ́nʔɔri a ní jée láʔa mɔ na í fwɔɔ bi taa mii í mii fundanʔagbɔɔri kèlē kpéʔele foro mɔ na.

¹⁴ Mii Yawe wi gi joo, gee bee si ki a kpéʔele, mii a gi kpéʔele foro. Mii a tée lúru kàdoʔo ma í, mii a tée nyínimɛ taa í, ki a tée wári mii na í. Pe a kútiiw kúun mɔ na bi yɛlɛ ní mɔ tánʔaganmi, ní mɔ kapyegèle ní, Kàfɔw Yawe wi jo nya.› »

Ezekyɛli kùu káyaagi

¹⁵ Yawe syɛ́ɛnri n nan mii na, wi n jo:

¹⁶ «Syɔɔn-pya, wéle, mii a mɔ nyapiigèle yanidaanmaga láʔa mɔ na làrinijanna ni. Mɔ a kɔ́ kùlege kpéʔele í, mɔ a kɔ́ nyɛni í, mɔ nyatinmi a kɔ́ ra ŋuu í.

¹⁷ Da kayaagi ŋɔ́ngi pyèrio, kùu káyaagi gi kpéʔele kúbèle kéele na lè, mɔ a kɔ́ koro kàa pye í, mɔ nyunbwɔɔgi pwɔɔ, mí mɔ taʔalayi le tɔ́lɔyi na, mɔ a kɔ́ mɔ nyɔɔbɔnziiri tɔ́n í, mɔ si a wɔ́ɔ kɔ́ lɔgusuro lìi í.»

¹⁸ Mii maa joo ní syɛ́ɛnbèle ní nyǐngi nyɔ́ɔ na, a ki ga pye cângwɔɔgi nyɔɔ na, a mii céw kùu. Ki nyǐndaligi nyɛ̀ʔɛ nyɔ́ɔ na, a mii gi kpéʔele n yɛlɛ ní gi ní àmɛɛ ki da joo n gbàn mii ma lè.

¹⁹ A syɛ́ɛnbèle mii pye: «Mɔ a gi tɛ̀ɛn wolo na, gee gi nyɛ mɔ kapyeli naa kɔ́rɔ wolo kàbangi na lè ì?»

²⁰ A mii be yari: «Yawe syɛ́ɛnri maa nan mii na, a wi jo:

²¹ ‹Ki joo Isirayɛli kpáagi wòolo ma mí be pye: Kàfɔw Yawe wi syɛ́ɛnri naa joo níì jo: Wéle, mii a mii tɛɛcǎngi kálagi, ki lè yele nɛ̀ɛgbɔʔɔgi fànʔa, ní yele nyapiigèle yanidaanmaga, ní yele fúnyi tàmaga yáriga. Yele nànbiigèle ní yele calipiigèle yele kári níì yaʔa lè, ŋɔséew a ge kpóo cáan.

²² Yele a wɔ́ɔ gi kpéʔele àmɛɛ mii gi kpéʔele lè. Yele a yele nyɔɔbɔnziiri tɔ́n í, yele a kɔ́ lɔ́gusuro lìi í.

²³ Yele nyùnbwɔɔyi a pye nyǔnyi ni, yele taʔalayi í pye tɔ́lɔyi na, yele a kɔ́ kùlege kpéʔele í, yele a kɔ́ ra nyaan í, waʔari si a yele cò yele kolomi kapyere kéele na, yele a ra cɛ́ɛn yeyɛɛ kéeli na.

²⁴ Ezekyɛli a pye fɛ̀ɛ yele ma. Yele a gi kpéʔele kélemi bi yɛlɛ ní gee ní wi kpéʔele lè. Lǎli ni si gee bee ga baa kpéʔele lè, yele a gi cán bi cán mii wi nyɛ Kàfɔw Yawe.›

²⁵ Mɔ si na, syɔɔn-pya, tága gi na cángee na mii a gi syɔɔ lè be ma, gee gi nyɛ lè be fǎngi, ní be fundaanri, ní be fèreri, ní be nyapiigèle yanidaanmaga, ní be fúnyi ki laànitaʔa yáriga, ní be nànbiigèle, ní be calipiigèle,

²⁶ cángi bee na, wogorow a pan mɔ ma bi ba syɛ́ɛnri bee joo mɔ í di lóʔo.

²⁷ Cángi bee na mɔ nyɔ́ɔgi a múgu mɔ í ra nyuu ní wogorow ní, mɔ a ní pye boboo í. Mɔ a pye fɛ̀ɛ be ma, pe a gi cán bi cán mii wi nyɛ Yawe.»