Ezekyɛli 22 - Cebaara Bible 2010

Zyerusalɛmi kapeekpoloyi kéele

¹ Yawe syɛ́ɛnri n nan mii na, wi n jo:

² «Mɔ syɔɔn-pya, a mɔ a kútiiw joo lé, a mɔ a sìsyaanw kàʔa kútii joo lé? Ki kapeekpoloyi myɛ tɛ̀ɛn gi na.

³ Mɔ a gi joo si jo: ‹Kàfɔw Yawe wi syɛ́ɛnri naa joo níì jo: Kàʔa, mɔ i sìsyaanw ŋuu miyɛɛ níngi ni jàngó mɔ cángi í nan, ní i yasunyo kpéʔele jàngó bi miyɛɛ nɔ́nʔɔ!

⁴ Sìsyaanw mɔ wo lè, mɔ n kolomɔ taʔa miyɛɛ na wi bárigaw ni, yasunyi mɔ sámaga lè, mɔ n miyɛɛ nɔ́nʔɔ yi bárigaw ni. Mɔ n kàa yirige mɔ cányi ni kánmi bee na, mɔ n nan mɔ yɛ́ɛgèle kwɔ́ɔmɔ na. Koro na mii mɔ kpéʔele faʔara yáriga syɛɛnfeleyi yɛ́ʔɛ ma, ní tátɛɛyi myɛ nɛ̀ɛnyɛnɛgɛ yáriga.

⁵ Tɔ́ɔnrɔ wóbèle, ní léelige wóbèle a ra peyɛɛ nyɛ́nɛ mɔ na, mɔ wee mɛ́ʔɛ gi nɔ́nʔɔ lè, á mɔ nyìn kanyaʔamiri na.

⁶ Isirayɛli fànʔafɔbiigèle wéle, ke myɛ nibin nibin i ge fǎngi kpéʔele jàngó bàā sìsyaanw ŋuu mɔ ni.

⁷ Pe i tofɔbèle ní nafɔbèle faari mɔ ni. Pe i nibɔɔn wɔʔɔ ní fungbanga ní mɔ níngi ni. Pe i círio, ní lɔgucaa nɔ̀ʔɔrɔ́ ni líi mɔ ni.

⁸ Mɔ i mii tɛɛcǎnyi faari, mɔ i mii cândɛnɛyi kálagi.

⁹ Mɛ́ɛkalagibèle i nyɛ mɔ ni jàngó bàā sìsyaanw ŋuu. Bele be nyɛ mɔ ni lè pe i líi nyanbeleyi na. Pe i kapeeyi kpéʔele mɔ níngi ni.

¹⁰ Pe i sìnɛ́ ní tofɔlɔ cɔ́ɔ ní mɔ ni. Pe i tuun cɔlɔɔ na mɔ ni ní wi lòweligi nɔ́nʔɔrɔ ní.

¹¹ Syɔɔn o syɔɔn i nɔ́nʔɔri kèlē kpéʔele mɔ ni ní wi syɛɛnnyɛnnɛ cɔ́ɔ ní, syɔɔn o syɔɔn i kálagimi kpéʔele ní wi pyà cɔ́ɔ ní, syɔɔn o syɔɔn i tuun wi senyɛnjaà na, wi lè wi tofɔlɔ-na-senyɛnjaa.

¹² Pe i námara kpɔ́ʔɔrɔ syoo mɔ ni jàngó bàā sìsyaanw ŋuu. Mɔ i tɔ̀nɔw, ní tɔ̀nɔpeew caa, mɔ i mɔ syɛɛnnyɛnnɛ fuguri gbánama ni ni miyɛɛ gbéʔele lɔrɔfɔlɔ, mii si na, mɔ n fɛ̀ʔɛ mii na, Kàfɔw Yawe wi jo nya.

¹³ Wéle, mii i kadaagèle kóri keyɛɛ na nɔ̀ʔɔrɔgi kéele na mɔ kpéʔele lè, ní sìsyaanw kéele na wi nyaa mɔ níngi ni lè.

¹⁴ Cányi ni mii ga yìri mɔ kurugo lè a mɔ a gbǎn soro yére lé, mɔ kɔ́yi í wɔ́ɔ fànʔa taa? Mii Yawe wi joo, mii si a gi kpéʔele.

¹⁵ Mii a mɔ cariga bi lége syɛɛnfeleyi nínge ni, mii a mɔ cariga màʔa tátɛɛyɛ saʔa ni, si mɔ nɔ́nʔɔri kwɔ́ɔ bi yirige mɔ níngi ni.

¹⁶ Mɔ a miyɛɛ bye yafaʔaga syɛɛnfeleyi nyɛ́nɛ na, mɔ si a gi cán bi cán mii wi nyɛ Yawe.› »

¹⁷ Yawe syɛ́ɛnri n nan mii na, wi n jo:

¹⁸ «Syɔɔn-pya, Isirayɛli kpáagi wòolo n baa pye mii ma àmɛɛ tunmɔvire nyɛ lè, pe myɛ i nyɛ àmɛɛ kanyɛɛnrɛ, ní kafiire, ní tunmɔrɔ, ní tunmɔgbanra nyɛ lè tunweele ni. Pe i nyɛ wálifiio fíre.

¹⁹ Gee bee na Kàfɔw Yawe syɛ́ɛnri naa joo níì jo: ‹Amɛɛ yele myɛ baa pye lè mɔ a jo tunmɔvire dii, wéle, mii a yele kpóʔoro Zyerusalɛmi níngi ni.

²⁰ Amɛɛ be wálifiio, ní kanyɛɛnrɛ, ní tunmɔrɔ, ní tunmɔgbanra, ní kafiire kpóʔoro ni nii tunweele ni lè, ní i fuguruyi wáa di na jàngó bi di gbàla lè, kánmi bee na mii a yele kpóʔoro mii fundanʔari, ní mii fundanʔagbɔɔri fúngo ni, mii a yele tɛ́ʔɛ si yele gbàla.

²¹ Mii a yele kpoʔolo gboʔo, si mii funyìriri náa fɛɛ wáa yele na, yele a nyan Zyerusalɛmi níngi ni.

²² Amɛɛ wálifiio gbàlá tunweele nínge ni lè kánmi bee na yele a gbàla gi níngi ni, yele a gi cán bi cán mii Yawe n mii fundanʔagbɔɔri yàli yele na.› »

²³ Yawe syɛ́ɛnri n nan mii na, wi n jo:

²⁴ «Syɔɔn-pya, ki joo Zyerusalɛmi ma mí wi pye: ‹Mɔ i nyɛ táraa, dee di lè ti ga jée n mùnu í, dee di lè zàʔá ga di fɔɔn fundanʔari canʔa na í.›

²⁵ Wi kanyaajoobèle i nyɔɔkuunro kpéʔele wi níngi ni. Kánmee na càaraɔ kaana, wee wi wi kaacǒri sulugu lè, kánmi bee na be syɛ́ɛnbèle káa, pe i lɔnɛʔɛri, ní yacanri nɛnɛ ni syoo, pe i lɔgucebèle nɛʔɛgi wi ni.

²⁶ Wi sáriga-wòlobèle i mii làlwaw kálagi, ní i mii tɛɛcǎnyi nɔ́ɔnri, pe o yacanga cángi ni wɛ̀ɛ́ yapeʔe ni í, pe o láʔala tèé yanɔnʔɔgɔ ní yamunugo nínge ni í, pe n nyapiigèle yirige mii cândɛnɛyi ni, mii n pye yafaʔaga pe níngi ni.

²⁷ Wi kùndigibèle i nyɛ wi níngi ni àmɛɛ solomikaara nyɛ, dee ti di kaacǒri sulugu lè. Pe i sìsyaanw ŋuu, pe i syɛ́ɛnbèle kúu jàngó bàā be nɔ̀ʔɔrɔgi kèlē forogi.

²⁸ Gee si gi wi kanyaajoobèle kéele kwɔ́ɔ lè, poro i pòó ní poofiiw ní, pe i gbanzan yanyaaya nyaagi, pe i jànvaaw kèlē nyaagi ni nyuu. Pe i gi nyuu níì jo: ‹Kàfɔw Yawe n jo,› bi gi taa Yawe ga joo í.

²⁹ Tári syɛ̀ɛnnɛ i fǎngi gbàngí, ní i kàyuugi kpéʔele, pe i foomɔfɔbèle ní fɔ̀rɔgɔfɔbèle wɔʔɔ, pe i nibɔɔn faari wi táangi myɛ na.

³⁰ Mii i syɔɔnwaa caa be níngi ni, wee wi a kàkɔlɔgɔ faan bi be màʔa lè, si yére tɛɛfurugi na mii yɛ́ʔɛ ma, bi tári syɔɔ jàngó mii a kɔ́ di kálagi í, kàjáa mii ga wàa taa í.

³¹ Mii n mii fundanʔagbɔɔri yàli be na, mii n be kálagi n kwɔ́ɔ ní mii fundanʔagbɔɔri náa ní. Mii n be kapyegèle yaʔa a ge lúru n kòro be nyúnyi ni, Kàfɔw Yawe wi jo nya.»