Ezekyɛli 21 - Cebaara Bible 2010

Syɛɛnpɛɛnrɛ Isirayɛli ye kéeli na

¹ Yawe syɛ́ɛnri n nan mii na, wi n jo:

² «Syɔɔn-pya, mɔ yɛ́ɛgi wáa wòrogulo ma, mí joo wòrogulo kàbangi sìnbirige kánma na! Kérigèle nyaa mi joo wòrogulo kàbangi sìnbirige kɔ́ligɔ kánma na.

³ Mɔ a gi joo wòrogulo kàbangi kɔ́ligɔ ma si jo: ‹Yawe syɛ́ɛnri lóʔo! Kàfɔw Yawe wi syɛ́ɛnri naa joo níì jo: Wéle, mii a tɔ̀nɔ́ naà le mɔ fúngi ni gee ki a tiipiriyi myɛ, ní tiiwaayi myɛ sórigo lè. Naanyǐnyi naagbanga a fígi í, ki a yɛɛcɔɔgèle myɛ sórigo mɛnɛ mɛnɛ bi séli wòrogulo na, bi taa sa nan solomɔkulo na.

⁴ Syɔɔn ye myɛ a gi nyaa bi cán mii Yawe wi gi le, ki a tée fígi í.› »

⁵ A mii jo: «Ee! Kàfɔw Yawe! Bele bee i gi nyuu mii kéeli na níì jo: ‹Kàseewaaɔ wii.› »

⁶ A Yawe syɛ́ɛnri nan mii na, wi n jo:

⁷ «Syɔɔn-pya, mɔ yɛ́ɛgi fíige Zyerusalɛmi kàbangi na, mí joo tɛɛcǎnyi kánma na! Kérigèle nyaa mi joo Isirayɛli tásaligi kánma na!

⁸ Mɔ a gi joo Isirayɛli tásaligi ma si jo: ‹Yawe wi syɛ́ɛnri naa joo níì jo: Wéle, mɔ ní mii cáan, mii a mii ŋɔséew kíle yirige wi kpàfogi ni, mii a syɛɛnsinw, ní syɛɛnpeew kwɔ́ɔ bi yirige mɔ ni.

⁹ Amɛɛ gi nyɛ lè mii i caa bi syɛɛnsinw, ní syɛɛnpeew kwɔ́ɔ bi yirige mɔ ni, àwá, mii ŋɔséew wi a yiri wee wi kpàfogi ni bi syɔɔn ye myɛw kpóo, bi séli wòrogulo ma bi sa nan solomɔkulo na.

¹⁰ Syɔɔn ye myɛ a gi cán bi cán mii Yawe, mii n mii ŋɔséew kíle n yirige wi kpàfogi ni, wi si a ní lúru jée yaà í.›

¹¹ Mɔ si na syɔɔn-pya, da cɛ́ɛn ní sárigèle ní wojerigéle ní, funbɛɛnrɛ na, mɔ a ra cɛ́ɛn be nyɛnɛ na.

¹² Pe ga mɔ pye: ‹Nyàʔá na mɔ cɛ́ɛn?› Mɔ a be yari: ‹Níì cán syɛɛnrɛ di maa. Fúnyi myɛ a ba ra nyaan, kɔ́yi myɛ fànʔa a kwɔ́ɔ, pìígèle myɛ a ra fíigi, yégunyi myɛ a ba nyan bi pye lɔ̀ʔɔ, toro di maa dee, ti n nan naa!› » Kàfɔw Yawe wi jo nya.

Kanyaajooro ŋɔséew kéele na

¹³ Yawe syɛ́ɛnri n nan mii na, wi n jo:

¹⁴ «Syɔɔn-pya, kérigèle nyaa mi joo, ki joo mí jo: ‹Kàfɔw wi syɛ́ɛnri naa joo níì jo: Ŋɔséew! Ŋɔséew! Pe n wi jɔɔgɔ, pe n wi kurugo.

¹⁵ Kpóobeeli kéele na pe tɔ̀nɔ n wi jɔɔgɔ, pe n wi kurugo jàngó waa nyɛ́ʔɛnɛ. A wolo si yɛlɛ lé bàā fundaanra kpéʔele? Mii jáaw sàbinnɛ i tíiyi myɛ faari.

¹⁶ Pe n wi kaan pe wi kurugo jàngó kɔ́gi í wí cò. Pe n wi jɔɔgɔ, ŋɔséew, pe n wi kurugo jàngó bi wi pye kapɛɛnkpumɔn-yáriga syɛɛnkpoow kɔ́lɔ ni.

¹⁷ Da yákpoli wáa, máā nyaan maa peele, syɔɔn-pya! Níì cán wi n kɔ́n mii syɛ́ɛnbèle kánma na, ní Isirayɛli fànʔafɔbiigèle myɛ kánma na, pe n ge wáa ŋɔséew na ní mii syɛ́ɛnbèle ní, koro na da mɔ cesiinyungi kpúmɔn!

¹⁸ Níì cán sɛʔɛwelele lii, nyàʔá si ki a dée pye kapye fǎngi kàgbeele be faari lè, loro da pye beè í? Kàfɔw Yawe wi jo nya.

¹⁹ Mɔ si na, syɔɔn-pya, da kérigèle nyaagi maa nyuu mí kadaagèle kóri keyɛɛ na! Ŋɔséew kpúmɔnrɔ si pye ki tɛɛyɛ siin, ní ki tɛɛyɛ taanri, kpóoli ŋɔsée wii. Kpóogbɔɔli ŋɔsée wi be kɔ́ri n láa.

²⁰ Koro ga pye fúnyi í yiri be ni, wodoobèle si nɛʔɛ. Mii a ŋɔséew tɛ́ʔɛ bi be tìn be kpàánweegèle myɛ na, wi lè kpóoli wóo, wi n sámaga bàā nyɛ́ʔɛnɛ àmɛɛ nyɛ̀ʔɛni nyɛ́ʔɛnɛmɛ nyɛ lè, wi n sámaga n yaʔa kpóobeeli kánma na.

²¹ Da kpúmɔn kàliige ma, da kpúmɔn kàmɔnɔ ma, ŋɔséetàaɔn, mɔ fínaafirigeli fíige kàbanyi myɛ na!

²² Mii wɔ́ɔgēle, mii a kadaʔala kóri keyɛɛ na. Mii a gi sìndɛɛgi wòlo bi mii fundanʔagbɔɔri kwɔ́ɔ. Mii Yawe wi nyuu.› »

Pe a ba too Zyerusalɛmi na

²³ Yawe syɛ́ɛnri n nan mii na, wi n jo:

²⁴ «Mɔ na syɔɔn-pya, ki n yɛlɛ mi koloyo siin wòlo jàngó Babilɔni fànʔafɔw ŋɔsée í sɔ̀lɔ bi pan. Yi myɛ siinw í yiri tánijanri ni. Fɛ̀ɛ kpúmɔn, wi kpúmɔn kólogi tɛɛjeele na gi syée lè kègaa ma.

²⁵ Mɔ a kologo wòlo jàngó ŋɔséew í sa nan Araba na, ki lè Amɔn ye kěgi, ki fala Zyuda tári ma bi sa nan Zyerusalɛmi na ki lè kènirigi.

²⁶ Níì cán Babilɔni fànʔafɔw n yére kobariyi na, kóloyi siin tɛɛfaraga ni, ni wi yasunyi yíbe, wi i ŋáayi cúngu ni ǹdebiigèle yíbe, wi i yɛ̀ɛ́li sɛʔɛ ni wéle.

²⁷ Wi kàliige kɔ́gi ni gɔ̌nw nyɛ, wee wi Zyerusalɛmi tèé lè, beè gi yɛlɛ be tòjaa-mazinbéle tɛ́ʔɛ lè bi kpóogbɔɔlɔ kéele joo bi gbàn, bàā kapɛɛnnɛ yákpogéle wáa, pe a tòjaa-mazinbéle tɛ́ʔɛ télege kpàánweegèle na. Pe a tɛɛ̀lúguyo yìrige bi yérige, pe a bǒboliyo sámaga.

²⁸ Gee bee n kòro be ma gbanzan kanyaajooro pe nyɛnɛ na, poro bele pe da kàliyi kàli lè. Kàjáa woro si n be sɔ̀ngi n taa be kolomi na, bee kéele na pe a be cò lè.

²⁹ Awá, gee bee na Kàfɔw Yawe n jo: ‹Amɛɛ yele sɔ̀ngí ni taagi yele kolomi na lè, níì yele céemi kèlē múgu n yaʔa n yele kapeegèle tɛ̀ɛn yele kapyegèle myɛ báriga ni lè, àmɛɛ yele sɔ̀ngí ni taagi gee bee na lè, wi kɔ́gi a yele cò.

³⁰ Mɔ si na, Isirayɛli fànʔafɔbili, mɔ wi lè Kolocɔlɔɔ yacanri faʔafɔlɔ, ní i nyɛ syɛɛnpeeo, mɔ wee canʔa gi maa lè, lǎli ni kolomi a ba nan bi kwɔ́ɔmi na lè.

³¹ Kàfɔw Yawe wi syɛ́ɛnri naa joo níì jo: Nyùnbwɔɔgi a láʔa yaà, fànʔafɔ-nyùndɔnni a kɔ́n, kérigèle myɛ a fàli, wee wi tìgi táàma lè wi a yìri ǹjoʔo ma, wee wi yìri ǹjoʔo ma lè, wi a tìgi táàma.

³² Gurubɛɛrɛ, gurubɛɛrɛ, gurubɛɛrɛ! Koro mii a kpéʔele gi na. Kérigèle myɛ n téè fàli n kwɔ́ɔ ni wi làribanni sige, wee má kútiiw nyɛ lè, woro wee kɔ́lɔ ni mii a wi le lè.›

Pe a ba too Amɔn ye na

³³ «Mɔ si na syɔɔn-pya, kérigèle nyaa mi joo! Mɔ a gi joo si jo: ‹Kàfɔw Yawe wi syɛ́ɛnri naa joo Amɔn ye kéeli na, ní be nɛ̀ɛnyɛnɛgi kéele na. Mɔ a gi joo si jo: Ŋɔséew, ŋɔséew n kɔ́n, wi n kurugo kpóobeeli kánma na, bàā káa, bàā nyɛ́ʔɛnɛ.

³⁴ Mɔ gbanzan yanyaari nínge ni, ní mɔ janvaaw kanyaajooro nínge ni, wi a mɔ pínɛ ní syɛɛnpeebèle ní, bele yátiiye wi fúrugu lè, poro bele canʔa gi maa lè, lǎli ni kolomi a ba nan bi kwɔ́ɔmi na lè.

³⁵ Mɔ ŋɔséew lúrugo mi le wi kpàfogi ni. Mii a mɔ kútiiw ceri tɛ́ɛgi ni, beè be mɔ faan lè, mɔ táseeri ni.

³⁶ Mii a mii fundanʔagbɔɔri yàli mɔ na, mii a mii funyìriri náa fɛɛ wáa mɔ na bi mɔ le naakpɔʔɔ levɔɔlɔ kɔ́yɔ ni, be lè gàlagíw pyefɔɔlɔ.

³⁷ Náagi a mɔ lìi, mɔ sisyaanw a kòro tári nínge ni. Pe a ní mɔ kéeli sɔ̀ngi taa í. Níì cán mii Yawe, mii wi jo nya.› »