Ezekyɛli 20 - Cebaara Bible 2010

Yawe n kíni Isirayɛli ye yɛ́ɛgi na pe céemi fúngo ni

¹ A ki ga pye yɛ̀ʔɛlɛ kɔrɔsiin wóli yeye kagunɔ wógi canya kɛɛ wóʔo na, a nǎnbèle pèle pan, bele be pye lè Isirayɛli wolɛɛbèle pèle, bi ba Yawe yíbe, ní baa tɛ́ɛn mii yɛ́ʔɛ ma.

² A Yawe syɛ́ɛnri nan mii na, wi n jo:

³ «Syɔɔn-pya, ki joo Isirayɛli wolɛɛbèle ma mí be pye: ‹Kàfɔw Yawe wi syɛ́ɛnri naa joo níì jo: Mii yíbeli kéele na lé yele pan? Mii woweew mɛ́ʔɛ na, mii a fɔ̀lɔ bi gi yaʔa yele í mii yíbe í! Kàfɔw Yawe wi jo nya.›

⁴ A mɔ a kútiiw kúun lé be na, mɔ a kútiiw kúun lé be na syɔɔn-pya? Pe toolɛɛbèle kapeekpoloyo tɛ̀ɛn be na pe yi cán.

⁵ Mɔ a gi joo be ma si be pye: ‹Kàfɔw Yawe wi syɛ́ɛnri naa joo níì jo: Cángee na mii Isirayɛli nyɛ́nɛ n wòlo lè, a mii mii kɔ́gi yìrige níì kàli Zyakɔbi kpáagi yòdaʔaga wòolo ma, mii n niyɛɛ dɛ̀ɛn be na Ezyipiti tári ni. Mii n mii kɔ́gi yìrige níì kàli be ma níì jo: Mii wi nyɛ Yawe wi lè yele Kolocɔlɔw.

⁶ Cángi bee na mii mii kɔ́gi yìrige níì kàli be ma níì jo mii a be yirige Ezyipiti tári ni bi sa lége táraa ni, dee mii da wéle n yaʔa be ma lè, táraa dii, dee di nyìn nɔ́nɔw ní sárigi na ni fóo lè, dee di nyɔɔ n sɔ̀lɔ tátɛɛyi myɛ na lè.

⁷ Mii maa be pye: yele myɛ nibin nibin n yɛlɛ bi yanɔnʔɔyi wáa, yee yi yele nyapiigèle kíle lè, yele a ní kɔ́ yeyɛɛ nɔ́nʔɔ ní Ezyipiti ye yasunyi ní í. Mii wi nyɛ Yawe wi lè yele Kolocɔlɔw.›

⁸ Kàjáa pe n céemɛ le peyɛɛ ni mii kánmi na, pe ga fɔ̀lɔ n lóʔo mii ma í. Pe wàa ga yanɔnʔɔyi wáa, yee yi wi nyapiigèle kíle lè í, pe ga láʔa Ezyipiti ye yasunyi na í. A gi si jée mii sɔ̀nguri ni bi mii fundanʔagbɔɔri yàli be na, bi mii fundanʔari kpéʔele be na sa nan di tɛɛ̀laʔali na Ezyipiti tári nínge ni.

⁹ Koro ní ki myɛ ní mii n gi pye mii mɛ́ɛgi kéele na jàngó ki a kɔ́ pye yafaʔaga syɛɛnfeleyi nyɛ́nɛ na, yee nínge ni pe da pye lè í, yoro yee nyɛ́nɛ na mii da niyɛɛ dɛ̀ɛn be na jàngó bi be yirige Ezyipiti tári ni lè í.

¹⁰ Mii n be yirige Ezyipiti tári ni níì kíni be yɛ́ɛgi na fìími tára ni.

¹¹ A mii mii làlwaw kèlē kaan be ma, ní wɔ́ɔ̀ mii kajoodɛɛngèle tɛ̀ɛn be na, gele syɔɔn yɛlɛ bàā kpéʔele lè, koro ga pye bi kòro sìi na ke bárigaw ni.

¹² Mii n wɔ́ɔ̀ mii cândɛnɛyi kaan be ma, yoro í pye fɛ̀ɛ mii ní be níngi ni, koro ga pye pe gi cán mii wi nyɛ Yawe, mii wee wi poro yaari kɔlɔ̀ na niyɛɛ ma lè.

¹³ Kàjáa Isirayɛli kpáagi wòolo n céemɛ le peyɛɛ ni mii kánmi na fìími tára ni. Pe ga taʔa mii làlwaw kèlē na í, pe n mii kajoodɛɛngèle cée, gele syɔɔn yɛlɛ bàā kpéʔele lè si kòro sìi na ke bárigaw ni, níì kòro ni mii cândɛnɛyi kálagi sìnlaʔa ni. A gi si jée mii sɔ̀nguri ni bi mii fundanʔagbɔɔri yàli be na fìími tára ni bi be kálagi kwɔ́ɔ.

¹⁴ Koro ní ki myɛ ní mii n gi pye mii mɛ́ɛgi kéele na jàngó ki a kɔ́ pye yafaʔaga syɛɛnfeleyi nyɛ́nɛ na, yoro yee nyɛ́nɛ na mii da be yirige Ezyipiti ni lè í.

¹⁵ Mii wi wɔ́ɔ̀ kɔ́gi yìrige níì kàli be ma fìími tára ni, níì jo mii a tée kári ní be ní pe sa jée tári ni, dee mii da kaan be ma lè í, táraa dii, dee di nyìn nɔ́nɔw ní sárigi na ni fóo lè, dee di nyɔɔ n sɔ̀lɔ tátɛɛyi myɛ na lè.

¹⁶ Gee bee n taa ncan pe maa ni mii kajoodɛɛngèle faari, pe da fɔ̀lɔ n taʔa mii làlwaw kèlē na í, ní àmɛɛ pe da ni mii cândɛnɛyi kálagi lè, níì cán be fúnyi maa sèʔê tan n kòro be yasunyi na.

¹⁷ Kàjáa a be nyinimi pye mii na jàngó mii a kɔ́ be kálagi í. Mii ga be kálagi n kwɔ́ɔ fìími tára ni í.

Isirayɛli ye ga láʔa sìnloʔomi na Kolocɔlɔɔ ma í

¹⁸ «A mii gi joo be pìíbèle ma fìími tára ni níì jo: Yele a kɔ́ ra táanri yele tóobèle làlwa kajoogéle na í, yele a kɔ́ be kajoodɛɛngèle cò í, yele a kɔ́ yeyɛɛ nɔ́nʔɔ ní be yasunyi ní í.

¹⁹ Mii wi nyɛ Yawe wi lè yele Kolocɔlɔw. Ye taʔa mii làlwaw kèlē na, ye mii kajoodɛɛngèle cò, yáā ge kpéʔele.

²⁰ Ye mii cândɛnɛyi yaʔa, yi pye fɛ̀ɛ mii ní yele níngi ni, fɛ̀ɛ́wee báriga ni yele a gi cán lè bi cán mii wi nyɛ Yawe wi lè yele Kolocɔlɔw.

²¹ Kàjáa a jaafɔbèle peyɛɛ bye niceebéle mii kàbangi na. Pe ga peyɛɛ daʔa mii làlwaw kèlē na í, pe ga mii kajoodɛɛngèle cò í, pe wɔ́ɔ o ge kpéʔele í, gele syɔɔn yɛlɛ bàā kpéʔele lè jàngó bi kòro sìi na ke bárigaw ni. Pe i mii cândɛnɛyi kálagi. A gi si jée mii sɔ̀nguri ni bi mii fundanʔagbɔɔri yàli be na, bi mii fundanʔari kpéʔele foro be na fìími tára ni.

²² Koro ní ki myɛ ní a mii mii kɔ́gi tìrige níì gi pye mii mɛ́ɛgi kéele na jàngó ki a kɔ́ pye yafaʔaga syɛɛnfeleyi nyɛ́nɛ na, yoro yee nyɛ́nɛ na mii da be yirige Ezyipiti ni lè í.

²³ Mii wi wɔ́ɔ̀ kɔ́gi yìrige fìími tára ni níì kàli be ma níì jo mii a be cariga lége syɛɛnfeleyi nínge ni bi be cariga lége tátɛɛyɛ saʔa ni,

²⁴ àmɛɛ gi nyɛ lè pe da ni mii kajoodɛɛngèle kpéʔele í, ní àmɛɛ pe da mii làlwaw kèlē cée lè, pe si i mii cândɛnɛyi kálagi, níì taʔa n fala n nyapiigèle le be tóobèle yasunyo ni.

²⁵ Mii si wi wɔ́ɔ baa làlwaw kèlē kaan be ma, gele ge lè ke da nyɔɔ í, ní kajoodɛɛngèle, gele báriga ni pe da pye bi gbǎn kòro sìi na lè í.

²⁶ A mii gi yaʔa be peyɛɛ nɔ́nʔɔ pe yakaanyi báriga ni, yi lè pe pìiselibèle myɛ pe wóo lè sáriga, náagi ni. Mii maa ni caa bi be lége wɔʔɔgi ni kánmi bee na koro ga pye pe gi cán bi cán mii wi nyɛ Yawe.›

Kolocɔlɔɔ a Isirayɛli ye yasunzunri kwɔ́ɔ

²⁷ «Gee bee na, syɔɔn-pya, joo ní Isirayɛli kpáagi wòolo ní. Mɔ a be pye: ‹Kàfɔw Yawe wi syɛ́ɛnri naa joo níì jo: Yele tóobèle n níì mii faʔa àmɛɛ pe baa peyɛɛ bye tágala fun syɛɛnnɛ mii ma lè.

²⁸ Mii n be tórigo tári ma, dee kéele na mii da kɔ́gi yìrigi lè níì kàli níì jo mii a di kaan be ma lè, a pe be nyapiigèle le dǎndama-tɔ́nɔyi myɛ, ní tiitɔnyi myɛ ni. Nɛɛ bee pe be sárigaw wòlo n be sárigaw yakaanya kaan yaà, yee yi da ni mii fúngi taanri lè, n be nùndaanni sáriga wòlo yaà, n be sáriga-yólogow wòlo yaà.

²⁹ A mii be pye: Gìí gi nyɛ sáriga-wòlo-tɛ́ɛgi bee, gee má yele syée lè? Nlaa cángi bee na a be kòro ni yi yiri sáriga-wòlo-tɛ́ɛyɛ fwɔɔ n baa nan níjanʔa na.›

³⁰ Koro na ki joo Isirayɛli kpáagi wòolo ma mí be pye: ‹Kàfɔw Yawe wi syɛ́ɛnri naa joo níì jo: Yele o yeyɛɛ nɔ́ɔnri àmɛɛ yele tóolɛɛbèle nyɛ lè ì, ní wɔ́ɔ̀ yeyɛɛ gbéʔele kanɔnʔɔbyebèlē àmɛɛ yele taʔa pe yanɔnʔɔyi na lè ì?

³¹ Yele yakaanyi ní yele maa lè, ní yele pìíbèle yele wóo lè sáriga náagi ni, yele i yeyɛɛ nɔ́ɔnri ní yele yasunyi myɛ ní fwɔɔ n baa nan níjanʔa na. Mii si niyɛɛ yaʔa lé yele í yíbe Isirayɛli kpáagi wòolo? Mii woweew mɛ́ʔɛ na, mii a tée niyɛɛ yaʔa yele í yíbe í! Kàfɔw Yawe wi jo nya.

³² Gee yele tímana yele fúnyi ni lè, ki a foro í, àmɛɛ yele gi nyuu lè níì jo: Wolo i caa bi pye àmɛɛ syɛɛnfeleyi nyɛ lè, àmɛɛ tátɛɛyi wozanya narigbaaya woolo nyɛ lè, bàā tíiyi ní kàdɛnɛyi kpɔ̀ʔɔrɔ́.

³³ Mii woweew mɛ́ʔɛ na,› Kàfɔw Yawe wi jo nya, ‹mii a tɛ́ɛn fǎngi na yele nyúngi na, ní sée kɔ́lɔ, ní kɔ̂zánʔaga ní, ní mii fundanʔagbɔɔri ní mii a yàli lè.

³⁴ Mii a yele cɔɔnri bi yirige syɛɛnfeleyi nínge ni, si yele yirige tátɛɛyi ni, yee ni yele cariga n lége lè, bi kpóʔoro ní sée kɔ́lɔ, ní kɔ̂zánʔaga ní, ní mii fundanʔagbɔɔri ní mii a yàli lè.

³⁵ Mii a yele kɔ́ri kári syɛɛnfeleyi fìimɛ tára ma, wó sa yɛ́ɛyi le woyɛɛ ni, mii si kútiiw ceri yele na yaà beè.

³⁶ Amɛɛ mii pye kútii na ní yele tóolɛɛbèle ní Ezyipiti tári fìimɛ tára ni lè, kánmi bee na mii a wɔ́ɔ pye kútii na ní yele ní,› Kàfɔw Yawe wi jo nya.

³⁷ ‹Mii a yele kɔ́ri yele í sɔ̀lɔ yaweenaʔa-kàgbeele láara ni, si yele yɛ́ɛgi kíni joogaanni yapwɔɔrɔ báriga ni.

³⁸ Mii a niceebèle wàli bi láʔa yele na, bele be sìnloʔomi kpéʔele ní mii ní lè mii a be yirige tári ni, dee ni be sáà pye lè, kàjáa pe a ba jée Isirayɛli tári ni í, yele a gi cán bi cán mii wi nyɛ Yawe.

³⁹ Yele si na, Isirayɛli kpáagi wòolo, Kàfɔw Yawe wi syɛ́ɛnri naa joo níì jo: Yaa syée, ye myɛ nibin nibin n yɛlɛ ye sa ra ye yasunyo sungu! Kàjáa koro kàdoʔo ma wo a gi wéle kapye yele a ní ba ra lúro mii ma í! Yele a ní mii mɛ́ɛcǎngi faʔa ní yele sárigaw yakaanya, ní yele yasunyi ní í.

⁴⁰ Níì cán mii nyanbejǎngi na, Isirayɛli nyanbe-nyundɔnɔgi na,› Kàfɔw Yawe wi jo nya, ‹Isirayɛli kpáagi wòolo myɛ a ba ra báara mii ma, pe myɛ binɛw pe a pye lè wodɛ́ɛnbéle ní tári ni. Nɛɛ bee mii a ra fɔ̀lɔ́ be na. Mii a ra yele sáriga-yirigew caa, wi lè yele yakaanyi yaselige, ní gee myɛ yele ga wòlo n yaʔa kɔlɔ̀ na Kolocɔlɔɔ ma lè.

⁴¹ Mii a fɔ̀lɔ yele na àmɛɛ nùndaanna sáriga nyɛ lè, lǎli ni mii ga yele yirige lè syɛɛnfeleyi nínge ni, níì yele yirige yaà tátɛɛyi ni, yee ni yele cariga n fala lè, n yele kpóʔoro, mii a pye wojaɔn ní yele kéeli na syɛɛnfeleyi nyɛ́nɛ na.

⁴² Yele a gi cán bi cán mii wi nyɛ Yawe lǎli ni mii ga yele lúrugo n baa lége Isirayɛli tásaligi ni lè, tári ni, dee kéele na mii da mii kɔ́gi yìrige níì kàli níì jo mii a di kaan yele tóolɛɛbèle ma lè.

⁴³ Nɛɛ bee yele a sɔ̀ngi bi taa yele tánʔaganmi kéele na, ní yele kapyegèle myɛ kéele na, gele yele tɛ́ʔɛ n yeyɛɛ nɔ́nʔɔ lè. Yele a ní fɔ̀lɔ́ yɛ́ɛyi le yeyɛɛ ni bàā wéle í, péemi kapyere myɛ kéele na yele kpéʔele lè.

⁴⁴ Gee mii a pye ní yele ní mii mɛ́ɛgi kéele na lè, lǎli bee ni yele a gi cán bi cán mii wi nyɛ Yawe. Mii a tée gi kpéʔele bi yɛlɛ ní yele tánʔaganbeemi, ní yele námaraw kapyere ní í, ee Isirayɛli kpáagi wòolo,› Kàfɔw Yawe wi jo nya.»