Ezekyɛli 19 - Cebaara Bible 2010

Funbɛɛnrɛ ŋúnugo càarabēle kéele na

¹ Mɔ si na, ki n yɛlɛ mi funbɛɛnrɛ ŋúnugo ŋùu Isirayɛli fànʔafɔbiigèle kéele na,

² mí jo: «Mɔ nɔ́ɔw lè yɔ́ɔ̀, mɛ̀ɛ́ wi da pye? Càarajaʔa wi pye, ní i nyɛ wozinɛɔ ní càarabɔbèle nínge ni, càarabɔ-yɛlɛbèle nínge ni wi pye wozinɛɔ ní ní i wi pìíbèle gbóo.

³ Wi n wi pìiwaa gbóo, a woro yìri n baa pye càarabɔ-yɛlɛɔ, níì tamana kpéʔele n gbàn ni wi kaacǒri sulugu. A wi i nànbēle káa.

⁴ Syɛɛnfeleyi i wi kéeli lúro, wi n too yi wéegi ni, yi n kajinnɛ le wi fínaani na n cò n kári Ezyipiti ma.

⁵ Càarajew gi nyaa lè woro i sigi nyùngo fun, ncan woro sɔ̀ngumi tɛɛtaʔaga i nyɛ gbanzan, a wi níì wi pìiwaa láa n woro pye càarabɔ-yɛlɛɔ.

⁶ A wi i táanri càarabèle nínge ni, n baa pye càarabɔ-yɛlɛɔ. A wi wi kaacǒri suluguganma tama, a wi i nànbēle káa.

⁷ A wi be fànʔafɔ-gbaayi cáan, níì be kěyi kàriga kataya. A tári ní di fúngi yárira myɛ curugo wi kaanani kàfulogo báriga ni.

⁸ Tátɛɛyi yi wi màʔa lè, yi syɛɛnfeleyi n yiyɛɛ zámaga wi kánmi na. Yi n yi cɔ̀ɔ́w cáan wi na, á wi too yi wéegi ni.

⁹ Yi n kajinnɛ le wi fínaani na níì wi le gòdege ni n cò n kári Babilɔni fànʔafɔw ma. Yi n kári ní wi ní kènirige ma, jàngó pe a ní kɔ́ wi yákpoli lóʔo Isirayɛli nyanbeleyi na í.

Funbɛɛnrɛ ŋúnugo ɛrɛzɛn tírige nyúngo kéele na

¹⁰ «Mɔ nɔ́ɔw maa pye ɛrɛzɛn tírige nyúngo, gee be cɔ́rɔ lɔ̀ʔɔ nyɔ́ɔ na lè. Ki maa tɔ̀nɔ ni sangi ní i káganya yirigi lǒgi nɛʔɛnɛ báriga ni.

¹¹ Ki maa ni báriga kágangèlē yirigi, gele ke baa pye lè fànʔafɔ-kàgbeegēle. Ki maa ni kpɔ́ʔɔgi níì tɔnɔ n yiri tiipiitɔnyi ni. Ki nyaani maa tɔ̀nɔ n pye wélege ki tɔnɔni kéele na, ní gi káganyi nɛʔɛnɛ kéele na.

¹² Kàjáa pe n gi kíle n kɔ́n ní fundanʔagbɔɔrɔ ní n cáan tári na. A canʔafolomɔ káfalagi gi yasanri waʔa. A gi báriga kágangèle cɛnɛ n láʔa yaà níì waʔa, a náagi ge sórigo mɛnɛ mɛnɛ.

¹³ A gi cɔ́rɔ tɔ́ɔliw ni fìími tára ni, táraa ni, dee di waʔa lè ní i nyɛ lɔ̀ʔɔ fun.

¹⁴ Naà n yiri ki káganyi ni n gi káganbiiri, ní gi yasanri sórigo. Báriga káganga ní o nyɛ gi na í, ki lè fànʔafɔ-kàgbeeli.» Koro gi pye funbɛɛnrɛ ŋúnugi, ki n funbɛɛnrɛ ŋúnugo wólo nyɔɔ.