Ezekyɛli 18 - Cebaara Bible 2010

Kolocɔlɔɔ i kútiiw kúunri syɔɔn o syɔɔn na n yɛlɛ ní wi tánʔaganmi ní

¹ A Yawe syɛ́ɛnri nan mii na, wi n jo:

² «Nyàʔá kàseele yele wáa lee Isirayɛli tári ni níì jo: ‹Tofɔbèle n ɛrɛzɛn-nìgberi kún, á jaafɔbèle gànʔana tanʔa be na?›

³ Mii woweew mɛ́ʔɛ na, Kàfɔw Yawe wi jo nya, kanmaa a ní taa yele ma bàā kàseeli bee wáa Isirayɛli tári ni í.

⁴ Wéle, pìígèle myɛ i nyɛ mii wòʔolo. Tofɔw pìle ní jaafɔw pìle i nyɛ mii woʔolo, ke myɛ i nyɛ mii wòʔolo. Wee wi ga kapeeli pye lè, woro wi a kùu.

⁵ Syɔ́ɔnwee wi sín lè, ní i kányɛɛgi ní sínni kèlē kpéʔele,

⁶ wee wi lè wi o líi nyanbeleyi na í, wi si o wi nyapiigèle yìrigí ni Isirayɛli kpáagi wòolo yasunyo wéle í, wi si o wi syɛɛnnyɛnnɛ cɔ́ɔ yúu í, wi si o nùuní cɔlɔɔ na wi lòweligi nɔ́nʔɔrɔ lala ni í,

⁷ wi si o syɔɔn nɔ̀ʔɔrɔ́ ni líi í, ní i gi lúrugu ni kaangi, gee wi syɔɔ fwɔɔlɔ fɔ́lɔ ma fwɔɔlɔ nyɔ́ɔ ni lè, wi si o yúu í, ní si i wi lìilaa kaangi kateèjaaɔ ma, ní i burogo nii wee na wi nyɛ lè cepyá,

⁸ wi si o fwɔɔlɔ nii tɔ̀nɔ kéele na í, wi o tɔ̀nɔpeeo syoo í, wi si o wi kɔ́gi nii sìnzinmi ni í, ní i kútiiw nyuu kányɛɛgi na syɛ̀ɛnnɛ siin nínge ni,

⁹ níì wiyɛɛ daʔa mii làlwaw kèlē na, níì mii kajoodɛɛngèle sámaga n cò, ní i gi kpéʔele ni yɛlɛgi ní kányɛɛgi ní, syɔ́ɔnw bee i nyɛ syɛɛnsiɔn, wi a tɔ̀nɔ́ kòro sìi na,» Kàfɔw Yawe wi jo nya.

¹⁰ «Wi si ga nànbile see, á li baa pye kàyuu-fànʔafɔlɔ wàlá syɛɛnkpóō, wàlá a wi kolomɔ kéeli bee làa kpéʔele wi senyɛnnɛ na,

¹¹ bi gi taa woro tiimaa ga kolomɔ kéeli bee làa faala pye í, á wi jáaw si i líi nyanbeleyi na, ní i wi syɛɛnnyɛnnɛ cɔ́ɔ yúu,

¹² ní i fɔrɔgɔfɔlɔ, ní foomɔfɔlɔ nɔ̀ʔɔrɔ́ ni líi, ní i yúu, wi si o yárigi lúrugu ni kaangi, gee wi syɔɔ fwɔɔlɔ nyɔ́ɔ ni lè í, ní i wi yɛ́ɛgi yìrigí ni wéle yasunyi kàbaan na, ní i kapeeyi kpéʔele,

¹³ ní i fwɔɔlɔ nii tɔ̀nɔ kéele na, ní i tɔ̀nɔpeew syoo, jaafɔw bee félege si kòro lé sìi na? Wi a kòro sìi na í àmɛɛ wi kapeeyi bee myɛ kpéʔele lè. Pe a tɔ̀nɔ́ wi kpóo wii! Wi sìsyaanw wolo kapeele a kòro wi tiimaw na!

¹⁴ Kàjáa wee bee ga jaafɔwaa see, á jaafɔw bee baa wi tóow kapeegéle myɛ nyaa, wi ga ge nyaa wi si ga fɔ̀lɔ ni gi wonijangi kpéʔele í,

¹⁵ wi ga pye wi ga fɔ̀lɔ ni líi nyanbeleyi na í, wi si o wi nyapiigèle yìrigí ni Isirayɛli kpáagi wòolo yasunyo wéle í, wi si o wi syɛɛnnyɛnnɛ cɔ́ɔ yúu í,

¹⁶ wi si o syɔɔn nɔ̀ʔɔrɔ́ ni líi í, wi si o yarigaa syoo fwɔɔlɔ nyɔ́ɔ ni í, wi si o yúu í, ní si i wi lìilaa kaangi kateèjaaɔ ma, ní i burogo nii wee na wi nyɛ lè cepyá,

¹⁷ wi si o fungbanga kpéʔele ní foomɔfɔw ní í, wi si o tɔ̀nɔ syoo wàlá tɔ̀nɔpeeo í, ní si i mii kajoodɛɛngèle, ní mii làlwaw kèlē có, wee bee a kùu wi tóow kolomɔ kéele na í, wi a tɔ̀nɔ́ kòro sìi na.

¹⁸ Wi tóow wi da pye fǎngi gbànvɔlɔ, ní i wi senyɛnbèle yúu, ní i gi kpéʔele wi syɛ́ɛnbèle nínge ni, gee gi lè ki ga nyɔɔ í, woro wi a kùu wi kolomi kéele na.

¹⁹ Yele i gi nyuu níì jo: ‹Nyàʔá na jaafɔw o tofɔw kolomɔ túgoro tugu í?› Gee bee n taa níì cán jaafɔw n gi kpéʔele n yɛlɛ ní kányɛɛgi, ní sínni ní, ní wɔ́ɔ̀ mii làlwaw kèlē myɛ cò ní i ge kpéʔele. Wi a tɔ̀nɔ́ kòro sìi na.

²⁰ Wee wi ga kapeeli pye lè, woro wi a kùu. Jaafɔlɔ a wi toò kapeele túgoro tugo í, tofɔlɔ a wɔ́ɔ wi jaà kapeele túgoro tugo í. Syɛɛnsinw sínnɛ a kòro wi tiimaw na, syɛɛnpeew péemɛ í kòro wi tiimaw na.

Kɛɛlɛlɛ syɛ́ɛnrɛ, kacànbyeri kéele na

²¹ «Syɛɛnpeew ga láʔa kapeegèle myɛ na wi kpéʔele lè, wi ga mii làlwaw kèlē ní sínni sámaga n cò, wi a tɔ̀nɔ́ kòro sìi na, wi a kùu í.

²² Kapeegèle myɛ wi kpéʔele lè, ke a ní córo wi kurugo í. Wi a kòro sìi na sínni báriga ni, lee wi kpéʔele lè.

²³ A mii i syɛɛnpeew kùu caa lé? Kàfɔw Yawe wi jo nya. Gee mii caa lè koro ban gi nyɛ wi wàli bi yiri wi kólogi ni si kòro sìi na ì?

²⁴ Kàjáa syɛɛnsiɔn ga láʔa wi sínni na, ní i gi kpéʔele, gee gi pee lè, kapeeyee myɛ syɛɛnpeew kpéʔele lè, wi ga ni yee bee tɛ́ɛlɛ, wi a kòro lé sìi na? Sínni kèlē myɛ wi kpéʔele lè, pe a ní ge córo wi ma í. Sìnzinmi báriga ni, bee má wi wiyɛɛ gaan lè, ní kapeeli báriga ni, lee wi kpéʔele lè, koro ki a wi kaan wi kùu.

²⁵ Yele wɔ́ɔ i gi nyuu níì jo: ‹Kàfɔw kólogo ga nyɔɔ í.› Koro na ye lóʔo Isirayɛli kpáagi wòolo. Mii kólogi lé gi nyɛ ki ga nyɔɔ í? Yele kóloyi ban yi nyɛ yi ga nyɔɔ í ì?

²⁶ Syɛɛnsiɔn ga láʔa wi sínni na níì kakologo kpéʔele níì kùu, kakologi kéele na wi a kùu, gee wi kpéʔele lè.

²⁷ Syɛɛnpeeo ga láʔa wi péemi na wi kpéʔele lè, ní i kányɛɛgi ní sínni kèlē kpéʔele, wi a gi yaʔa woro sìíw í syɔɔ.

²⁸ Wi ga tɛ́nɛ̀ gi nyaa níì láʔa kapeeyi myɛ na, yee wi kpéʔele lè, wi a tɔ̀nɔ́ kòro sìi na, wi a kùu í.

²⁹ Bi si gi taa Isirayɛli kpáagi wòolo i gi nyuu níì jo: ‹Kàfɔw kólogo ga nyɔɔ í.› Mii kóloyi lé yi nyɛ yi ga nyɔɔ í, Isirayɛli kpáagi wòolo? Yele kóloyi ban yi nyɛ yi ga nyɔɔ í ì?

³⁰ Koro na mii a kútiiw kúun yele myɛ nibin nibin na bi yɛlɛ ní yele kóloyi ní, Isirayɛli kpáagi wòolo, Kàfɔw Yawe wi jo nya. Ye lúru ye pan, ye láʔa yele kapeeyi na, koro ga pye yele kolomi a kɔ́ pye kàdɛnɛ-gbírigege í.

³¹ Ye kapeeyi myɛ láʔa yeyɛɛ na ye wáa léelige, yee yele kpéʔele mii na lè, ye funvɔnyɔ ní pìifɔngéle le yeyɛɛ ni. Nyàʔá na gi yɛlɛ yele í kɔ́ kùu, Isirayɛli kpáagi wòolo?

³² Níì cán syɔɔnwaa faala kuu kéele tɔ̀nɔ́ o nyɛ mii kanidaanna í. Kàfɔw Yawe wi jo nya. Koro na, ye kàri, yé kòro sìi na.»