Ezekyɛli 16 - Cebaara Bible 2010

Zyerusalɛmi maa pye calipilaa, lee be yaʔa lè

¹ A Yawe syɛ́ɛnri nan mii na, wi n jo:

² «Syɔɔn-pya, Zyerusalɛmi kapeekpoloyi tɛ̀ɛn wi na wi yi cán.

³ Mɔ a gi joo si jo: ‹Kàfɔw Yawe wi syɛ́ɛnri naa nyuu Zyerusalɛmi ma níì jo: Bi yɛlɛ ní mɔ sélimi, ní mɔ seeli ní, mɔ i nyɛ Kanaan ye tári wówaa. Mɔ tóow n pye Amɔri ye wóo, mɔ nɔ́ɔw si i nyɛ Hɛti ye wóo.

⁴ Mɔ larizeeli ni, cángee na mɔ see lè, n mɔ kunnangi yaʔa sìnjeri ni, pe da kɔ́ɔ̀ mɔ wéli lɔ̀ʔɔ ni n mɔ nɔ́nʔɔri láʔa mɔ na í, pe da kɔ́ɔ̀ sólomi tɛ́ʔɛ n mɔ kurugo í, pe da kɔ́ɔ̀ mɔ mígi fànibēle ni í.

⁵ Syɔɔn faala ga téè mɔ wéle níì nyinimɛ taa mɔ na níì kéeli bee làa nibin kpéʔele mɔ na nyinimi báriga ni í, kàjáa pe maa mɔ wáa séyi ni mɔ canzeegi na, níì cán mɔ kéeli maa be bɛɛn.

⁶ Mii maa ni sɔ̀lɔ́ mɔ taana, a mii mɔ wéle n nyaa a mɔ i kirigi mɔ sisyaanw ni, a mii mɔ pye: Pye sìi na mɔ sìsyaanw ni! N níì mɔ pye: Pye sìi na mɔ sisyaanw ni!

⁷ Mii n mɔ yìrige a mɔ tɔnɔ àmɛɛ yáriri nyɛ di fíin séyi ni lè. Mɔ n yìri n lɛɛ. Mɔ n tɔnɔ, níì nyɔɔ n foro, a mɔ doogi nyìn, a mɔ síiri yiri. Kàjáa mɔ maa pye níbori, wowaaɔ ní fée.

⁸ Mii maa ni sɔ̀lɔ́ mɔ taana, a mii i mɔ wéle n gi nyaa mɔ lali n nan, li lè tàmagi làla. A mii mii burogbɔɔgi búronyɔɔ tɛ́ʔɛ n mɔ tɔ́n, a mii mɔ níboriw tɔ́n. A mii kàli mɔ ma, n joogaanna kpéʔele ní mɔ ní, Kàfɔw Yawe wi jo nya, a mɔ pye mii wóo.

⁹ Mii n mɔ wéli lɔ̀ʔɔ ni, a mii sìsyaanw láʔa, wee wi da pye mɔ na lè, níì mɔ tíre ní sìnmɛ ní.

¹⁰ A mii burozuuyo le mɔ na, níì salicànya taʔalaya le mɔ na, níì lɛn fàni fɛ́ɛlɛfɛɛlɛɔ tɛ́ʔɛ n mɔ pwɔɔ sárigèle ni, níì suwa fàni tɛ́ʔɛ n mɔ tɔ́n.

¹¹ Mii n fèrere yárira le mɔ na, toro di nyɛ, mii n kajingèlē le mɔ kɔ́yi na, n kɔ́nɔtirige le mɔ yátiigi ni,

¹² mii n vèʔeo le mɔ fínaani na, n vèʔebēle le mɔ líiyi na, ní fànʔafɔ-nyùndɔnnɔ ferere mɔ nyúngi ni.

¹³ Kánmi bee na mɔ fère ní tɛɛ̀, ní wálifiio ní, á lɛn fàni fɛ́ɛlɛfɛɛlɛɔ, ní suwa fàni, ní fànisuuo wɔ́ɔ̀ le mɔ na. Mɔ maa ni míivɔɔnimɔ, ní sárigā, ní sìnmɛ líi, a mɔ tɔ̀nɔ n baa nyɔɔ gbanʔama n yɛlɛ ní fǎngi ní.

¹⁴ A mɔ mɛ́ɛgi yiri tári syɛɛnfeleye nínge ni, mɔ nijanri kéele na, níì cán ti maa tɔ̀nɔ n nyɔɔ n foro, nìjanri darigala báriga ni, dee ní mii da mɔ fère lè,› » Kàfɔw Yawe wi jo nya.

Zyerusalɛmi n wiyɛɛ bye nànjaacɔɔ̀

¹⁵ « ‹Kàjáa a mɔ miyɛɛ gaan mɔ nijanri ma, níì miyɛɛ gbéʔele nànjaaɔ mɔ mɛ́ɛgi yirile báriga ni. Mɔ n miyɛɛ gaan nànjaari ma, kozɔ̀lɔɔ o kozɔ̀lɔɔ, mɔ n miyɛɛ bye wi woò.

¹⁶ Mɔ n yàa láa mɔ búroyi ni, mɔ n sáriga-wòlo-tɛ́ɛyɛ sámaga ní kulɛɛri-nɛʔɛbéle fani ní, níì miyɛɛ gbéʔele nànjaaɔ yi ǹjogi ni. Ki felege da kɔ́ɔ̀ kpéʔele í, ki si a ní wɔ́ɔ kpéʔele nyáana í.

¹⁷ Mɔ n mɔ fereri yárira láa, dee di sámaga ní mii tɛ́ɛw, ní mii wálifiiw ní mii da kaan mɔ ma lè n nànbēle niwiriye sámaga, yoro yee ní mɔ nànjaari kpéʔele lè.

¹⁸ Mɔ n mɔ burozuuyi láa n le yi na, ní i mii sǐnmi ní mii nùndaanni yáriga wóo sáriga yi ma.

¹⁹ Lìíli mii da kaan mɔ ma lè, li lè míivɔɔnimi, ní sǐnmi, ní sárigi, dee ní mii da ni mɔ gbóo lè, mɔ n yáriri bee wòlo yi ma sáriga n pye àmɛɛ nùndaanna yáriga nyɛ lè. Wéle, koro ki baa kpéʔele,› Kàfɔw Yawe wi jo nya.

²⁰ ‹Mɔ nanbiigèle, ní mɔ calipiigèle mɔ da see mii ma lè, mɔ n gele bee cò n wòlo yi ma sáriga, jàngó ge pye yi ma lìile. Mɔ nanjaari ga nɛʔɛ n yɛlɛ nya ì?

²¹ Mɔ n mii pìíbèle kɔnɔgi, níì be kaan a pe be le náagi ní, yi kpɔ̀ʔɔrɔli kéele na.

²² N mɔ yaʔa mɔ yanɔnʔɔyi myɛ pyele, ní mɔ nanjaari na, mɔ ga téè sɔ̀ngi n taa mɔ cárimi làla na í, lǎli ni mɔ da pye lè níbori, wowaaɔ ní fée, ní i kirigi mɔ sìsyaanw ni.

²³ Mɔ péemi kapyere myɛ kàdoʔo ma, ki n yɛlɛ wɔʔɔgi í pye mɔ na, wɔʔɔgi í tɔ̀nɔ́ pye mɔ na!› Kàfɔw Yawe wi jo nya,

²⁴ ‹ncan mɔ n kpaapiigéle faan miyɛɛ wòʔolo, mɔ n sáriga-wòlo-tɛ́ɛgéle sámaga kadàlayi myɛ na.

²⁵ Kologo o kologo tɛɛ̀jeele na, mɔ n sáriga-wòlo-tɛ́ɛgéle faan yaà miyɛɛ wòʔolo, mɔ n mɔ nijanri nɔ́nʔɔ, mɔ n miyɛɛ gaan kozɔ̀lɔbèle myɛ ma, mɔ n kàa fàra mɔ nanjaari na.

²⁶ Mɔ n miyɛɛ gbéʔele nànjaaɔ ní Ezyipiti nǎnbèle ní, pe lè mɔ tɛ́ɛnnyɛnbèle, pe lè fànnɛʔɛgi fɔ̀ɔlɔ, mɔ n kàa fàra mɔ nanjaari na jàngó bi mii fúngi tanʔa.

²⁷ Wéle, mii n mii kɔ́gi sánʔa mɔ kánmi na, mii n kàa wòlo mɔ kɔrilɛɛli ni, níì mɔ le mɔ nigoobèle kɔ́yɔ ni pe lè Filisitini ye calipiigèle, poro bele na mɔ tánʔaganbeemi nyɛ lè fɛ̀ɛrɛ.

²⁸ Mɔ n miyɛɛ gbéʔele nànjaacɔɔ̀ ní Asirii nǎnbèle ní, níì cán mɔ da tín í, a mɔ miyɛɛ gbéʔele nànjaacɔɔ̀ ní be ní, mɔ ga sèʔê tín í.

²⁹ Mɔ n kàa fàra mɔ nanjaari na ní jàgiwáa-tári wòolo ní, pe lè Kalide ye, gee bee ní gi myɛ ní mɔ ga sèʔê tín í.

³⁰ Mɔ fúngi fànʔa wéle àmɛɛ gi tɔ̀nɔ n cɛ́rɛ lè› Kàfɔw Yawe wi jo nya, ‹àmɛɛ mɔ kérigèle bee myɛ kpéʔele lè n yɛlɛ ní nànjaa-sanbali kapyele ní!

³¹ Lǎli ni mɔ ga mɔ kpaapilaa faan lè kologo o kologo tɛɛ̀jeele na, níì mɔ sáriga-wòlo-tɛ́ɛgèle sámaga kadàlayi myɛ na, mɔ o gáā sàra syoo àmɛɛ nànjaacewaa nyɛ lè í.

³² Mɔ n pye kanɔnʔɔbyecɔɔ̀, wee wi fɔ̀lɔ́ nibɔnbèle na lè wi nǎnw sìndɛʔɛ ni.

³³ Pe i kpɔʔɔrɔ kaangi nànjaacebèle myɛ ma, mɔ si na, mɔ wi kpɔ́ʔɔri kaangi nǎnbèle myɛ ma be mɔ caa lè, mɔ n be kárima n taa kàbanyi myɛ na mɔ yakaanri báriga ni, jàngó bi be kíle miyɛɛ ma mɔ nanjaari báriga ni.

³⁴ Mɔ n mɔ nanjaari yaʔa a di fàli cesanbèle wóro ni, pe da ni mɔ caa í. Mɔ wi da ni sàraw kaangi be ma, wàa si da ni sàra kaangi mɔ ma í. Kánmi be na mɔ da gi súru n pye.

³⁵ Awá, mɔ nànjaacɔɔ̀, ki n yɛlɛ mi Yawe syɛ́ɛnri lóʔo.›

³⁶ Kàfɔw Yawe wi syɛ́ɛnri naa joo níì jo: ‹Ncan mɔ maa mɔ fɛɛri yirige n càli, n mɔ níborigi tɛ̀ɛn mɔ nanjaari làla ni ní bele ní pe da ni mɔ caa lè, ní mɔ yasunnɔnʔɔyi myɛ ní wɔ́ɔgēle, mɔ piibèle sìsyaan kéele na, bele mɔ kaan yi ma lè,

³⁷ gee bee na wéle, bele myɛ pe da ni mɔ caa lè mii a be kpóʔoro, poro bele ní mɔ da ni kínidɛnɛgi kpéʔele lè, bele myɛ kéele li mɔ dɛ́nɛ lè, ní bele myɛ kéele li mɔ bɛɛn lè, mii a be yìrige kàbanyi myɛ na bi kpóʔoro mɔ kánmi na, mii a mɔ níborigi múgu yaʔa be ma, pe a mɔ níborigi myɛ nyaa.

³⁸ Mii a mɔ kútiiw ceri àmɛɛ be kanɔnʔɔbyecebèle kútii cɛnɛ lè, n fàra cébèle bele na be sìsyaanw ŋuu lè, mii a mɔ cáan sìnsyaan ni mii fundanʔagbɔɔri, ní mii yéjaagi báriga ni.

³⁹ Mii a mɔ le be kɔ́yi ni. Pe a mɔ kpaapiigèle cáan, bi mɔ sáriga-wòlo-tɛ́ɛgèle kálagi. Pe a mɔ búroyi wòlo mɔ na, bi mɔ fereri yárira láa si mɔ yaʔa níbori, wowaaɔ ní fée.

⁴⁰ Pe a syɛɛnmɛ kɔ́ri wáa mɔ na, pe a mɔ wábagi ní kàdɛnɛri ní, si mɔ súu fùru ní ŋɔsée ní.

⁴¹ Pe a mɔ kpáayi sórigo ní naà ní, pe a kútiiw kèlē kpéʔele foro mɔ na, cenɛʔɛmɛ nyapiigéle í gi nyaa. Mii a mɔ nanjaari kwɔ́ɔ, mɔ a ní da sàra kaangi í.

⁴² Mii a gi sìndɛɛgi wòlo mɔ ni bi mii fundanʔagbɔɔri kwɔ́ɔ, mii yéjaagi si láʔa mɔ na. Mii a mii fúngi tìrige, mii fundanʔari a kwɔ́ɔ.

⁴³ Amɛɛ gi nyɛ lè mɔ ga sɔ̀ngi n taa mɔ cárimi làla na í, ní àmɛɛ mɔ kérigèle bee myɛ tɛ́ʔɛ n mii ŋɔ́n lè, wéle, gee mii a wɔ́ɔ pye lè koro gi nyɛ mii a mɔ tánʔaganmi yaʔa pi lúru kòro mɔ nyúngi ni,› Kàfɔw Yawe wi jo nya. ‹Mɔ ga kálagimi kpéʔele n fàra mɔ yanɔnʔɔyi myɛ na ì?

Zyerusalɛmi n pee n sɔ̀lɔ kèsanyi na

⁴⁴ « ‹Wéle, kàseewaabèle myɛ a ra kàseeli naa wáa mɔ kéeli na si jo: Amɛɛ nafɔw nyɛ lè, ànbée pìifɔw nyɛ!

⁴⁵ Mɔ i nyɛ mɔ nafɔw calipile, woro wee wi wiyɛɛ láaw wòlo wi nǎnw, ní wi pìíbèle ni lè, mɔ i nyɛ mɔ senyɛnjebèle senyɛnnɛ, poro bele be peyɛɛ láaw wòlo pe nǎnbèle, ní be pìíbèle ni lè. Yele nɔ́ɔw maa pye Hɛti ye wóo, yele tóow si i nyɛ Amɔri ye wóo.

⁴⁶ Mɔ yɛʔɛfɔw wi lè mɔ senyɛnjew, wi nyɛ lè wodɛ́ɛɔn ní mɔ kamɔnɔ ma, woro wi nyɛ Samarii, ní wi calipiigèle ní, mɔ cɔnɔw wi lè mɔ senyɛnjew, wi nyɛ lè wodɛ́ɛɔn ní mɔ kaliige ma, woro wi nyɛ Sodɔmi, ní wi calipíigèle ní.

⁴⁷ Mɔ ga tánʔa be kóloyi ni yagana í, ní wɔ́ɔ̀ be yanɔnʔɔyi yagana kpéʔele í, toro n pye kapiipiile. Mɔ n kálagi n sɔ̀lɔ poro na mɔ kóloyi myɛ ni.

⁴⁸ Mii woweew mɛ́ʔɛ na,› Kàfɔw Yawe wi jo nya, ‹Sodɔmi wi lè mɔ senyɛnjew, gee yele kpéʔele lè mɔ ní mɔ piibèle ní, woro ní wi pìíbèle ga gi kpéʔele í.

⁴⁹ Wéle, gee gi pye lè Sodɔmi kolomi wi lè mɔ senyɛnjew, koro gi nyɛ nɛ̀ɛnyɛnɛgi maa pye wi ma, a yaliiri wi tín, wí i nyɛ sági kasɔngunɔ fun, woro ní wi calipiigèle ní, wi si da ni fànʔa nii fɔ̀rɔgɔfɔlɔ, ní foomɔfɔlɔ kɔ́yɔ ni í.

⁵⁰ Nɛ̀ɛgbɔʔɔgɔ n baa jée be ni, a be kapeekpɔʔɔ kpéʔele mii yɛ́ʔɛ ma. A mii si be kwɔ́ɔ n yirige yaà, àmɛɛ mii gee bee nyaa lè.

⁵¹ Samarii na, wi ga mɔ kapeegèle félege tíla kpéʔele í. Mɔ kapeekpoloyi maa nɛʔɛ n sɔ̀lɔ wi wóyi na, á mɔ gi kaan a mɔ senyɛnjebèle sín kapeekpoloyi myɛ báriga ni, yee mɔ kpéʔele lè.

⁵² Mɔ wee wi da ni kútiiw kúunri mɔ senyɛnjebèle na lè, ki n nan mɔ na mɔ í mɔ faʔari kún miyɛɛ ni, kapeegèle kéele na, gele mɔ kpéʔele lè, n miyɛɛ pee n sɔ̀lɔ be na, a koro be sín n sɔ̀lɔ mɔ na. Fɛ̀ɛrɛ n yɛlɛ bi wɔ́ɔ mɔ taa, mɔ faʔari kún miyɛɛ ni, àmɛɛ mɔ mɔ senyɛnjebèle sín lè.

⁵³ Pe wóbèle be cò n kári lè, mii a be lúrugo pan, gee bee n jo Sodɔmi nànbiigèle, ní wi calipiigèle be cò n kári lè, ní Samarii nànbiigèle, ní wi calipiigèle be cò n kári lè, mɔ wóbèle be cò n kári lè poro si pye pe wóbèle nínge ni,

⁵⁴ koro ga pye mɔ í mɔ faʔari kún miyɛɛ ni, fɛ̀ɛrɛ si wáa mɔ na gee myɛ kéele na mɔ kpéʔele lè, koro a be kpɛʔɛlɛ.

⁵⁵ Mɔ senyɛnjew Sodɔmi ní wi calipiigèle a lúru ba pye be kanlɛɛmi na, mɔ senyɛnjew Samarii ní wi calipiigèle í lúru ba pye be kanlɛɛmi na, mɔ ní mɔ calipiigèle í lúru ba pye yele kanlɛɛmi na.

⁵⁶ Mɔ nyɔ́ɔgi da ni mɔ senyɛnjew Sodɔmi mɛ́ɛgi jáari ni máari mɔ nɛɛnyɛnɛgi canʔa na ì,

⁵⁷ sáni mɔ péemi í yiri kàfugi na lè ì? Tɔ́ɔliw ni mɔ si i nyɛ tɛʔɛlɛgɛ yáriga Edɔmi calipiigèle ma, ní gele ma ge wi màʔa lè, ní Filisitini calipiigèle ma, koro gele ke mɔ faari lè kabanyi myɛ na.

⁵⁸ Kánmi bee na mɔ mɔ kapeekpoloyi ní mɔ yanɔnʔɔyi túgoro tugo,› Yawe wi jo nya.

⁵⁹ Níì cán Kàfɔw Yawe wi syɛ́ɛnri naa joo níì jo: ‹Gee mɔ kpéʔele lè koro félegi mii a kpéʔele mɔ na, mɔ wee wi kàligi faʔa lè àmɛɛ mɔ joogaanni kálagi lè.

⁶⁰ Mii si na, mii a sɔ̀ngi bi taa mii joogaanni na, lee mii kpéʔele ní mɔ ní mɔ cárimi làla ni lè, si bàngwɔɔ joogaanna kpéʔele ní mɔ ní.

⁶¹ Mɔ a sɔ̀ngi bi taa mɔ tánʔaganmi na, fɛ̀ɛrɛ si mɔ taa, lǎli ni mɔ a fɔ̀lɔ mɔ senyɛnjebèle na lè, wogbolobèle, ní wobiigèle, mii a be kaan mɔ ma mɔ piibéle, kàjáa gee bee a pye mɔ joogaanni kéele na mii kpéʔele ní mɔ ní lè í.

⁶² Mii a mii joogaanni kpéʔele ní mɔ ní, mɔ si gi cán bi cán mii wi nyɛ Yawe,

⁶³ koro ga pye mɔ í sɔ̀ngí taa gee na gi sɔ̀lɔ lè, fɛ̀ɛrɛ si mɔ taa. Koro ga pye mɔ a ní kɔ́ nyɔɔ múgu í, mɔ fɛɛri kéele na, lǎli ni mii ga mɔ kapeegèle kùsulugo fáli kpéʔele lè kérigèle myɛ kéele na mɔ kpéʔele lè,› » Kàfɔw Yawe wi jo nya.