Ezekyɛli 15 - Cebaara Bible 2010

Ɛrɛzɛn tírigi gi kaan náagi ma lè

¹ A Yawe syɛ́ɛnri nan mii na, wi n jo:

² «Syɔɔn-pya, nyàʔá gi nyɛ ɛrɛzɛn tírigi kàjege ma, gee ki gi pɔ́rɔ n sɔ̀lɔ lè tíiyi wozanya káganya na yi nyɛ lè kɔ́ligi ni?

³ A tiige a gbǎn ceri lé bi yirige gi ni bi tɛ́ʔɛ yarigaa sámaga? A kàa a gbǎn ceri lé bi sámaga cèfele bi gbǎn yarigaa faala cɔ̀rɔ li na?

⁴ Pe i gi nii náagi ni ki n ni gi líile, náagi n gi nyúnyi siin líile, ki níngi n ni sóori, a gi si a ní gbǎn sámaga lé yarigaa?

⁵ Alí n gi yaʔa wobogo ní, ki da pye bi gbǎn sámaga yarigaa í, n náa kɔ́ɔ̀ yére lǎli ni náagi gi líile lè, ki gbǎn sámaga lé yarigaa?»

⁶ Koro na Kàfɔw Yawe syɛ́ɛnri naa joo níì jo: «Amɛɛ ɛrɛzɛn tírigi kàjege nyɛ lè kɔligɔ tiire nínge ni, àmɛɛ tíigi nyɛ, gee mii kaangi náagi ma lè jàngó kaa gi líile, kánmi bee na mii a Zyerusalɛmi ye kpéʔele.

⁷ Mii a mii yɛ́ɛgi wáa be ma. Pe n yiri náagi ni, náagi si a be líile. Yele a gi cán bi cán mii wi nyɛ Yawe, lǎli ni mii ga mii yɛ́ɛgi fíige be ma lè.

⁸ Mii a tári kàriga tɛɛ̀kalagiga níì cán pe n peyɛɛ gaan sìnzinmi ma,» Kàfɔw Yawe wi jo nya.