Ezekyɛli 14 - Cebaara Bible 2010

Isirayɛli ye n yɛlɛ bi yasunyi wáa

¹ A Isirayɛli wolɛɛbèle pèle pan mii ma ní baa tɛ́ɛn mii yɛ́ʔɛ ma.

² A Yawe syɛ́ɛnri nan mii na, wi n jo:

³ «Syɔɔn-pya, nǎnbèle naa n be yasunyi tugo be fúnyi ni, pe i kàdɛnɛ-gbírigegi téeri peyɛɛ yɛ́ʔɛ ma, gee gi be cáan lè kapeebyeri ni, mii si niyɛɛ yaʔa lé pe mii yíbe?

⁴ Koro na joo ní be ní, mí be pye: ‹Kàfɔw Yawe wi syɛ́ɛnri naa joo níì jo: Isirayɛli kpáagi nǎnwee ga wi yasunyi tugo wi fúngi ni lè, níì kàdɛnɛ-gbírigegi tɛ́ʔɛ wiyɛɛ yɛ́ʔɛ ma, gee gi wi cáan lè kapeebyeri ni, níì pan ba joo ní kanyaajoow ní, mii Yawe, mii wi a syɛɛnlurugori kaan wi ma, wi yasunnɛʔɛri kéele na.

⁵ Kánmi bee na Isirayɛli kpáagi wòolo be léeli mii na lè be yasunyi myɛ kéele na, pe a cò be tiimaa fúnyi ni.›

⁶ Koro na ki joo Isirayɛli kpáagi wòolo ma mí be pye: ‹Kàfɔw Yawe wi syɛ́ɛnri naa joo níì jo: Ye kàri, ye láʔa yele yasunyi na, ye kàdoʔo wáa yele yanɔnʔɔyi myɛ ma.›

⁷ Níì cán Isirayɛli kpáagi nànwaa, wàlá nibɔnbèle pe baa tɛ́ɛn Isirayɛli tári ni lè, pe wàa ga léeli mii na n wi yasunyi tugo wi fúngi ni, níì kàdɛnɛ-gbírigegi tɛ́ʔɛ wiyɛɛ yɛ́ʔɛ ma, gee gi wi cáan kapeebyeri ni lè, níì pan n baa joo ní kanyaajoow ní bi mii yíbe, mii Yawe, mii tiimaa wi a syɛɛnlurugori kaan wi ma.

⁸ Mii a yɛʔɛ̀ wáa nǎnw bee ma, mii a wi pye fɛ̀ɛ, ní kàseewaa-yáriga, mii a wi kwɔ́ɔ yirige mii syɛ́ɛnbèle nínge ni, yele a gi cán bi cán mii wi nyɛ Yawe.

⁹ Kanyaajoow ga wiyɛɛ yaʔa a be fáana n pùuni níì syɛɛnraa joo, ki a pye mii Yawe wi kanyaajoow bee fáana n pùuni, mii a kɔ́gi sánʔa wi kánmi na, si wi kálagi yirige mii syɛ́ɛnbèle Isirayɛli ye níngi ni.

¹⁰ Pe a be kolomi túgoro tugo. Kanyaajoow kolomɔ a pye àmɛɛ wi yíbefɔw wómɔ nyɛ lè,

¹¹ koro ga pye Isirayɛli kpáagi wòolo a ní kɔ́ pùuni bi léeli mii na í, pe a ní kɔ́ be kapeebyeri tɛ́ʔɛ bi peyɛɛ nɔ́nʔɔ í. Lǎli bee ni pe a pye mii syɛ́ɛnbèle, mii si pye be Kolocɔlɔw,» Kàfɔw Yawe wi jo nya.

Yafyɛn a Kolocɔlɔɔ kútiiw sàa í

¹² A Yawe syɛ́ɛnri naa joo mii ma níì jo:

¹³ «Syɔɔn-pya, táraa ga kapeele pye mii na n sìnzinmɛ naʔama kpéʔele, mii ga mii kɔ́gi sánʔa di kánmi na n lìíli ceri n láʔa be na níì kateekpɔɔgi tórigo be kurugo, mii ga syɛ́ɛnbèle ní yaweeri kwɔ́ɔ n yirige yaà,

¹⁴ á nǎnbèle naa taanri pye di ni pe lè Nowe, ní Danyɛli, ní Zyɔbi, syɛ́ɛnbèle bee a peyɛɛ sìíw syɔɔ pe sínni báriga ni, Kàfɔw Yawe wi jo nya.

¹⁵ Mii ga yaweepeeye yaʔa yi tári fǎn foro, á yi di kàriga syɛ̀ɛnnɛ fun, ní tɛɛ̀kalagiga, beè lè syɔɔn a ra sɔ̀lɔ́ í, yaweepeeyi bee kéele na,

¹⁶ àlí nǎnbèle bee taanri ga pye di ni, mii woweew mɛ́ʔɛ na, Kàfɔw Yawe wi jo nya, pe a gbǎn nànbile wàlá calipile syɔɔ í, poro yagwɔɔlɔ pe a syɔɔ, tári si kàri bi pye tɛɛ̀kalagiga.

¹⁷ Wàlá mii ga ŋɔséew yaʔa wi pan tári bee kánma na, mii ga gi joo níì jo: ‹Ŋɔséew n yɛlɛ wi tári fǎn foro, mii ga syɛ́ɛnbèle ní yaweeri kwɔ́ɔ n yirige di ni,

¹⁸ á nǎnbèle bee taanri si i nyɛ di ni, mii woweew mɛ́ʔɛ na, Kàfɔw Yawe wi jo nya, pe a gbǎn nànbile wàlá calipile syɔɔ í, kàjáa poro yagwɔɔlɔ pe a syɔɔ.

¹⁹ Wàlá mii ga káfalagi yáama lége tári bee ni, mii ga kùúw cáan di na mii fundanʔagbɔɔri báriga ni, bi syɛ́ɛnbèle ní yaweeri kwɔ́ɔ bi yirige yaà,

²⁰ á Nowe, ní Danyɛli, ní Zyɔbi pye di ni, mii woweew mɛ́ʔɛ na, Kàfɔw Yawe wi jo nya, pe a gbǎn nànbile wàlá calipile syɔɔ í. Kàjáa pe a peyɛɛ sìíw syɔɔ pe sínni báriga ni.› »

²¹ A Kàfɔw Yawe si níì syɛ́ɛnri naa joo níì jo: «Alí mii ga wírè mii wɔʔɔbeeyi sicɛrɛ tórigo Zyerusalɛmi kánmi na, yi lè ŋɔséew, ní kateekpɔɔgi, ní yaweepeeyi, ní káfalagi yáama bi syɛ́ɛnbèle ní yaweeri kwɔ́ɔ yirige wi ni,

²² Wéle, pèle ga kòro wi ni sìi na, bele pe a syɔɔ bi yiri lè, pe lè nànbiigèle, ní calipiigèle, bele bee a pan yele ma, yele a be tánʔaganmi, ní be kapyegèle nyaa, yele si yeyɛɛ kpɛʔɛlɛ wɔʔɔgi kéele na, gee mii yaʔa a ki baa too Zyerusalɛmi na lè, gee myɛ mii yaʔa a ki baa too wi na lè.

²³ Pe a yele kpɛʔɛlɛ lǎli ni yele ga be tánʔaganmi ní be kapyegèle nyaa lè. Yele a gi cán bi cán gee myɛ mii kpéʔele wi na lè, mii ga gi kpéʔele wi na nyùngo fun í.» Kàfɔw Yawe wi jo nya.