Ezekyɛli 13 - Cebaara Bible 2010

Gee gi joo lè kanyaajoo-fáanabèle kánma na

¹ A Yawe syɛ́ɛnri nan mii na, wi n jo:

² «Syɔɔn-pya, kérigèle nyaa mi joo Isirayɛli kanyaajoobèle kánma na be kérigèle nyaagi ni nyuu lè, mɔ a gi joo bele má be kérigèle nyaagi ni nyuu lè ni yɛlɛgi ní be tiimaa funzɔngumi ní, mí be pye: ‹Ye Yawe syɛ́ɛnri lóʔo.

³ Kàfɔw Yawe wi syɛ́ɛnri naa joo níì jo: Wɔʔɔli a pye kanyaajoo-nilabalayi na, yoro yee yi yiyɛɛ daʔa yi tiimaa pìígèle na lè yarigaa sìnnyaa ni.

⁴ Ee Isirayɛli, àmɛɛ sɔriyɔ nyɛ lè kataʔa ni ànbée mɔ kanyaajoobèle nyɛ.

⁵ Yele ga lúgu n yére wéeyi na í, yele ga kàkɔlɔgɔ faan n Isirayɛli kpáagi wòolo màʔa í, jàngó be sámaga yére kapɛɛnni kánma na Yawe cángi na í.›

⁶ Pe yanyaayi i nyɛ gbanzan, pe kanyaajoori i nyɛ jànvaa. Pe i gi nyuu níì jo: ‹Yawe n jo!› Bi gi taa Yawe ga be tun í. Pe n syɛ́ɛnbèle kaan a pe be sɔ̀ngumi taʔa poro syɛ́ɛnri na n jo ti a foro.

⁷ Yanyaayi yele nyaagi lè, yi o nyɛ gbanzan ì? Ba nyɛ̀ʔɛna kérigèle yele nyuu ni tèé lè, ke o nyɛ jànvaa ì? Yele i gi nyuu níì jo: ‹Yawe n jo!› Bi gi taa mii ga joo í.

⁸ Awá, Kàfɔw Yawe wi syɛ́ɛnri naa joo níì jo: Amɛɛ gi nyɛ lè yele syɛɛnjóori i nyɛ gbanzan, a yele yanyaayi i nyɛ jànvaa, àwá wéle, mii a tɔ̀nɔ́ keele tɛ́ʔɛ yele na, Kàfɔw Yawe wi jo nya.

⁹ Mii a mii kɔ́gi sánʔa kanyaajoobèle kánma na, poro bele yanyaaya yi nyɛ lè gbanzan, pe kanyaajoori si i nyɛ jànvaa. Pe lɛɛlɛ a pye mii syɛ́ɛnbèle gboolo ni í. Pe mɛ́ɛyi a sɛ́bɛ Isirayɛli kpáagi wòolo córomɔ sɛ́bɛ ni í. Pe a tée kári fwɔɔ bi sa nan Isirayɛli tásaligi na í. Yele a gi cán bi cán mii wi nyɛ Kàfɔw Yawe.

¹⁰ Gee bee a kpéʔele àmɛɛ be mii syɛ́ɛnbèle pùuní lè ní i gi nyuu níì jo: ‹Yɛɛ̀nyinge!› Lǎli ni ki nyɛ lè yɛɛ̀nyinge o yaà í. Mii syɛ́ɛnbèle i kàkɔlɔgɔ faanri, wéle, poro si i poofiiw téeri ni gi pòó.

¹¹ Ki joo bele má be poofiiw téeri ni gi pòó lè mí be pye: Ki a too! Zěkpɔʔɔ a pan zěsolo-kàdɛnɛrɛ a ra tuun, káfalakpɔʔɔ zàʔá a yìri.

¹² Tǒw wéle wi tuun lè wee! Pe a gi joo yele ma ì, si jo: Sán poofiiw nyɛ, wee yele tɛ́ʔɛ n wi pɔ̀li lè?

¹³ Awá! Kàfɔw Yawe wi syɛ́ɛnri naa joo níì jo: Mii a zàʔá káfalakpɔɔgi yìrige mii fundanʔagbɔɔri báriga ni. Zěpeʔe a pan mii fundanʔari báriga ni, zěsolo-kàdɛnɛrɛ sáā tuun ní fundanʔagbɔɔrɔ ní bi yáriri myɛ kwɔ́ɔ.

¹⁴ Mii a tǒw kpúmɔn cáan, wee yele pɔ̀li ní poofiiw ní lè, mii a wi ŋɔrigɔ cáan tári na, wi kàpɔɔnbèle a yiri kàfugi na. Pe a too, yele a kùu pe níngi ni, yele a gi cán bi cán mii wi nyɛ Yawe.

¹⁵ Mii a mii fundanʔagbɔɔri láa fwɔɔ bi sa nan di tɛɛ̀laʔali na bele kurugo pe wi pɔ̀li ní poofiiw ní lè. Mii a gi joo yele ma si jo: Tò ní o yaà í! Wi pɔ̀lifɔwaa ní o yaà í,

¹⁶ Isirayɛli kanyaajoobèle pèle i kérigèle nyaagi ni nyuu Zyerusalɛmi kéeli na, ní i yɛɛ̀nyingi yanyaaya nyaagi ni tèé gi kéeli na, bi gi taa yɛɛ̀nyinge o yaà í,» Kàfɔw Yawe wi jo nya.

Gee gi joo cɛ́lɛfɔ-jébèle kánma na lè

¹⁷ «Mɔ, syɔɔn-pya, mɔ yɛ́ɛgi fíige mɔ syɛ́ɛnbèle cálipiigéle ma koro gele ge kérigèle nyaagi ni nyuu lè n yɛlɛ ní ge tiimaa funzɔngumi ní, mí kérigèle nyaa mi joo ge kánmi na.

¹⁸ Mɔ a gi joo si jo: Kàfɔw Yawe wi syɛ́ɛnri naa joo níì jo: ‹Wɔʔɔli a pye cébèle bele na be nyùndaʔapiigéle sámagi lè kɔzogugèle myɛ kéele na, ní i nyùndɔn-fànibēle sámagi nyǔnyi kéele na n yɛlɛ ní syɛ́ɛnbèle myɛ tɔnɔganma ní, jàngó bàā syɛ́ɛnbèle sìi kárima da có. A yele a ra mii syɛ́ɛnbèle sìi kárima lé da có kánmi bee na, si sèʔé gbǎn yele sìíw yaʔa wi kòro beè yele ni?

¹⁹ Yele i mii mɛ́ɛgi kálagi mii syɛ́ɛnbèle yɛ́ʔɛ ma orizye kɔbonyɛ̀nnɛ kéele na, ní búruceriye kéele na, ní i syɛ́ɛnbèle kúu, bele be lè pe ga yɛlɛ ní kùu ní í, ní i bele yaari sìi na, bele be lè pe ga yɛlɛ bi kòro sìi na í, ní i finɛ mii syɛ́ɛnbèle ma, poro bele be fɔ̀lɔ́ jànvaaw lóʔolo na lè.

²⁰ Gee bee na Kàfɔw Yawe syɛ́ɛnri naa jo níì jo: Wéle, mii a keele tɛ́ʔɛ yele nyùndaʔapiigèle na, koro gele ge yele dɛ̀ɛmɛ́ lè sìíw kárima-còlo na, àmɛɛ gi kpéʔele féjɛɛngèlē na lè. Mii a ge sulugu láʔala yele kɔ́yi na, si sìíw núngo yaà, wee yele kárima n cò àmɛɛ féjɛɛngèlē nyɛ lè.

²¹ Mii a wɔ́ɔ yele nyùndɔn-fànibèle sulugu si mii syɛ́ɛnbèle yirige yele kɔ́yi ni, pe a ní pye karinyanya yele kɔ́yi ni í. Yele a gi cán bi cán mii wi nyɛ Yawe.

²² Ncan yele i syɛɛnsinw fúngo nyáʔami wi na ní jànvaaw ní, bi gi taa mii tiimaa o gi kálagi wi na í, ní àmɛɛ yele fànʔa nii syɛɛnpeew ni jàngó wi a kɔ́ láʔa wi kobeegi na si kòro sìi na lè í.

²³ Gee bee na yele a ní jànvaa yanyaagaa nyaa í, yele a ní yeyɛɛ gaan kanyaajoori ma í. Mii a mii syɛ́ɛnbèle yirige yele kɔ́yi ni. Yele a gi cán bi cán mii wi nyɛ Yawe.› »