Ezekyɛli 12 - Cebaara Bible 2010

Ezekyɛli i nyuu yiri-mí-kárili kéele na

¹ A Yawe syɛ́ɛnri nan mii na, wi n jo:

² «Syɔɔn-pya, mɔ i nyɛ wodɛ́ɛɔn ní niceebéle narigbaʔa nínge ni, bele na nyapiigèlē nyɛ lè paa nyaagi, pe si o nyaagi í, bele na líiweegéle nyɛ lè paa lúro, pe si o lúro í. Níì cán niceebéle narigbaʔa gii.

³ Mɔ, syɔɔn-pya, ki n yɛlɛ mi yirile túgoro sámaga àmɛɛ wojo-mí-káriɔ wóro nyɛ lè, mí yiri canviitelege ni pe nyɛnɛ na! Núngo tɛ́ɛgi ni mɔ nyɛ lè, maa syée tɛ́ɛgaa nikwɔɔ ma pe nyɛnɛ na, dɔ̀ʔɔ́ pe a gi nyaa bi cán poro i nyɛ niceebéle narigbaʔa.

⁴ Mɔ a mɔ yáriri yirige di pye àmɛɛ wojo-mí-káriɔ wóro nyɛ lè, canviitelege ni, pe nyɛnɛ na. Mɔ si a yiri cângwɔɔgi nyɔ́ɔ na pe nyɛnɛ na àmɛɛ wojo-mí-káribéle yirigi lè.

⁵ Weʔe fùru tǒw na pe nyɛnɛ na, mí mɔ yáriri yirige yaà beè.

⁶ Mɔ a di taʔa pɔ́gi na pe nyɛnɛ na, mɔ a di yirige yébilimi ni, mɔ a mɔ yɛ́ɛcɔɔli tɔ́n, jàngó mɔ a kɔ́ ra kǔli nyaagi í. Níì cán mii n mɔ kpéʔele fɛ̀ɛ Isirayɛli kpáagi wòolo ma.»

⁷ A mii gi kpéʔele, gee ki da joo n gbàn mii ma lè, mii n mii yáriri yirige canviitelegi ni àmɛɛ wojo-mí-káriɔ wóro nyɛ lè. A ki ga pye cângwɔɔgi nyɔ́ɔ na, a mii tǒw fùru ní kɔ́gi ní, níì di yirige yébilimi ni, níì di taʔa mii pɔ́gi na pe nyɛnɛ na.

⁸ A ki ga pye nyǐngi nyɔ́ɔ na, a Yawe syɛ́ɛnri nan mii na, wi n jo:

⁹ «Syɔɔn-pya, Isirayɛli kpáagi wòolo be lè niceebéle narigbaagi bee, pe ga gi joo mɔ ma níì jo nyàʔá mɔ kpéʔele ì?

¹⁰ Ki joo be ma mí be pye: ‹Kàfɔw Yawe n jo: Joogbanni naa syɛ́ɛnrɛ i nyɛ fànʔafɔbili wóro li nyɛ lè Zyerusalɛmi ni, ní Isirayɛli kpáagi wòolo myɛ be nyɛ lè wi ni.›

¹¹ Ki joo mí jo: ‹Mii i nyɛ yele ma fɛ̀ɛ.› Gee mii pye lè, koro ki a ba kpéʔele be na. Pe a cò bi kári.

¹² Fànʔafɔbili li nyɛ pe níngi ni lè, li a li túgori taʔa li pɔ́gi na yébilimi ni bi yiri. Pe a tǒw fùru si li yirige nɛɛ bee. Li a li yɛ́ɛgi tɔ́n koro ga pye li nyapiigèle a kɔ́ ra kǔli nyaagi í.

¹³ Mii a mii cɔ̀ɔ́w cáan li na, li a cò mii karinyangi na. Mii a li kɔ́ri kári Babilɔni ma wi lè Kalide ye tári, kàjáa li a di nyaa í, li si a kùu yaà.

¹⁴ Bele myɛ si be li màʔa lè, pe lè li kpaàwelebèle, ní li kapɛɛnkpumɔnbèle kabiya myɛ, mii a be cariga káfalagi kàbanya myɛ na, si ŋɔséew kɔ́n bi taʔa be na.

¹⁵ Pe a gi cán bi cán mii wi nyɛ Yawe, lǎli ni mii ga be cariga n lége tári syɛɛnfeleye nínge ni lè, lǎli ni mii ga be cariga n tórigo tátɛɛyɛ saʔa ma lè.

¹⁶ Kàjáa mii a nǎnbèle pèle yaʔa be ni, bele pe a syɔɔ lè ŋɔséew, ní kateekpɔɔgi, ní káfalagi yáama ma, koro ga pye syɛɛnfeleyee nínge ni pe a sa pye lè paa be yanɔnʔɔyi myɛ kéele nyuu bàā tèé yaà beè, si wɔ́ɔ gi cán bi cán mii wi nyɛ Yawe.»

¹⁷ A Yawe syɛ́ɛnri nan mii na, wi n jo:

¹⁸ «Syɔɔn-pya, mɔ a ra cɛ̀lɛ́ sáā mɔ búruw líi, mɔ a ra mɔ lógi gbo ní fyáara, ní wɔʔɔgɔ ní.

¹⁹ Mɔ a gi joo tári syɛ̀ɛnnɛ ma si jo: ‹Kàfɔw Yawe wi syɛ́ɛnri naa joo Zyerusalɛmi ye ma, Isirayɛli tásaligi na níì jo: Pe a ra be búruw líi ní wɔʔɔgɔ ní, pe a ra be lógi gbo ní funjurugoro ní. Níì cán be tári a ba kàri tɛɛ̀kalagiga, bi fɔ̀n yáriri myɛ ni di nyɛ di ni lè, bele myɛ be nyɛ di ni lè poro péemi kéele na.

²⁰ Syɛɛnnɛʔɛmi kèye a pye gurubɛɛrɛ, tári í kàri tɛɛ̀kalagiga. Yele a gi cán bi cán mii wi nyɛ Yawe.› »

Yawe syɛ́ɛnri a foro

²¹ A Yawe syɛ́ɛnri nan mii na wi n jo:

²² «Syɔɔn-pya, nyàʔá kàseefelile li nyɛ yele ma lee naa Isirayɛli tári ni, li jo lè: ‹Cányi i taʔala yiyɛɛ na, yanyaagaa faala si o forogi í?›

²³ Awá, ki joo be ma mí be pye: Kàfɔw Yawe wi syɛ́ɛnri naa joo níì jo: Mii a kàseeli bee sàa. Pe a ní da li wáa Isirayɛli ni í. Kàjáa ki joo be ma mí be pye: ‹Cányi i nùuni, yee ni yanyaayi myɛ a foro lè.›

²⁴ Níì cán gbanzan yanyaʔa, wàlá jànvaa-kanyaajooro a ní pye Isirayɛli kpáagi wòolo nínge ni í.

²⁵ Níì cán mii wi nyɛ Yawe, gee mii a joo lè, koro mii a joo, ki foro làlaa sìnzige ni, yele cányi ni ki a tɔ̀nɔ́ pye, niceebèle narigbaʔa, mii a syɛɛnrɛ joo, si wɔ́ɔ di foro,» Kàfɔw Yawe wi jo nya.

²⁶ A Yawe syɛ́ɛnri nan mii na, wi n jo:

²⁷ «Syɔɔn-pya, wéle, Isirayɛli kpáagi wòolo i gi nyuu níì jo: ‹Yanyaagi wi nyaagi lè, ki i nyɛ cânleeliye kéele. Wi i kérigèle nyaagi ni nyuu làridɔɔngéle kéele na.›

²⁸ Koro na ki joo be ma mí be pye: ‹Kàfɔw Yawe wi syɛ́ɛnri naa joo níì jo: Syɛ́ɛnree myɛ mii ga joo lè, ti a foro làlaa sìnzige ni,› » Kàfɔw Yawe wi jo nya.