Ezekyɛli 11 - Cebaara Bible 2010

Kútiiw a kúun Zyerusalɛmi na wi kapeeyi kéele na

¹ A Pǐli mii láa n yìrige n kári Yawe kpáagi canʔafolomɔ kpaaweeli kàbaan na, lee li yɛʔɛ̀ wáa canʔafolomɔ ma lè. Wéle, nànbēle toko ní kagunɔ maa pye kpaaweeli yɛ́ʔɛ ma. A mii Azuuri jáaw Yaazanya, ní Benaya jáaw Pelatya nyaa be ni, be pye lè syɛ́ɛnmi kùndigibéle.

² A Yawe mii pye: «Syɔɔn-pya, nǎnbèle naa be kapeeyi tímana ní i láliipeew kaangi kěgi naa ni.

³ Pe i gi nyuu níì jo: ‹Ki o nyɛ bi làlaa kwɔ́ɔ sáā kpaaya faanri í. Kěgi gi nyɛ nɛʔɛdaʔagi, wolo si i nyɛ káari.›

⁴ Gee bee na ki n yɛlɛ mi kérigèle nyaa mi joo be kánmi na, kérigèle nyaa mi joo syɔɔn-pya!»

⁵ Lǎli bee ni a Yawe Pǐli tìgi n too mii na, níì mii pye: «Ki joo mí jo: ‹Yawe wi syɛ́ɛnri naa joo níì jo: Yele i gi nyuu kánmi bee na, Isirayɛli kpáagi wòolo! Mii si n yele fúnyi sɔ̀ngumɔ cán.

⁶ Yele n syɛɛnnɛʔɛmɛ kpóo kěgi naa ni. Yele n gi kàlari-kóloyi nyìn kúbèle na.

⁷ Gee bee na Kàfɔw Yawe syɛ́ɛnri naa joo níì jo: Yele kúbèle bele yele cáan kěgi nínge ni lè, poro be nyɛ káari, kěgi si i nyɛ nɛ̀ʔɛdaʔagi, yele si na, pe a yele yirige gi ni.

⁸ Yele i fɛ̀ɛgí ŋɔséew na, mii si a ŋɔséew kɔ́ri wi pan yele kurugo,› Kàfɔw Yawe wi jo nya.

⁹ ‹Mii a yele yirige gi níngi ni, bi yele le nibɔɔnnɔ kɔ́yɔ ni. Mii a mii kútiiw kèlē kpéʔele foro yele na.

¹⁰ Ŋɔséew a yele kpóo cáan, mii a kútiiw kúun yele na Isirayɛli láʔagologi na, yele a gi cán bi cán mii wi nyɛ Yawe.

¹¹ Kěgi a pye yele ma nɛ̀ʔɛdaʔaga í, yele a pye káari gi ni í. Isirayɛli láʔagologi na mii a kútiiw kúun yele na.

¹² Yele a gi cán bi cán mii wi nyɛ Yawe, wee làlwa kèlē ge lè yele ga tánʔa ge na í, wee kajoodɛɛngēle ge lè yele ga ge kpéʔele í, fwɔɔ a yele gi kpéʔele n yɛlɛ ní syɛɛnfeleyi kalɛɛgéle ní, yee yi yele màʔa lè.› »

¹³ Lǎli bee ni, àmɛɛ mii pye lè kérigèle nyaa-mí-joolo na, Pelatya wi lè Benaya jáaw, a woro kùu. A mii too n yɛ́ɛgi cíbele tári na níì yákpoli wáa gbanʔama níì jo: «Ee Kàfɔw Yawe, a mɔ a Isirayɛli wozanbèle kwɔ́ɔ lé bi yirige yaà.»

Syɛ́ɛnbèle be cariga lè Kolocɔlɔɔ a be kpóʔoro

¹⁴ A Yawe syɛ́ɛnri nan mii na, wi n jo:

¹⁵ «Syɔɔn-pya, mɔ senyɛnbèle bɛɛ, pe i nyɛ mɔ senyɛ̀nnɛ, bele be lè mɔ kpaʔa wóbèle, ní Isirayɛli kpáagi myɛ wobogo, poro bele má Zyerusalɛmi ye gi nyuu lè níì jo: ‹Ye kòro léelige Yawe na. Tári naa n kaan wolo ma di pye wolo wóro.›

¹⁶ Koro na ki joo mí jo: ‹Kàfɔw Yawe wi syɛ́ɛnri naa joo níì jo: Ki wíre i nyɛ kányɛʔɛ mii n be léeli yaà tári syɛɛnfeleye nínge ni, mii n be cariga n màʔa tátɛɛyi ni, mii si n tɔ́ɔ̀ pye be ma tɛɛcànga làlaa kánma ni, tátɛɛyi ni, yee má be kári lè.›

¹⁷ Koro na ki joo mí jo: ‹Kàfɔw Yawe wi syɛ́ɛnri naa joo níì jo: Mii a ní yele kpóʔoro yirige yaà syɛɛnfeleyi nínge ni. Mii a ní yele kíle yirige yaà tátɛɛyi ni, yee má yele cariga n kári lè. Mii a ní Isirayɛli tásaligi kaan yele ma.

¹⁸ Nɛɛ bee pe a ní lúru pan si ba kapeekpoloyi myɛ ní yanɔnʔɔyi myɛ yirige di ni.

¹⁹ Mii a fungo nibin kaan be ma, mii a pìifɔnnɔ le yele ni, mii a kàdɛnɛgi fúngo yirige be céri ni, si cere fúngo kaan be ma.

²⁰ Koro ga pye be taʔa mii làlwaw kèlē na, si mii kajoodɛɛngèle cò sáā ge kpéʔele. Pe a pye mii syɛ́ɛnbèle, mii si pye be Kolocɔlɔw.

²¹ Bele fúnyo si yi nyɛ lè pe kapeekpoloyi ní be yanɔnʔɔyi na, mii a be kapyegèle yaʔa ke lúru kòro be nyúnyi ni,› » Kàfɔw Yawe wi jo nya.

Yawe nìjangbɔɔri n yìri n láʔa Zyerusalɛmi na

²² Lǎli bee ni a syerubɛnbèle be fókaanyi sánʔa, a sàkoyi pínɛ ní be ní, á Isirayɛli Kolocɔlɔw nìjangbɔɔrɔ pye be na, ǹjogi ni.

²³ A Yawe nìjangbɔɔri yìri n yiri kěgi nínge ni n sáà tɛ́ɛn nyanbelegi na gi nyɛ lè kěgi canʔafolomɔ ma.

²⁴ A Pǐli mii láa n yìrige níì kári ní mii ní Kalide ma, bele má pe da cò n kári lè, gee bee maa pye yanyaʔa ni, gee ki da pye Kolocɔlɔɔ Pǐli báriga ni lè. Yanyaagi si mii da nyaa lè, a mii fɔ̀n gi ni mii ǹjogi ni.

²⁵ Syɛ́ɛnree Yawe da tɛ̀ɛn mii na lè, a mii dee bee myɛ joo wojo-mí-káribèle ma.