Ezekyɛli 10 - Cebaara Bible 2010

Kolocɔlɔɔ n níì wiyɛɛ dɛ̀ɛn Ezekyɛli na

¹ A mii i wéle, a mii gi nyaa ǹjoʔomaw na wi pye lè syerubɛnbèle nyúnyo ni, á gi pye yaà mɔ a jo safiiri wii. Yarigaa maa ni nyaagi yaà pe ǹjogi ni, gee kánma pi da fàngolo wíri lè.

² Nǎnwee wi da lɛn búrogi le lè, a Yawe gi joo wee bee ma níì wi pye: «Jée sàkoyi lariga ni, syerubɛnbèle láara ni. Mɔ kɔ́yi nyìn naàniganw na, wee náa gi gbàn lè, wee mɔ a koli syerubɛnbèle lariga ni lè, mi kári mi sa wi wo kěgi na.» A wi kári mii nyɛ́nɛ na.

³ Lǎli ni nǎnw jée lè syerubɛnbèle maa pye kpáagi kàliige ma. A fàfaangi fungoma kadàali nyìn.

⁴ A Yawe nìjangbɔɔri yìri syerubɛnw ǹjoʔo ni n sáà tɛ́ɛn kpáagi kpaaweele na, a fàfaangi kpáagi nyìn, a kàfugoma kadàali nyìn Yawe nìjangbɔɔri gbɛ̀ɛnmɛ na.

⁵ A syerubɛnbèle fókaanya kàfulogo i lúro fwɔɔ kàfugoma kadàali na, níì pye àmɛɛ Séew Myɛ Kàfɔlɔ Kolocɔlɔɔ yákpoli nyɛ lǎli ni wi nyuu lè.

⁶ Nǎnwee na lɛn búrogi pye lè, a Yawe syɛ́ɛnri naa joo n gbàn wee bee ma níì jo: «Naà wòlo sàkoyi nínge ni, syerubɛnbèle lariga ni!» A nǎnw kári n sáà yére sàkogi taana.

⁷ Lǎli bee ni a syerubɛnw kɔ́gi sánʔa náagi kàbaan na gi pye lè syerubɛnbèle lariga ni, n kàa wòlo n le wee kɔ́yɔ ni, wee na lɛn búrogi pye lè. A wi gi cò n yiri.

⁸ A syɔɔn kɔ́lɔ niwirige i nyaagi syerubɛnbèle na be fókaanyi láara ni.

⁹ A mii i wéle, a mii sàkoyo sicɛrɛ nyaa syerubɛnbèle taana. Syerubɛn o syerubɛn n pye ní sàkogo nibin ní. Sàkoyi bee kánma maa kirizoliiti wíri.

¹⁰ N yɛlɛ ní yi kánmi ní, yi myɛ sicɛrɛw nyaaganma maa pye sèjira, sàkogo o sàkogo maa pye mɔ a jo ki i nyɛ sàkogaa fúngo ni.

¹¹ Yi ga ni syée, yi n ni syée yi kàbanyi sicɛrɛ na. Yi da ni kologi ni kàragí lǎli ni yi syée lè í. Yi maa ni syée gbakama, yi ga ni syée yi o kologi ni kàragí í.

¹² Syerubɛnbèle cére myɛ maa nyìn nyapiire na, gee bee n jo pe kàdoyi, ní be kɔ́yi, ní be fókaanyi, n be màʔa n kpàra n fàra be sàkoyi na, yi lè be sicɛrɛw sàkoyo.

¹³ A mii gi lóʔo pe i sàkoyi yiri káfala-sìnjinnɛ.

¹⁴ Pe myɛ nibin nibin maa pye ní yɛɛcɔɔgèlē sicɛrɛ-jɛrɛ ní. Wozeliw yɛ́ɛcɔɔgéle maa syerubɛn wólo wíri, siin wów wòʔolo si i nyɛ àmɛɛ nàɔn wólo nyɛ lè, taanri wów wòʔolo si i nyɛ àmɛɛ càaraɔ wólo nyɛ lè, sicɛrɛ wów wòʔolo si i nyɛ àmɛɛ nyɔɔ̀ wólo nyɛ lè.

¹⁵ A syerubɛnbèle yìri n lúgu. Yaweeyi bee mii da nyaa Kebaari cábigi nyɔ́ɔ na.

¹⁶ Lǎli ni syerubɛnbèle ga ni syée lè, sàkoyi n ni syée be taana. Lǎli ni syerubɛnbèle ga be fókaanyi sánʔa lè bi yìri tári na, sàkoyi o gáà kolo n kàri í.

¹⁷ Lǎli ni pe ga yére lè, yi n wɔ́ɔ̀ yére, pe ga ni yìrigí, yi n wɔ́ɔ̀ yìri ní be ní. Níì cán yaweeyi pìle maa pye yi ni.

Yawe nìjangbɔɔri n yìri n láʔa Kolocɔlɔɔ kpɔ̀ʔɔrɔli kpaʔa na

¹⁸ A Yawe nìjangbɔɔri yìri n láʔa kpáagi kpaaweele na n sáà tɛ́ɛn syerubɛnbèle na.

¹⁹ A syerubɛnbèle be fókaanyi sánʔa níì yìri tári na mii nyɛ́nɛ na, a pe ga ni syée, a sàkoyi pínɛ ní be ní. A be sáà yére Yawe kpáagi kpaaweele na canʔafolomɔ ma, á Isirayɛli Kolocɔlɔw nìjangbɔɔrɔ si pye be na ǹjogi ni.

²⁰ Yaweeyi bee mii da nyaa Isirayɛli Kolocɔlɔw láara ni, Kebaari cábigi nyɔ́ɔ na, a mii gi cán ncan syerubɛnbéle bɛɛ.

²¹ Pe myɛ nibin nibin maa pye ní yɛɛcɔɔgèlē sicɛrɛ-jɛrɛ, ní fókaanya sicɛrɛ-jɛrɛ ní, á syɔɔn kɔ́lɔ niwiriye si i nyaagi be fókaanyi láara ni.

²² Pe yɛɛcɔɔgèle nyaaganma maa gele wíri, gele mii da nyaa lè Kebaari cábigi nyɔ́ɔ na. Pe kánmi bi pye, pe tiimaaw be pye kélemi. Pe myɛ nibin nibin maa ni syée zìnmɛ na gbakama.