Ezekyɛli 1 - Cebaara Bible 2010

Yawe n wiyɛɛ dɛ̀ɛn Ezekyɛli na

¹ Yɛ̀ʔɛlɛ toko ní kpɔrigɔ wóli yeye sicɛrɛ wógi canya kagunɔ wóʔo na, n mii yaʔa wojo-mí-káribèle nínge ni Kebaari cábigi nyɔ́ɔ na, a nyɛ̀ʔɛgèle múgu, a Kolocɔlɔɔ yanyaaya tɛ̀ɛn mii na.

² Yégi canya kagunɔ wóʔo na, koro n pye fànʔafɔw Yoyakɛn cò-mí-kárili yɛɛ-kagunɔ wólo,

³ a Yawe syɛ́ɛnri nan sáriga-wòlow Buzii jáaw Ezekyɛli na, Kalide ye tári ni, Kebaari cábigi nyɔ́ɔ na. Nɛɛ bee Yawe kɔ́gi pye wi na.

⁴ Mii maa ni wéle, a mii gi nyaa káfalakpɔʔɔ, a gi yìri solomɔkulo ma ni maa, ní fàfaankpɔʔɔ, ní naà ní, gee ki da ni gbɛ̀ɛnmɛ caragi lè kàbanyi myɛ na. Ki maa pye mɔ a jo gbɛ̀ɛngbɔɔmɔ naànijemubéle be yirigi fàfaangi nínge ni, náagi ni.

⁵ Yaweeye sicɛrɛ n wɔ́ɔ̀ pye gi níngi ni, yee kánma bi syɔɔn wómi wíri lè.

⁶ Yi myɛ nibin nibin maa pye ní yɛɛcɔɔgèlē sicɛrɛ-jɛrɛ, ní fókaanya sicɛrɛ-jɛrɛ ní.

⁷ Yi tɔ́lɔyi maa sín, yi yédaagèle si i nyɛ àmɛɛ náapiige feriye nyɛ lè, ní i daragi àmɛɛ kanyɛɛnrɛ nyɛ, dee be sámaga n báara lè.

⁸ Syɔɔn kɔ́yɔ maa pye yi fókaanyi láara ni, yi kàbanyi sicɛrɛ-jɛrɛ na. Yi myɛ sicɛrɛw si maa pye ní yi yɛɛyɛ, ní yi fókaanya.

⁹ Yi fókaanyi maa sogi sogi yiyɛɛ na, yi ga ni syée, yi o kologi ni kàragí í, kàjáa yi myɛ nibin nibin maa ni syée gbakama.

¹⁰ Gee si gi yi yɛ́ɛyi kánma kwɔ́ɔ lè, nàɔn yɛ́ʔɛ maa pye yi myɛ nibin nibin na, a càaraɔ yɛ́ʔɛ i nyɛ yi myɛ sicɛrɛw na kàliige ma, a náapɛɛlɛ yɛ́ʔɛ i nyɛ yi myɛ sicɛrɛw na kàmɔnɔ ma, a nyɔɔ̀ yɛ́ʔɛ i nyɛ yi myɛ sicɛrɛw na.

¹¹ Yi yɛ́ɛyi ní yi fókaanyi maa wàli yiyɛɛ na ǹjoʔo ma. Yi myɛ nibin nibin fókaanyaa siin-ziin maa sogi sogi yiyɛɛ na, á yàa siin-ziin si yi céri tɔ́n.

¹² Yi myɛ nibin nibin maa ni syée gbakama. Yi maa ni syée beè pǐli da ni syée lè, yi si da ni kologi ni kàragí lǎli ni yi syée lè í.

¹³ Yaweeyi bee kánma maa pye àmɛɛ naagbanga naàniganra nyɛ lè. Ki maa pye àmɛɛ nìmubwɔɔgéle náa nyɛ lè, a náagi bee i forogi ni máari yaweeyi nínge ni, a nyɛ̀ʔɛnɛ nyɛ́ʔɛnɛmɛ gbɛɛnmɛ i yirigi náagi ni.

¹⁴ Yaweeyi maa ni syée ní i lúrugu ni maa àmɛɛ nyɛ̀ʔɛzalila nyɛ lè.

¹⁵ A mii i yaweeyi bee wéle, a mii sàkoyo nibin nibin nyaa tári na, yaweeyi lɛ̀ʔɛlɛ ni, yi yɛ́ɛyi sicɛrɛ-jɛrɛ yɛ́ʔɛ ma.

¹⁶ Sàkoyi bee kánma, ní yi sámagaganmi maa kirizoliiti darigala wíri. Yi myɛ sicɛrɛw nyaaganma n pye sèjira. Yi kánmi, ní yi sámagaganmi n pye àmɛɛ sàkogaa nyɛ kàa fúngo ni lè.

¹⁷ Yi maa ni syée yi kàbanyi sicɛrɛ na, yi si da ni kologi ni kàragí lǎli ni yi syée lè í.

¹⁸ Yi zándiibèle ǹjoʔo yiriganma maa pye fyáara wómɔ ní, á sàkoyi myɛ sicɛrɛ zándiibéle nyìn nyapiire na n be màʔa n kpàra.

¹⁹ Lǎli ni yaweeyi ga ni syée lè, sàkoyi n ni kòlogí yi taana ni syée. Lǎli ni yi ga ye n yìri n láʔa tári na lè sàkoyi n wɔ́ɔ̀ yìri.

²⁰ Yi maa ni syée beè pǐli da ni syée lè. Sàkoyi maa ni yìrigí wɔ́ɔgēle, níì cán yaweeyi pìle n pye yi ni.

²¹ Lǎli ni yi ga ni syée lè, sàkoyi n ni syée, lǎli ni yi ga ni yèré lè sàkoyi n ni yèré, lǎli ni yi ga ni yìrigí ni láari tári na lè sàkoyi n ni yìrigí ní yi ní, níì cán yaweeyi pìle n pye sàkoyi ni.

²² Nyɛ̀ʔɛnɛ niwirige n pye yaweeyi myɛ nibin nibin nyúnyo njoyo ni, ní i nyɛ́ʔɛnɛ bìngaara wóʔo ní àmɛɛ kirisitali nyɛ lè.

²³ Yi fókaanyi maa sánʔa n sígi yiyɛɛ na nyɛ̀ʔɛnɛ niwirigi bee láara ni, á yàa siin-ziin pye yi myɛ nibin nibin na n yi tɔ́n, siin-ziin maa yi myɛ nibin nibin cére tɔ́n.

²⁴ Lǎli ni yi da ni syée lè, a mii yi fókaanyi tinmɛ lóʔo àmɛɛ lònɛʔɛgɛ tinmɛ nyɛ lè, wàlá wee wi nyɛ lè Séew Myɛ Kàfɔlɔ, àmɛɛ woro yákpoli nyɛ lè. Yi ga ni táanri ki n pye tìngbɔɔmɔ àmɛɛ kapɛɛnkpumɔnbéle kabiga tinmɛ nyɛ lè. Yi ga yére, yi n yi fókaanyi tìrige n cáan.

²⁵ Yákpolo maa ni yirigi nyɛ̀ʔɛnɛ niwirigi ni gi pye yi nyúnyi ǹjoʔo ni lè. Lǎli ni yi ga yére lè, yi n yi fókaanyi tìrige n cáan.

²⁶ Yarigaa n pye nyɛ̀ʔɛnɛ niwirigi bee ǹjoʔo ni gi pye yi nyúnyi ni lè, ki maa safiiri wíri. Ki kánmi maa pye àmɛɛ fàngolo nyɛ lè, wàa si maa pye fàngoli bee niwirige na àmɛɛ nàɔn nyɛ lè.

²⁷ A mii wi nyaa wi i nyɛ́ʔɛnɛ ni daragi fàngoli na, wi kánmi maa pye àmɛɛ naà nyɛ lè n wi màʔa. N séli wi sárigèle na n lúgu ǹjoʔo ma, koro maa ni daragi àmɛɛ naanyìnge nyɛ lè, ní níì séli wi sárigèle na n tìgi táàma, koro n pye àmɛɛ naà gbɛ̀ɛnmɛ nyɛ lè n wi màʔa n kpàra.

²⁸ Amɛɛ kùlobariw kánma gáà pye fàfanʔa na lè zàʔá canʔa ni, ànbée gbɛ̀ɛ́nmi kánma da pye n wi màʔa n kpàra. Gee bee n pye Yawe nìjangbɔɔri tɛ̀ɛnnɛ. Mii gee bee nyaa lè a mii too n yɛ́ɛgi cíbele tári na. A mii wàa yákpolo lóʔo, a wi i nyuu.