Ezayi 9 - Cebaara Bible 2010

Pe n pyà see wolo ma

¹ Syɛ́ɛnbèle bele be táanri yébilimi ni lè, pe n gbɛ̀ɛngbɔɔmɔ nyaa. Gbɛ̀ɛnmɛ n too syɛ́ɛnbèle bele na be nyɛ lè wodɛ́ɛnbéle ní kùúw nyínmɛ tára ni.

² Mɔ i kàa taari syɛɛnfelegi na. Mɔ i kàa fàrá be fundaangbɔɔri na. Pe i fundaanra kpéʔele mɔ yɛ́ʔɛ ma, yaliilaara fundaanra pyeganma na, ní àmɛɛ syɔɔn gáà fundaangbɔɔrɔ yákpolo wáa lè kapɛɛnnɛ yataara tɛɛlɛʔɛ ni.

³ Níì cán zúulibegi ki da pye mɔ syɛ́ɛnbèle na lè, ní sàbinni li da ni be kpúmɔn kàdoyi na lè, ní fǎngi fáli kùndigi kàgbeele, mɔ n toro cɛnɛ àmɛɛ mɔ gi kpéʔele Madyan ye cángi na lè.

⁴ Sùlasii-taʔalayi myɛ, ní burogboloyi myɛ yi nyíngi ní sìsyaan ní lè, toro myɛ a le naà ni bi di sórigo kwɔ́ɔ.

⁵ Níì cán pe n pyà see wolo ma. Jaafɔlɔ n kaan wolo ma, fǎngi a taʔa wi fókaannyunyi na. Pe a ra wi yiri Bìngaara, ní Yarifɔlɔ, ní Séew Kolocɔlɔɔ, ní Bàngwɔɔ Tofɔlɔ, ní Yɛɛ̀nyingi Fànʔafɔbile.

⁶ Fǎngi a ra caragi da syée, bàngwɔɔ yɛɛ̀nyinge si kaan Davidi fàngoli, ní wi fǎngi ma, bi gi báriga, si gi sígi yérige kányɛɛgi, ní sínni báriga ni, bi séli lǎli naa na bàā syée yaà làla o làla. Koro gi nyɛ Nyɛ̀ʔɛni Sùlasiibéle Kafɔlɔ Yawe fúngi ni, wi a gi kpéʔele.

Yawe fundanʔari kágunnɔ

⁷ Kàfɔw n syɛɛnrɛ joo n wáa Zyakɔbi na, ti n too Isirayɛli na.

⁸ Syɛ́ɛnbèle myɛ a koro cán, Efirayimi, ní bele be nyɛ lè wodɛ́ɛnbéle ní Samarii ni, ní i gi nyuu ní nɛ̀ɛnyɛnɛgɛ, ní kpɔɔmɔ ní, níì jo:

⁹ «Jùfaaw kàkɔlɔyɔ n too, kàjáa wolo a ní yi faan ní kàdɛnɛgboloyo ní. Děsyaantiiri n cɛnɛ, kàjáa wolo a sɛdiri tíire cɔ́rɔ di sìndɛɛgi ni.»

¹⁰ Yawe a fànʔa kaan Eresɛn kàsiitun-nyɛ́nbèle ma pe be jáa, wi a kapɛɛnkpumɔn-yárira le pe nigoobèle na,

¹¹ Sirii ye pe lè canʔafolomɔ ma, ní Filisitini ye pe lè canʔajeemɛ ma, pe a be nyɔ́ɔyi múgu bi Isirayɛli ye jɔ́ɔ. Alí koro kpéʔeleli ní gi myɛ ní, wi fundanʔari ga láʔa í. Wi kɔ́gi sèʔé i nyɛ wozánʔaga ní.

¹² Syɛ́ɛnbèle a lúru pan, wee má wi be kpúmɔn lè í, pe a ra Nyɛ̀ʔɛni Sùlasiibéle Kafɔlɔ Yawe caa í.

¹³ Yawe a wɔ́ɔ nyǔngi, ní nángi, ní sɛʔɛwari, ní nyɛ́nɛri ceri bi yirige yaà cannijanga na.

¹⁴ Wolɛɛbèle, ní mɛ́ɛkpoloyi fɔ̀ɔlɔ, poro be nyɛ nyǔngi, kanyaajoobèle bele si be jànvaaw tamana kaangi lè, poro be nyɛ nángi.

¹⁵ Syɛ́ɛnbèle naa yɛɛ̀kinibéle i be pùuní. Bele be yére pe i poro yɛ́ɛgi kínigi lè, poro n kogologo láa.

¹⁶ Koro na Kàfɔw a fundaanra pye be nìgɔcaribèle kéele na í, wàlá pe círibèle, ní be lɔgucebèle nyínimɛ í pye wi na í. Níì cán pe myɛ i nyɛ Kolocɔlɔɔ yɛ́ʔɛnaa-sìnvyaabéle, ní syɛɛnpeebéle. Nyɔ́ɔyi myɛ i syɛɛnnaa-sìnjoori nyuu. Alí koro kpéʔeleli ní gi myɛ ní, wi fundanʔari ga láʔa í. Wi kɔ́gi sèʔé i nyɛ wozánʔaga ní.

¹⁷ Péemi tɔ̀nɔ́ i sórigolo kpéʔele àmɛɛ naà nyɛ lè, gee gi wúuro tiipiiye, ní wúuro tírire sórogi lè. Ki i có kɔ́ligi tiipiire na, a di wíritɔnɔgi i yìrigí ni syée ǹjogi ni.

¹⁸ Yawe wi lè Nyɛ̀ʔɛni Sùlasiibéle Kafɔlɔ woro fundanʔagbɔɔri n tári cò naà, a syɛ́ɛnbèle pye náagi yasorigoro. Wàa faala o nyɔɔgi wi senyɛnnɛ̀ na í.

¹⁹ Syɔɔn i cɛnɛ ni káa kàliige ma, kateegi si sèʔé i nyɛ wi na. Wi i líi kàmɔnɔ ma, wi si a tée tín í. Pe myɛ nibin nibin a ra be kɔ́yi pìremɛ káa.

²⁰ Manase i nyɛ Efirayimi kánmi na, a Efirayimi i nyɛ Manase kánmi na, a pe myɛ siinw pínɛ ni tuun Zyuda na. Alí koro ní gi myɛ ní, wi fundanʔari ga láʔa í, wi kɔ́gi sèʔé i nyɛ wozánʔaga ní.