Ezayi 8 - Cebaara Bible 2010

Ye wári kapɛɛnni yataara kurugo, ye fùuri ye tɔ́n yáriri fuguri-mí-láala na

¹ A Yawe mii pye: «Ki n yɛlɛ mi kàlagori-kpɔ́ʔɔ láa mí sɛ́bɛcándaanra sɛ́bɛ gi na mi jo: ‹Ye wári kapɛɛnni yataara kurugo ye fùuri ye tɔ́n yáriri fuguri-mí-láala na.› »

² A mii tágala séerafɔɔlɔ yeri poro í séeraw kpéʔele mii ma, poro be nyɛ sáriga-wòlow Urii, ní Yeberekiya jáaw Zakarii.

³ A mii pye ní kanyaajoocew ní, a wi yére fícɛnnɛ na n baa nànbile see, a Yawe mii pye: «Pìíw mɛ́ʔɛ le paa wi yiri Mayɛri-Syalali-Yasyi-Bazi.

⁴ Níì cán sáni pìíw í gbǎn ba ra gi nyuu lè, si jo: ‹Abaa! Nàá!› pe a Damasi lɔ́ri koli, bi wɔ́ɔ Samarii yáriri koli bi kári Asirii fànʔafɔw yɛ́ʔɛ ma.»

Asirii syɛ́ɛnmi panna kéele

⁵ A Yawe níì joo ní mii ní níì jo:

⁶ Amɛɛ Silowe lógi fóo ni syée lè sági, á syɛ́ɛnbèle naa koro faʔa, ní si i cɛ̀lɛ́ Eresɛn, ní Eremaliyahu jáaw yɛ́ʔɛ ma.

⁷ Koro na Kàfɔw a cábigi fànnɛʔɛgɛ lɔ́ʔɔ tórigo be kánmi na, koro gi nyɛ Asirii fànʔafɔw ní wi nìjangbɔɔri myɛ, ki a nyìn bi sɔ̀lɔ ki tɛɛ̀yéregi na bi kabi sɔ̀lɔ ki lógbebèle myɛ na.

⁸ Ki a kolo bi fíige Zyuda tári kánma na, ki a nyìn bi kabi da fóo, ki a nyìn fwɔɔ bi nan yátiigi na. Ki fókaanyi a sánʔa bi mɔ tári tɛ́ɛyɛ myɛ tɔ́n, ee Emanuwɛli!

Syɛɛnfeleyi gbanzan katimanara

⁹ Syɛɛnfeleyi, yaa yákpogèle wáa gbanʔama. Fyáakpɔɔrɔ a yele cò! Ye líiyi cáan, yele bele myɛ ye nyɛ lè yaà tári léelige tɛ́ʔɛ ni. Ye yeyɛɛ bwɔɔ kapɛɛnni kánma na, fyáakpɔɔrɔ a yele cò. Ye yeyɛɛ bwɔɔ kapɛɛnni kánma na, fyáakpɔɔrɔ a yele cò.

¹⁰ Ye bɛ̀ɛ kàa na ki a kálagi! Ye syɛɛnraa joo, ti a foro í! Níì cán Kolocɔlɔɔ i nyɛ ní wolo ní.

Fálaga, gee na be kpírigi lè

¹¹ Kánmi naa na si Yawe joo ní mii ní, lǎli ni wi kɔ́gi mii cò lè, níì mii sàmi jàngó mii a kɔ́ ra táanri syɛ́ɛnbèle naa kólogo ni í, wi n jo:

¹² «Gee myɛ syɛ́ɛnbèle naa yiri lè nyɔɔkuunro, yele a kɔ́ ra gee bee yiri nyɔɔkuunro í. Yárigee na be fɛ̀ɛgí lè, yele a kɔ́ ra fɛ̀ɛgí gi na í, ki a kɔ́ pye yele ma fyáara yáriga í.

¹³ Yawe wi lè Nyɛ̀ʔɛni Sùlasiibéle Kafɔlɔ, woro yele yɛlɛ bi córo Wojanw, woro na yele yɛlɛ bi fyáa, woro wi yɛlɛ bi pye yele má fyáara yárigi.

¹⁴ Wi a pye tɛɛcànga, si pye kàdɛnɛgɛ, gee na pe a ra kpírigi lè, ní fálaga, gee ki a Isirayɛli kpáayi siin cáan lè, ní cɔ̀ɔ, ní karinyanga Zyerusalɛmi kòrofɔbèle kánma na.

¹⁵ Syɛ̀ɛnnɛ saʔa a kpírige gi na bi too tɔ́nʔɔnɔ. Karinyangi a be cò, pe a be koli bi kári.»

Pyèrige ní sigele lala

¹⁶ Séeraw bee kɔn, fɛ̀ɛ kpúmɔn yanyaagi bee na mii pìitamabèle nínge ni.

¹⁷ Yawe na mii niyɛɛ daʔa, woro wee wi wi yɛ́ɛgi làriga Zyakɔbi kpáagi wòolo na lè. Woro na mii mii sɔ̀ngumi taʔa.

¹⁸ Mii wéle wee ní pìíbèle ní, bele Yawe kaan mii ma lè. Wolo i nyɛ fɛ̀ɛbēle ní sàmina yáriya Isirayɛli ni, Yawe mɛ́ɛgi na, woro wee wi lè Nyɛ̀ʔɛni Sùlasiibéle Kafɔlɔ, wi nyɛ lè wodɛ́ɛɔn ní Siyɔn nyanbelegi na.

¹⁹ Pe ga yele pye: «Ye sa kúyibebèle yíbe, ní bele be nyɛ̀ʔɛna kérigèle nyaagi ni nyuu lè, ní bele be nyɔ́ɔgi féfeegèlē wíi ní i syɛɛn-ŋúnuŋunuri nyuu lè,» ye be yari: «Syɛɛnfelege ga yɛlɛ bàā gi Kolocɔlɔw yíbe ì? Kúbèle lé gi yɛlɛ syɔɔn í yíbe niweebèle kéele na?

²⁰ Làlwaw, ní séeraw má gi yɛlɛ syɔɔn í da lúro. Syɔ́ɔnwee jooganma ga pye lè pi ga yɛlɛ ní dee bee ní í, nyǐnjerigi gbɛ̀ɛnmɛ o nyɛ wi ni í.»

Wɔʔɔgɔ yébilimɛ

²¹ Pe wovɔrɔgwɔɔbèle kateegi a jáa lè, pe a ra curugu da máari tári ni. Pe fúnyi a ba tanʔa, pe be yɛ́ɛyi yìrige bi taʔa bàā syɛɛnpeere nyuu da wáa be fànʔafɔw, ní be Kolocɔlɔw na.

²² Koro kàdoʔo ma pe a ra wéle tári na, wéle, ki a pye fɔ̀rɔgɔ, ní yébilimɛ, ní wɔʔɔgi yébiliwɔɔlɔ. Pe a ŋɔrigɔ wáa yébiliwɔɔlɔ ni.

²³ Kàjáa táree na wɔʔɔgi nyɛ lè tɔ́ɔliw ni, yébilimi a kòro ti nyúngi na làla o làla í. Lǎli li sɔ̀lɔ lè li n faʔara wáa Zabulɔn tári, ní Nɛfitalii tári na, lǎlee si li maa lè, li a nìjanra taʔa sólomi lɔ̀ʔɔ kólogo na, Zyuridɛnw jelige na, syɛɛnfeleyi tára ni.