Ezayi 7 - Cebaara Bible 2010

Tundunro, ti lè fànʔafɔw Akazi wóro

¹ Akazi lǎli ni wi pye lè Yotami jáaw, Yotami wi pye lè Zyuda ye fànʔafɔw Ozyasi jáaw, a Sirii fànʔafɔw Eresɛn kári, n fàra Isirayɛli fànʔafɔw Peka na, wi pye lè Eremaliyahu jáaw, bi sa kapɛɛnnɛ kpúmɔn ní Zyerusalɛmi ní. Kàjáa pe ga gbàn n kapɛɛnni kpúmɔn ní gi ní í.

² A syɛ́ɛnri naa baa joo Davidi kpáagi wòolo ma níì jo: «Sirii ye n baa fàra Efirayimi tári wòolo na.» A Akazi fúngi, ní wi syɛ́ɛnbèle fúnyo fala ni cɛ̀lɛ́ àmɛɛ káfalaga kɔligɔ tíire fúugu lè.

³ Lǎli bee ni, a Yawe Ezayi pye: «Yiri mi sa Akazi fàra, mɔ ní mɔ jáaw Syeyari-Yasyubi, ǹjoʔo ma lókologi tɛɛ̀laʔala ma, Gàla-le-nanw Séʔe kólogo nyɔ́ɔ na.

⁴ Mɔ a sa wi pye: ‹Ki n yɛlɛ mi yére sági, mɔ a kɔ́ ra fɛ̀ɛgí í, mɔ a kɔ́ fyáa kàjenyunyi bee siin na yi wírigi yirigi lè í, gee bee n jo Eresɛn, ní Sirii, ní Eremaliyahu jáaw fundanʔara kéele na í,

⁵ àmɛɛ Sirii ye, ní Efirayimi ye, ní Eremaliyahu jáaw gi tímana bi kapeʔe kpéʔele mɔ na lè, níì jo:

⁶ Wo lúgu wo kári Zyuda kánmi na wo sa fyáara cáan wi na. Wolo a sa wi tǒbèle fúrugu si jée, fwɔɔ bi taa wi wiyɛɛ gaan, wolo si fànʔafɔlɔ télege wi ni, wi lè Tabeyɛli jáaw.

⁷ Kàfɔw Yawe si n jo: Gee bee a yére í, ki a pye í.

⁸ Níì cán Sirii nyúngi gi nyɛ Damasi, Damasi nyúngi si i nyɛ Eresɛn. Bi séli lǎli naa na bi sa nan yɛ̀ʔɛlɛ togoye taanri ní kagunɔ na, Efirayimi a kálagi, wi a ní pye syɛɛnfelege í.

⁹ Efirayimi nyúngi gi nyɛ Samarii, Samarii nyúngi si i nyɛ Eremaliyahu jáaw. Yele ga pye yele ga tága í, yele a sámaga yére í.› »

Emanuwɛli kéeli

¹⁰ A Yawe níì gi joo Akazi ma níì wi pye:

¹¹ «Fɛ̀ɛwaa nyɛ́ɛri Yawe mɔ Kolocɔlɔw ma miyɛɛ kéeli na, wi nyɛ́ɛri, a wi i nyɛ táàma wóo yoo, ǹjoʔo ma tɛ́ɛyi wóo yoo.»

¹² A Akazi jo: «Mii a yafyɛn nyɛ́ɛri í, mii a Yawe pye wéle í.»

¹³ Lǎli bee ni a Ezayi jo: «Koro na ki n yɛlɛ ye lóʔo, yele Davidi kpáagi wòolo, bi syɛ́ɛnbèle fɔ̀rɔ, koro ga yɛlɛ ní yele ní í, fwɔɔ n taa a yele kɔ́ ba ni mii Kolocɔlɔw fɔ̀rɔgí lé?

¹⁴ Gee bee na Kàfɔw tiimaa a fɛ̀ɛ kaan yele ma: Wéle, pìcaaw a fícɛnnɛ taa, wi a pyà see nàɔn, si wi mɛ́ɛgi le paa wi yiri Emanuwɛli.

¹⁵ Wi a ra nɔ́nɔ-tanʔagi ní sárigi líi, fwɔɔ bi taa wi ba gi cán bi gbǎn ra gi cèʔé, gee gi pee lè, si wojangi nyɛ́nɛ wòlo.

¹⁶ Kàjáa sáni pìíw í ba wobeegi cán bàā gi cèʔé, si wojangi nyɛ́nɛ wolo lè, táree fànʔafɔɔlɔ siin be fyáakpɔɔrɔ wáa mɔ na lè, ti a yaʔa.

¹⁷ Yawe a canyaa yaʔa yi nan mɔ ní mɔ syɛɛnfelegi, ní mɔ tóow kpaʔa na, yee yi lè yi felege ga kɔ́ɔ̀ pye í, nlaa Efirayimi wàli n láʔa Zyuda na lè. Asirii fànʔafɔw wi a pye.»

Yaweepiiri yàlila, ní di gàlagíw

¹⁸ Cángi bee na sísyɔɔnri di nyɛ lè Niili lònyungi na, ní sépiigèle ge nyɛ lè Asirii tári ni, Yawe a di yeri féfeele ni,

¹⁹ ti myɛ a ba tɛ́ɛn gòrógoroweeyi tɛɛtigibɛɛnyɛ, ní fálayi tɛɛyabiya ni, ní tiipiiyi myɛ, ní yaweenaʔa-tɛ́ɛyi myɛ ni.

²⁰ Cángi bee na Yawe a ǹjoori, ní tɔ́lɔyi síire kùnu bi fàra bàʔajɔɔw na, ní sàra-na-nyungunuŋɔnɔ ní, lee li a yìri cábigi jelige na lè. Asirii fànʔafɔw wi a pye.

²¹ Cángi bee na, syɔɔn o syɔɔn a ra náapyaʔa, ní yaweeyiligēle siin pínɛ da gbóo.

²² Nɔ́nɔ-nɛʔɛɔ a tɔ̀nɔ́ ra taagi di ni, pe a ra nɔ́nɔ-tanʔagi líi, níì cán syɔɔn o syɔɔn wi ga kòro tári ni lè, nɔ́nɔ-tanʔagi ní sárigi ki a pye wi yaliiri.

²³ Cángi bee na ki a pye tɛ́ɛgee ni ɛrɛzɛn tíriye saala kagunɔ da pye lè, yee yi da pye lè wálifiio támabéle saala kagunɔ nyɔ́ɔ na, gee bee a yaʔa wúuro tiipiiye, ní wúuro tírire ma.

²⁴ Pe a ra jǐn yaà ní ŋáayi, ní sedeyi ní, níì cán tári myɛ a pye wúuro tiipiiye, ní wúuro tírire.

²⁵ Nyanbeleyee myɛ pe da ni fála ní tèye ní lè, pe a ní gbǎn jée yaà í, wúuri tiipiiye, ní wúuri tírire fyáara kéele na. Pe si a ra nǐyi náari yaà, bǎbèle a wɔ́ɔ ra nyaari yaà.