Ezayi 66 - Cebaara Bible 2010

Tágala syɛ́ɛnbèle be lè kányɛɛgi wòolo ní wovaanabèle

¹ Yawe n jo: «Nyɛ̀ʔɛni li nyɛ mii fàngoli, tári si i nyɛ mii tɔdaʔagi. Kpaagìí si yele a gbǎn faan mii ma, ba tɛɛgìí ki a pye mii tɛɛ̀ŋɔndaagi?

² Yáriri bee myɛ, mii kɔ́gi ki di sámaga, a yáriri bee myɛ pye beè,» Yawe wi jo nya. «Wéle, wee kéele li kpɔ́ʔɔ mii ma lè, woro wi nyɛ foomɔfɔwee fúngo báriga wi kwɔ́ɔ lè, woro wee wi cɛ̀lɛ́ mii syɛ́ɛnri kéele na lè.

³ Wee wi nɔ̀ɔ kɔɔn lè, wi i syɔɔn kpúmɔn ni kúu, wee wi bàpile wóo lè sáriga, wi i pɔɔ̀n yátiiveʔeo kabagi, wee wi míimɛ sáriga wóo lè, wi i gbòyoʔo sìsyaan ŋuu, wee wi sɔ̀ngudaara nùndanʔa yáriga sórogi lè, wi i yasunyo sungu. Bele bee myɛw n be nyɛnɛ kóloyi nyɛ́nɛ n wòlo, pe i fundaanra taagi be sìíw ni, pe yanɔnʔɔyi kéele na.

⁴ Koro na bi be yaʔa be fóomi ni mii a wɔ́ɔ ra fundaanra kpéʔele, gee na be fɛ̀ɛgí lè mii a gi yaʔa ki nan be na, níì cán mii n yeri syɔɔn faala ga syɔɔ í, níì cán mii n joo, pe si ga lóʔo í. Fwɔɔ a be gi kpéʔele, gee gi pee mii nyɛ́nɛ na lè, pe n peyɛɛ le gee ni ki mii bɛɛn lè.»

Yawe kakpéʔeleli wozanna

⁵ Ye Yawe syɛ́ɛnri lóʔo, yele bele ye cɛ̀lɛ́ wi syɛ́ɛnri kéele na lè. «Yele senyɛnbèle be yele para lè, poro bele be yele ŋɔrɔgi ni wáa mii mɛ́ɛgi kéele na lè, pe i gi nyuu níì jo: ‹Ki n yɛlɛ Yawe í wi nìjangbɔɔri tɛ̀ɛn, wolo si pye séerabéle yele fundaanri kéele na.› Kàjáa fɛ̀ɛrɛ a be taa.»

⁶ Yákpogbɔɔlɔ i yirigi kěgi ni, yákpolo i yirigi kpɔ̀ʔɔrɔli kpaʔa ni. Yawe yákpoli lii, woro wee wi wi nigoobèle sàra kaangi be ma lè.

⁷ Sáni fícɛnni í wi yìrige lè a wi téè see. Sáni fícɛnni yáala í wi séli lè, a wi téè nànbile see.

⁸ Wìí wi kɔ́ɔ̀ gee naa félege lóʔo? Wìí wi kɔ́ɔ̀ gi felege nyaa? A pe a gbǎn tányɔɔgaa see lé canʔa nibin ni? A pe a gbǎn syɛɛnfelegaa see lé làla nibin ni? Fícɛnni yáama séliganma terire, a Siyɔn wi jáabèle see.

⁹ «Mii í ceseegi múgu lé cɔlɔɔ ma si gi yaʔa wi a kɔ́ see í?» Yawe wi jo nya. «Mii wee wi pìiseeri kaangi lè, mii si seeli kéele yérige lé?» Mɔ Kolocɔlɔw wi jo nya.

¹⁰ «Yaa fundaanra kpéʔele ní Zyerusalɛmi ní, ye wi yaʔa wi pye yele mugurumi yáriga yele bele myɛ ye tàmaga le ní wi ní lè. Yaa yegi fundaanri na ní Zyerusalɛmi ní, yele bele myɛ ye da pye kùu-káyaʔa na wi kéeli na lè.

¹¹ Koro ga pye yele í ŋɔri bi tín wi yíregèle báriga ni, gele ge syɔɔn kpɛʔɛlɛ lè, koro ga pye wi nìjanri di nɛʔɛ n sɔ̀lɔ lè yele í da dee bee tàanma líi ní fundaanra ní.»

¹² Níì cán Yawe n jo: «Wéle, mii a yɛɛ̀nyingi tórigo wi ma àmɛɛ cábiga nyɛ lè, ní tári syɛɛnfeleye nijanra, àmɛɛ lòcoologi nyɛ, gee gi nyìn n kabi lè. Yele a ra ŋɔri. Pe a yele láa bi pari kɔ́yi na, sáā yele saanri yégunyi na.

¹³ Amɛɛ syɔɔnwaa nyɛ, wee nɔ́ɔ wi wi kpɛʔɛlɛ lè, ànbée mii a ra yele kpɛʔɛlɛ. Yele a kpɛʔɛlɛ Zyerusalɛmi ni.

¹⁴ Yele a gee bee nyaa, yele fúnyi si pye fundaanra na, yele kacelelɛɛyi a ní báriga àmɛɛ nyàā nyɛ lè.» Yawe kɔ́gi a kiyɛɛ dɛ̀ɛn wi falipyebèle na, wi fundanʔagbɔɔri si pye wi nigoobèle na.

¹⁵ Níì cán Yawe wi wee! Wi i maa náagi ni, wi wòtorobèle si i nyɛ àmɛɛ káfala-sìnjinnɛ nyɛ lè bi wi fundanʔari kanidaanna foro ní fànʔa ní, ní wi fúloli naanyìnye báriga ni.

¹⁶ Ní náagi ní Yawe a wi kútiiw joo, ní wi ŋɔséew ní wi a cere yáriri myɛ kpúmɔn. Yawe wogboobèle a tɔ̀nɔ́ nɛʔɛ.

¹⁷ «Bele be peyɛɛ zámagi ni yaari, ni be jéemununi fáli kpéʔele lè, jàngó bàā syée nángwɔɔbèle ma taʔalagèlē taʔalagèlē wàa ma, wee wi yaà lè woyéreo ní níngi ni, poro bele be gbòyoo-káari káa lè, wàlá tǔbèle, ti lè yanɔnʔɔrɔ, poro myɛ a kwɔ́ɔ,» Yawe wi jo nya.

Syɛɛnnɛʔɛmi kpóʔorogbɔɔlɔ wozanna

¹⁸ «Mii na, mii n be kapyegèle ní be sɔ̀nguri cán. Lǎli n nan bi syɛɛnfeleyi myɛ, ní syɛɛnfeleri joofɔɔlɔ myɛ kpóʔoro. Pe a pan si ba mii nìjangbɔɔri nyaa.

¹⁹ Mii a fɛ̀ɛ tɛ́ʔɛ pe níngi ni, si pe wogorobèle pèle tórigo syɛɛnfeleyee ma yi lè Tarisiisi ye, ní Puli ye, ní Ludi ye, pe lè sedeŋɔɔbéle, ní Tubali ye, ní Yavan ye, n fàra lǒgi nínge táleelire woolo na, poro bele be lè pe da kɔ́ɔ̀ mii kéeli lóʔo nyáana í, pe si da kɔ́ɔ̀ mii nìjangbɔɔri nyaa í. Pe a ra mii nìjangbɔɔri kéele nyuu syɛɛnfeleyi nínge ni.

²⁰ Pe a yiri ní yele senyɛnbèle myɛ ní, syɛɛnfeleyi myɛ nínge ni bi pan syɔ́ɔnyi, ní wòtorobèle, ní wòtorotɔnbèle, ní jòfanikàriyi, ní fàlibaayi na bi ba pye yakanʔa mii Yawe ma, mii nyanbejǎngi na, Zyerusalɛmi ni, àmɛɛ Isirayɛli pìíbèle maa ní be yakaanyi ní lè fɔɔnrɔ fun yaleye ni, Yawe kpáagi ma,» Yawe wi jo nya.

²¹ «Alí mii a sáriga-wòlobēle nyɛ́nɛ wòlo be níngi ni, pe lè Levii ye,» Yawe wi jo nya.

²² «Níì cán nyɛ̀ʔɛvɔngèle, ní táfɔnri mii a sámaga lè di kòro beè mii yɛ́ʔɛ ma, ànbée yele yòdaʔayi, ní yele mɛ́ɛgi a kòro beè,» Yawe wi jo nya.

²³ Yawe n jo: «Yevɔngɔ o yevɔngɔ, ní cândɛnɛgɛ o cândɛnɛgɛ, syɛ́ɛnbèle myɛ a pan bi ba ra tíri da tuun mii yɛ́ʔɛ ma.

²⁴ Pe ga yiri lǎli ni lè pe a nǎnbèle kúcere nyaa, poro bele be mii cée lè. Níì cán pe fyɛ́ɛnri a kùu í, pe náagi si a wɔ́ɔ fígi bi nyaa í. Pe a pye syɛ́ɛnbèle myɛ yanibɛɛnmɛgɛ.»