Ezayi 65 - Cebaara Bible 2010

Kútiiw wi maa lè

¹ «Bele be lè pe da ni mii yíbe í, mii n be yaʔa a be nùuni mii na, bele be lè pe da ni mii caa í, mii n gi yaʔa a be mii nyaa. Mii n gi joo syɛɛnfelegaa má, gee gi lè mii mɛ́ɛgi da ni yiri gi na í níì jo: ‹Mii wi wee, mii wi wee!›

² Mii n mii kɔ́yi sánʔa syɛɛnfele-niceʔe ma cángi myɛ ni, bele má be táanri kobeʔe ni lè, n yɛlɛ ní be kínidɛnɛgi sɔ̀ngurɔ ní,

³ syɛɛnfelegaa ma, gee gi mii fúngi taanri lè sìnlaʔa ni mii nyɛ́nɛ na, ní i sárigaw wóo nángwɔɔbèle ni, ní i nùndaanni yáriga sórogi jùfaaw na.

⁴ Pe i kòró kɔ̀ɔnweeyi ni, ní i syɔ̀ɔ́n nyanbeweeyi ni, ní i gbòyoo-káari káa, kaànɔnʔɔri si i nyɛ pe yalegèle ni.

⁵ Pe i gi nyuu níì jo: ‹Núngo yaà, mɔ a kɔ́ nùuni mii na í, níì cán mii a kɔ́ mɔ fóro.› Koro myɛ i nyɛ wírige mii fínaakoloyi ni, ní naà, gee gi sóori lè cángi myɛ ni.

⁶ Wéle, ki n sɛ́bɛ mii yɛ́ʔɛ ma n jo: Mii a tée pyèri í mii a be kéeli cɔɔnri, mii a gi sàraw kaan be ma,

⁷ wi lè yele kolomi wóo, ní yele tóobèle kolomɔ wóo,» Yawe wi jo nya. «Bele pe da ni nùndaanni yáriga sórogi lè nyanbeleyi na, ní i mii kanibɛɛngèle kpéʔele dǎndamayi na, mii a be sàraw foro bi kaan be ma, wee be yɛlɛ bi taa lè!»

⁸ Yawe n jo: «Lɔ̀ʔɔ ga taa ɛrɛzɛn jɔnjɔngɔ ni lǎli ni lè, pe n jo: ‹Mɔ a kɔ́ gi kálagi í, níì cán dùba i nyɛ gi ni.› Kánmi bee na mii a gi kpéʔele mii falipyebèle kéele na, koro ga pye mii a kɔ́ pe myɛ bìnɛw kálagi í.

⁹ Mii a yòdaʔaga yirige Zyakɔbi ni, bi mii nyanbeleyi taafɔlɔ yirige Zyuda ni. Mii wonyɛnɛ-wòlobèle a yi taa, mii falipyebèle a tɛ́ɛn yi ni.

¹⁰ Sarɔn tɛɛfiigi a pye yaweeyiligèle tɛɛliige, Akɔri jǐnlɔgi í pye yaweekpologèle tɛɛ̀sinɛgɛ mii syɛ́ɛnbèle ma, poro bele pe a ba mii caa lè.

¹¹ Kàjáa yele na, yele bele ye Yawe cée lè, yele bele ye fɛ̀ʔɛ mii nyanbejǎngi na lè, ní i yaliire kaangi Gadi ma, ní i yagbaala nyìngí dùvɛɛnnyaʔamiɔ na ni kaangi Menii ma lè,

¹² mii a yele tórigo ŋɔséew ma, yele myɛ a yégunri cáan, pé yele kɔnɔgi. Níì cán mii n yeri, yele si ga syɔɔ í, mii n joo, yele si ga lóʔo í. Kàjáa a yele gi kpéʔele, gee gi pee mii nyɛ́nɛ na lè, yele n gi nyɛ́nɛ n wòlo, gee ki mii bɛɛn lè.»

¹³ Gee bee na Kàfɔw Yawe n jo: «Wéle, mii falipyebèle a ra líi, kàjáa kateegi a pye yele na. Wéle, mii falipyebèle a ra gbo, kàjáa lògbaalaagi a pye yele na. Wéle, mii falipyebèle a ra fundaanra kpéʔele, kàjáa fɛ̀ɛrɛ a yele taa.

¹⁴ Wéle, mii falipyebèle a ra ŋúu fundaanra na be fúnyi ni, kàjáa yele na, yele a ra yákpogèle wáa yele fúnyi wɔʔɔgɔ báriga ni, yele a ra nyaan bàā peele, yele fúnyi fànʔa a kwɔ́ɔ.

¹⁵ Yele a yele mɛ́ɛgi yaʔa gi pye dánga kpéʔele yáriga mii wonyɛnɛ-wòlobèle nínge ni.» Kàfɔw Yawe n yɛlɛ wi mɔ kpóo, si mɛ́ɛgaa nikwɔɔ taʔa wi falipyebèle na.

¹⁶ Wee wi ga ni caa woro í dùbaw taa tári ni lè, wi a ra caa kányɛɛgi Kolocɔlɔɔ í dùbaw kpéʔele woro ma, ní wee wi ga ni kɛ̀ɛ́ tári ni lè, wi a ra kɛ̀ɛ́ kányɛɛgi Kolocɔlɔɔ mɛ́ɛgi na. Níì cán fɛ̀ʔɛlɛ a pye wɔʔɔzɔlɔgwɔɔyi kéele na, yi a tɔ́n mii yɛ́ʔɛ ma.

Nyɛ̀ʔɛvɔngèle ní táfɔnri kéele

¹⁷ «Níì cán mii a nyɛ̀ʔɛvɔngéle ní táfɔnrɔ sámaga. Syɔɔn a ní sɔ̀ngí taa sélimi kasɔ̀lɔgwɔɔgéle na í, ke sɔ̀ngurɔ a ní tìgi syɔɔn fúngo ni í.

¹⁸ Fundaanra ye yɛlɛ bàā kpéʔele, sáā muguri làla o làla gi kéeli na, gee mii a faan lè. Níì cán mii a Zyerusalɛmi faan gi pye mugurumi mɛ́ʔɛ na, gi syɛ́ɛnbèle í pye fundaanra na.

¹⁹ Mii a ra muguri Zyerusalɛmi kéeli na, mii a pye fundaanra na mii syɛ́ɛnbèle kéele na. Nyɛnimɛ kafulogo a ní lóʔo yaà í, sùpiiwáara kafulogo a ní lóʔo yaà í.

²⁰ Sàánnyɛɛnnɛ a ní pye yaà, lee li a canya cɛɛri yagana kwɔ́ɔ lè í, wàlá wolɛɛɔ, wee wi lè wi a wi sìíw canya foro í. Níì cán wee wi a kùu wobile ní bi sɔ̀lɔ pe myɛ na lè, wi a taa yɛ̀ʔɛlɛ dabata. Syɔ́ɔnwee si ga kólogo yɛ̀ʔɛlɛ dabata kurugo lè, wi a córo dánga yáriga.

²¹ Pe a kpaaya faan, si jée yi ni. Pe a ɛrɛzɛn séye fála, sáā yi yasanri líi.

²² Pe a ní kpaaya faan, wàa nikwɔɔ si ba jée yi ni í, pe a ní tirire cɔ́rɔ, ti yasanri si pye wàa nikwɔɔ lìile í. Níì cán mii syɛ́ɛnbèle canya nyɔ́ɔ a pye àmɛɛ tíiri canya nyɔ́ɔ nyɛ lè, mii wonyɛnɛ-wòlobèle a ra fundaanra kpéʔele be kɔ́yi fáli kéele na.

²³ Pe a ní da wɔʔɔ bàā wáa í, pìibēle a ní pye be ma fyáakpɔɔri mɛ́ʔɛ na í. Níì cán pe a pye syɛɛnfelegaa, gee na Yawe a dùbaw taʔa lè. Pe yòdaʔayi a pye ní be ní.

²⁴ Lǎli bee ni sáni pe mii mɛ́ɛgi yeri lè, mii a syɔɔ be ma. Pe a sèʔé pye jooli na mii si tée lóʔo be ma.

²⁵ Solomikaʔa, ní bàpile a ba pínɛ da líi, càaraɔ a ba ra nyàági káa àmɛɛ nɔ̀ɔ nyɛ lè, wàbiga sáā támiigi líi ki lìíli. Mii nyanbejǎngi myɛ na, kakologo wàlá kálagila a ra kpéʔele yaà í,» Yawe wi jo nya.