Ezayi 64 - Cebaara Bible 2010

¹ Mɔ ga maa tìgi naa n pye àmɛɛ kàjewaara náa nyín lè, ní àmɛɛ naà lɔ̀ʔɔ kaan ki i kángi lè, mɔ nigoobèle a dée mɔ mɛ́ɛgi cán, syɛɛnfeleyi a dée ra cɛ̀lɛ́ mɔ yɛ́ʔɛ ma.

² Lǎli ni mɔ kakpoloyi kpéʔele lè, yee yi lè wolo da ni sɔ̀ngí yi kéeli na í, mɔ n tìgi naa, a nyanbeleyi i cɛ̀lɛ́ mɔ yɛ́ʔɛ ma.

³ Syɔɔn ga kɔ́ɔ̀ ki joomɔ lóʔo nyáana í, líiweele ga kɔ́ɔ̀ gi lóʔo í, nyapile faala ga kɔ́ɔ̀ gi nyaa í, a gi joo kolocɔlɔwaa nikwɔɔ, wee wi lè wi o nyɛ mɔ í, wi n kɔ́ɔ̀ gi felege kpéʔele wee má wi wiyɛɛ daʔa wi na lè í.

⁴ Wee wi da ni sínni kèlē kpéʔele ní fundaanra ní lè, bele pe da ni sɔ̀ngí ni taagi mɔ kóloyi na lè, mɔ maa ni bele bee fàrá, kàjáa mɔ fúngi si n baa tanʔa gbanʔama, níì cán wolo n kapeele pye. Wolo si a kòro wɔʔɔgi ni, fwɔɔ bi taa wolo í ba syɔɔ.

⁵ Wolo myɛ n baa pye àmɛɛ yanɔnʔɔrɔ nyɛ lè, a wolo sínni kapyere myɛ pye àmɛɛ cècoo-nɔ́nʔɔrɔ nyɛ lè. Wolo myɛ n fána àmɛɛ waga nyɛ lè, wolo kolomi kèlē si i wolo lée ni syée àmɛɛ káfalaga nyɛ lè.

⁶ Syɔɔn faala o yaà, wee wi mɔ mɛ́ɛgi yiri lè í, wàlá wee wi yìri ŋúnɔmi na bi wiyɛɛ daʔa mɔ na lè í, níì cán mɔ n mɔ yɛ́ɛgi làriga wolo na, mɔ n wolo le wolo kolomi kèlē fanʔa kɔ́yɔ ni.

⁷ Koro ní ki myɛ ní, Yawe mɔ wi nyɛ wolo Tóow. Wolo wo nyɛ cóori, mɔ si i nyɛ wolo cóofaanw, wolo myɛ i nyɛ mɔ kɔ́yi fáli.

⁸ Ee Yawe, mɔ a kɔ́ mɔ fúngi yaʔa gi tanʔa bi sa nan ki dǎnw na í, mɔ a kɔ́ ra sɔ̀ngí da taagi kolomi na bàā syée nya làla o làla í. Koro na gi wéle, wolo myɛ i nyɛ mɔ syɛɛnnɛ.

⁹ Mɔ kecanyi n baa pye fìimɛ tára. Siyɔn n baa pye fìimɛ tára, Zyerusalɛmi n baa pye tɛɛ̀kalagiga.

¹⁰ Kpɔ̀ʔɔrɔli kpaacanga gi pye wolo ma lè, gi pye lè nìjanra wóʔo, gee ni wolo tóolɛɛbèle da ni mɔ sòoló lè, naanyìnge n gi sórigo. Wolo yacanri di pye yaà lè, ti n kálagi.

¹¹ Gee bee myɛ fúngo ni, ee Yawe, mɔ a sèʔé gi kpàraco lé? A mɔ a sèʔé kòro lé pyèrio, si wolo faʔa fwɔɔ bi ba sɔ̀lɔ ki dǎnw na?