Ezayi 63 - Cebaara Bible 2010

Ɛrɛzɛn cɛnɛw wi lè fyáara wóo ní

¹ Wìí si wi nyɛ wee, wi yìri Edɔmi ma ni maa lè, wee wi yìri Bosira kěgi ma, ní fàninyɛɛn-súruw búroyo ní, wee yalere ti daragi lè, a wi sámaga n yére ní kpɔɔmɔ ní, ní i táanri ní fànnɛʔɛgɛ ní? «Mii wii, mii wee wi nyuu ní sínnɛ ní lè, wee má fǎngi nyɛ bi gbǎn syɔɔn syɔɔ lè.»

² «Mɛ̀ɛ́ gi pye á mɔ yaleri si nyɛ́nɛgɛ, a mɔ búroyi pye mɔ a jo wee wi ɛrɛzɛn tánʔana lè ɛrɛzɛn tɛɛnùgugo ni, woro wóyi yii?»

³ «Mii nibin wi tánʔanani kpéʔele pɛ́ɛgi ni, syɛɛnfeleyi ni, syɔɔn faala ga pye ní mii ní í. Mii n be tánʔana n mii yaʔa mii fundanʔari ni, mii fundanʔagbɔɔrɔtɔw n be tɔ́nʔɔnɔ. A be sìsyaanw càri n wáa mii yaleri na, a mii mii búroyi myɛ nyɔ́ngɔ.

⁴ Níì cán gɔ̀lɔ́-wòloro canʔa kéele maa pye mii fúngi ni, á mii wóbèle nyùnzyɔɔrɔ yɛ́ɛlɛ kàri n nan.

⁵ Mii maa ni wéle ni máari, syɔɔn faala ga taa bi mii dɛ̀ɛmɛ í. A gi mii fúngi wɔ́ɔ, wàa ga taa n mii sígi í, lǎli bee ni a mii kɔ́gi mii dɛ̀ɛmɛ, a mii fundanʔagbɔɔri pye mii má tɛɛ̀sigile.

⁶ Mii n syɛɛnfeleye tánʔana n mii yaʔa mii fundanʔari ni, mii n yi kaan a yi yɛ́ɛyi i wóo mii fundanʔagbɔɔri na, níì yi sìsyaanw wo tári na.»

Yawe funjǎngi kéele

⁷ Mii a ní lúru Yawe funjǎngi kapyegèlē kurugo bi ge joo ke lè Yawe sòololi wòʔolo, bi yɛlɛ ní kacǎnyi myɛ ní Yawe kpéʔele wolo na lè. Wi funjàngbɔɔgi kèlē, Isirayɛli kpáagi wòolo ma, gee bee n jo kacǎnyi wi kpéʔele be na lè n yɛlɛ ní wi nyinigbɔɔmi ní, n wɔ́ɔ̀ yɛlɛ ní wi funjǎngi kapyenɛʔɛrɛ ní.

⁸ Wi maa jo: «Kányɛʔɛ na, pe i nyɛ mii syɛ̀ɛnnɛ, pe i nyɛ jaafɔɔlɔ, bele be lè pe o syɔɔn jànváa í!» Wi maa pye be ma syɔɔfɔlɔ.

⁹ Pe wɔʔɔyi myɛ ni, wi ga wàa faala tun wi ba be syɔɔ í, kàjáa wi yɛ́ɛgi ki be syɔɔ. Wi tàmagi, ní wi nyinidaari báriga ni wi tiimaw be nyúnyi syɔɔ. Wi n be dɛ̀ɛmɛ níì be láa booma cányi myɛ ni.

¹⁰ Kàjáa pe n céemɛ kpéʔele, pe n wi Pìicǎnni fúngo tanʔa, a wi kàri n pye pe nigoo, woro wi kapɛɛnni kpúmɔn ní be ní.

¹¹ Lǎli bee ni a wi syɛ́ɛnbèle sɔ̀ngi n taa booma cányi kéele na, ní Mowizi kéeli na wi pye lè wi falipyew, níì jo: «Sán wi nyɛ, wee wi wi bàtogi ní gi nàʔafɔbèle kíle n yirige sólomi lɔ̀ʔɔ ni lè? Sán wi nyɛ, wee wi wi Pìicǎnni lége be níngi ni lè?

¹² Wi n wi nìjanri kɔ́lɔ fíige Mowizi kàliige ma, wi n lǒyi ceri pe yɛʔɛ̀ ma, bi bàngwɔɔ mɛ́ʔɛ taʔa wiyɛɛ na.

¹³ Wi n be yɛ́ɛgi kíni n lòcuruyi jeli àmɛɛ syɔnʔɔ fìími tára forogi lè, pe si da ni kpírigi í.

¹⁴ Amɛɛ yaweʔe tíri jǐnlɔgɔ ni lè, Yawe Pǐli n pan ní be ní ŋɔ́ndaali ma.» Kánmi bee na mɔ mɔ syɛ́ɛnbèle yɛ́ʔɛ kíni, jàngó bi nìjangbɔɔrɔ mɛ́ʔɛ taʔa miyɛɛ na.

Kùsulugi nyɛ́ɛrigbɔʔɔ

¹⁵ Bi mɔ yaʔa nyɛ̀ʔɛni na wéle naa, bi mɔ yaʔa yaà mɔ nijanri tɛɛkòrojànga ni, sán mɔ yéjaagi ní mɔ sanbalimi nyɛ? Mɔ funjǎngi ní mɔ nyínimi n wolo cée.

¹⁶ Bi gi taa mɔ wi nyɛ wolo Tóow, Abirahami ga wolo cán í, Isirayɛli ní o sɔ̀ngí ni taagi wolo na í. Yawe, mɔ wi nyɛ wolo Tóow, n téè láa yaà kwɔ́ɔmɔ fun, mɔ i yiri wolo nyùnzyɔɔw.

¹⁷ Yawe, nyàʔá na mɔ gi yaʔa a wolo curugo n léeli mɔ kóloyi na, a mɔ i wolo fúnyi gbàngí, jàngó mɔ yɛ́ɛgi fyáara a kɔ́ pye wolo ma í? Lúru mi pan wolo ma mɔ falipyebèle kéele na, mɔ kɔ́rigi syɛɛnfeleye kéele na.

¹⁸ Mɔ syɛɛncanbèle ga tɛ́ɛn tári fáliga na n mɔn í. Wolo nígoobèle n mɔ tɛɛcǎngi tánʔana.

¹⁹ Wolo i nyɛ, mɔ a jo bele be lè n téè láa yaà làridɔnnɔ ni, mɔ o nyɛ pe nyúngi na í, bele be lè mɔ mɛ́ɛgi o yiri be na í. Ee! Mɔ ga maa nyɛ̀ʔɛgèle yabi, ní mɔ ga maa ni tíri naa, nyanbeleyi a dée ra cɛ̀lɛ́ mɔ yɛ́ʔɛ ma.