Ezayi 62 - Cebaara Bible 2010

Zyerusalɛmi lúruzamagali

¹ Siyɔn tàmagi gi nyɛ mii ni lè, mii a tée pyèri í, Zyerusalɛmi tàmagi gi nyɛ mii ni lè, mii a tée láʔa í, fwɔɔ bi taa wi sínni í ba folo yiri àmɛɛ nyǐnjerigi nyɛ lè, wi syɔɔli í da nyín àmɛɛ nìmubwɔɔlɔ naanyìnge nyɛ lè.

² Lǎli bee ni syɛɛnfeleyi a mɔ sínni nyaa, fànʔafɔbèle myɛ a mɔ nijanri nyaa, pe si a mɛ́ɛfɔngɔ le mɔ na, gee Yawe nyɔ́ɔgi a tɛ̀ɛn lè.

³ Mɔ a pye nìjanra nyùndɔnnɔ Yawe kɔ́gi ni, ní fànʔafɔ-nyùndɔnnɔ, mɔ Kolocɔlɔw kadaala ni.

⁴ Pe a ní da mɔ yiri: «Céwee be yaʔa lè» í. Mɔ tári a ní wɔ́ɔ ra yiri: «Tɛɛ̀kalagiga» í. Kàjáa pe a ra mɔ yiri: «Wonidaanmaw,» sáā mɔ tári yiri: «Wobɔriw.» Níì cán mɔ n Yawe dɛ́nɛ, nàɔn a wɔ́ɔ pye mɔ tári ma.

⁵ Amɛɛ nìgɔcariɔ gáà nàngeele sinján pìcaa pɔri lè, ànbée mɔ faanfɔw a mɔ pɔri, ní àmɛɛ cefɔɔn nyɛ lè cefɔnw fɔ́lɔ fundaanra, ànbée mɔ a pye mɔ Kolocɔlɔw fundaanra.

⁶ Zyerusalɛmi, mii n kpaàwelebéle télege mɔ tobèle ǹjoʔo ni, pe ga yɛlɛ bi pyèri nyáana í n cángi pínɛ yébiligi ni. Yele bele ye Yawe sɔ̀ngí ni taagi Zyerusalɛmi kéeli na lè, yele a kɔ́ ŋɔ́n daa nyáana í!

⁷ Yele a kɔ́ wi yaʔa wi ŋɔ́n wi daa nyáana í fwɔɔ bi taa wi ní Zyerusalɛmi lúrugo télege bi wi pye sòololo yáriga tári na.

⁸ Yawe n kàli wi kàliige kɔ́gi, ní wi séew kɔ́lɔ na níì jo: «Mii a ní mɔ bilew kaan wi pye mɔ nígoobèle yaliire í. Nibɔɔnnɔ a ní mɔ duvɛɛnfɔnw gbaa í, wi lè mɔ valaw yataʔa.

⁹ Kàjáa bele pe ga bilew láa lè, poro pe a wi lìi, sáā Yawe sòoló, ní bele be ɛrɛzɛnw cɛnɛ lè, poro pe a wi dùvɛɛnw gbaa mii tɛɛcǎngi kadàagēle na.»

¹⁰ Ye yiri, ye yiri kpàánweegèle ni! Ye kologo sámaga syɛɛnfelegi ma! Ye gi wòlo, ye kólogi wòlo, ye kàdɛnɛri yirige yaà! Ye dìrapo yìrige syɛɛnfeleyi ǹjoʔo ni.

¹¹ Gee Yawe nyuu lè, a ki i lúro yaà fwɔɔ tári láʔala na, koro gi nyɛ gee naa, wi n jo: «Ye gi joo Siyɔn calipili ma yé jo: ‹Mɔ Syɔɔfɔw wi maa wee. Wéle, sàraw i yaà wi ma. Kapyegèle tɔ̀nɔ n kíni ni syée wi yɛ́ɛgi na.› »

¹² Pe a ra be yiri «syɛɛnfele-jànga,» ní «bele nyúnyo Yawe syɔɔ lè.» Mɔ na, pe a ra mɔ yiri: «Kěgi be caa lè,» ní «Kènaa-sìnyaʔagi.»