Ezayi 61 - Cebaara Bible 2010

Yawe tundunw Wi tundunri, ní wi syɛɛnjóori

¹ Kàfɔw Yawe Pǐli i nyɛ mii na, níì cán Yawe n mii télege, wi n mii tun mii í sa ra syɛɛnjóocǎnri nyuu foomɔfɔbèle ma, bàā fûngalagiyi fɔ̀ɔlɔ fúnyo kpaliya sámagi, bàā wɔ́rɔdi kéele nyuu púlobèle ma, bàā yaʔali kéele nyuu kàsolebèle ma.

² Bàā yɛ́ɛli kéele jáari, lee ni Yawe a syɛ́ɛnbèle kpɔ́ʔɔ lè, bàā wolo Kolocɔlɔw gɔ̀lɔ́-wòloro canʔa kéele jáari, bàā be kpɛʔɛlɛ, bele myɛ be nyɛ kùu-káyaʔa na lè.

³ Bi fànʔafɔ-nyùndɔnnɔ kaan cɔ́ɔngi sìndɛʔɛ ni Siyɔn wóbèle bele ma be nyɛ lè kùu-káyaʔa na, bi fundaanra sìnmɛ kaan kùu-káyaʔa sindɛʔɛ ni, bi sòololo búrogo kaan fûngalagiri sìndɛʔɛ ni, jàngó paa be yiri sínni terebɛnti tíire, dee Yawe cɔ́rɔ lè wi nìjanri kéele na.

⁴ Pe a ní faan gurubɛɛlɛɛyi na, pe a ní booma kpaatooyi yìrige, pe a ní kèye faan, yee yi da jaa lè, yee yi da kòro lè kataya a gi yìrigēle saʔa kwɔ́ɔ.

⁵ Nibɔɔnnɔ a pye beè baa yele yaweeyiligèle nàʔá, táraa nikwɔɔ wòolo a ba pye yele tèfalabéle, ní yele ɛrɛzɛn sefalabéle.

⁶ Yele si na, pe a ra yele yiri «Yawe sáriga-wòlobèle.» Pe a ra yele yiri «wolo Kolocɔlɔw falipyebèlē.» Yele a ra syɛɛnfeleyi lɔ́rɔ líi, yele a ra yeyɛɛ vèré ní be nìjanri ní.

⁷ Yele a ba lɛɛgéle siin taa yele fɛ̀ɛ́ri sìndɛʔɛ ni. Pe a ba pye fundaanra na funjurugori sìndɛʔɛ ni. Kánmi bee na pe a lɛɛgéle siin taa be tári ni. Pe fundaanri si pye bàngwɔɔ wóro.

⁸ «Níì cán mii wi lè Yawe, kútiisinw n mii dɛ́nɛ, nɔ̀ʔɔrɔgi, ní námaraw n mii bɛɛn. Mii a be tɔ̀nɔw kaan be ma funviire na, si wɔ́ɔ bàngwɔɔ joogaanna kpéʔele ní be ní.

⁹ Pe yòdaʔayi a cán tári syɛɛnfeleye nínge ni, pe syɛɛnfelegi a cán syɛɛnfeleyi nínge ni. Bele myɛ pe ga be nyaa lè, pe a gi cán bi cán yòdaʔagaa gii, gee na Yawe dùbaw taʔa lè.»

Kacànna cánna ŋúnugo

¹⁰ Mii i fundaangbɔɔrɔ kpéʔele Yawe ni, mii fúngi i muguri mii Kolocɔlɔw ni. Níì cán wi n syɔɔli búroyo le mii na, wi n sínni burogbɔʔɔ tɛ́ʔɛ n mii tɔ́n àmɛɛ cefɔɔn fɔ́lɔ wiyɛɛ vèré ní kpɔʔɔrɔ nyùndɔnnɔ ní lè, àmɛɛ cefɔɔn wiyɛɛ vèré ní wi fèreri yárira ní lè.

¹¹ Níì cán àmɛɛ tári di yafiinri fíin ni yirigi lè, ní àmɛɛ nángwɔɔ wi lùguri fíin ni yirigi lè, kánmi bee na Kàfɔw Yawe a sínni, ní sòololi fìin bi yirige tári syɛɛnfeleye myɛ nyɛ́nɛ na.