Ezayi 60 - Cebaara Bible 2010

Zyerusalɛmi nìjanri n níì lúru n tiyɛɛ daa

¹ «Yìri maa daragi, níì cán mɔ gbɛɛnmi bi yiri bee, a Yawe nìjangbɔɔri i yirigi mɔ ma.

² Níì cán wéle, yébilimi i tári tɔ́ngi ni syée, yébiliwɔɔli i syɛɛnfeleyi tɔ́ngi. Kàjáa mɔ má Yawe gbɛ̀ɛ́nmi yirigi, mɔ njogi ni wi nìjangbɔɔri tiyɛɛ dèé.

³ Syɛɛnfeleye a ra táanri mɔ gbɛɛnmi na, fànʔafɔɔlɔ í ra táanri mɔ gbɛ̀ɛnmi na bi folo ni yirigi lè.

⁴ Mɔ yɛ́ɛgi yìrige mi wéle mi miyɛɛ màʔa, pe i peyɛɛ gbóʔoro pe myɛw, pe i maa mɔ ma. Mɔ nanbiigèle n yìri tɛɛ̀leelige ni ni maa, pe n mɔ calipiigèle láa n cò kɔ́yi ni ni maa.

⁵ Gee bee nyaana a fundaangbɔɔrɔ kaan mɔ ma, mɔ a ra muguri mɔ fúngi ni sáā cáʔara, lǎli ni sólomi lɔ̀ʔɔ lɔ́rɔ a kolo bi pan mɔ ma lè, ní lǎli ni syɛɛnfeleyi lɔ́rɔ a pan mɔ ma lè.

⁶ Fàlibaa-nɛʔɛrɛ a mɔ tɔ́n, n fàra Madyan, ní Efa ye fàlibaayi na. Yi myɛ a yìri Saba ma. Yi a tɛ́ɛw, ní nùndaanni yárira tugo bi pan, sáā Yawe sòololi kéele ŋúu.

⁷ Kedaari yaweeri kuruyo myɛ a kpóʔoro mɔ tɛ́ʔɛ ma. Nɛbayɔti bàpɔbèle a pye mɔ kɔ́lɔ na. Pe a ra be wóo sáriga-sórigoo mii sáriga-wòlo-yafaangi na, be kéeli si a mii dɛ́nɛ, mii si nìjanra taʔa mii nìjanri kpaʔa na.

⁸ Bɛ̀lɛ́ be nyɛ bele bee, be yìrigí lè mɔ a jo fàfaanya yii, ní mɔ a jo kàtogèlē gɛɛ, gele ge syée ke zyàári ma lè?

⁹ Níì cán lǒgi nínge tátɛɛgéle woolo n be sɔ̀ngumi taʔa mii na, á Tarisiisi bàtobèle si i nyɛ yɛ́ɛgi na, bi yìri yaà ní mɔ piibèle ní léelige bi pan ní be wálifiiw, ní be tɛ́ɛw ní, Yawe mɔ Kolocɔlɔw Isirayɛli Wojanw mɛ́ʔɛ kéele na, woro wee wi nìjanri taʔa mɔ na lè.

¹⁰ Nibɔɔnnɔ a ní ba mɔ tobèle faan, pe fànʔafɔbèle a ra báara mɔ ma. Mii fundanʔagbɔ́ɔrɔtɔw n mɔ kpúmɔn, kàjáa mii funjǎngi báriga ni mii n nyinimɛ taa mɔ na.

¹¹ Mɔ kpaanweegèle a pye womúgu-yaʔagéle ní làla o làla, ke a tɔ́n í, n cángi pínɛ yébiligi ni, koro ga pye bi syɛɛnfeleyi lɔ́rɔ yaʔa ti jée mɔ ni, n fàra yi fànʔafɔbèle, ní be taʔara wóbèle na.

¹² Níì cán syɛɛnfelegee, ní fǎngee ga pye ki o báara mɔ ma lè í, ki a kálagi, syɛɛnfeleyi bee a kwɔ́ɔ péw.

¹³ Liban nìjanri a pan mɔ ma, ti lè siipirɛ tíiri, ní ɔrimi tíiri, ní buyisi tíiri, toro myɛ bìnɛw a mii tɛɛcǎngi yaʔa kaa daragi, mii si kpɔʔɔrɔ taʔa tɛ́ɛgi na beè mii tɔ́lɔyi taʔa lè.

¹⁴ Bele be fǎngi gbàngí mɔ na lè, poro jáabèle a ba ra peyɛɛ jɛ́rɛgi mɔ yɛ́ʔɛ ma, mɔ faʔafɔbèle myɛ a ba ra tíri da tuun mɔ láari ni, pe a ra mɔ yiri Yawe kěgi, ní Isirayɛli Wojanw Siyɔn.

¹⁵ Sáni mɔ í pye lè pe mɔ cée, si mɔ para, si pye beè lè syɔɔn o sɔ̀lɔ́ í, mii a mɔ kpéʔele bàngwɔɔ kpɔ́ɔmɔ yáriga, mɔ a pye yìrigèle myɛ syɛ̀ɛnnɛ fundaanra kéele.

¹⁶ Mɔ a syɛɛnfeleyi nɔ́nɔ syɔɔnri, mɔ a fànʔafɔbèle yíregéle syɔɔnri. Mɔ a gi cán bi cán mii wi nyɛ Yawe mɔ Syɔɔfɔw, bi cán Zyakɔbi Séew Fɔ́lɔ wi nyɛ mɔ Nyunzyɔɔw.

¹⁷ Mii a tɛɛ̀ yaʔa wi pan kanyɛɛnrɛ sìndɛʔɛ ni, mii a wálifiio yaʔa wi pan túnmɔri sìndɛʔɛ ni. Mii a kanyɛɛnrɛ yaʔa di pan tiire sindɛʔɛ ni, mii a tunmɔrɔ yaʔa di pan kàdɛnɛrɛ sìndɛʔɛ ni. Mii a yɛɛ̀nyingi kaan jàngó bàā mɔ kɔ̀rɔsíi, si sínni télege mɔ nyúngi na.

¹⁸ Gàlagí kéele joomɔ a ní lóʔo mɔ tári ni í, nyáʔamina ní kálagila a ní lóʔo mɔ láʔagoloyi na í. Mɔ a ra mɔ tobèle yiri ‹Syɔɔlɔ,› sáā mɔ kpaanweegèle yiri ‹Sòololo.›

¹⁹ Cángi ban ki a ní pye mɔ má gbɛ̀ɛnmɛ cángi làla ni í, wàlá yégi ban ki a ní da gi gbɛ̀ɛ́nmi yirigi mɔ ma í. Kàjáa Yawe wi a pye mɔ gbɛɛnmi làla o làla, mɔ Kolocɔlɔw a pye mɔ gbɛɛngbɔɔmi.

²⁰ Mɔ cángi a ní jée í, mɔ yégi a ní jée yébilimɛ ni í. Níì cán Yawe wi a pye mɔ gbɛɛnmi làla o làla. Mɔ kuu-káyaagi cánya a kwɔ́ɔ.

²¹ Mɔ syɛ́ɛnbèle myɛ a pye syɛɛnsinbéle, tári a pye pe worò làla o làla. Fíinge gii, gee mii cɔ́rɔ lè, mii kɔ́yi fáli wii, bi mii gbɛ̀ɛngbɔɔmi tɛ̀ɛn.

²² Wobiipiili a ba ra córo saala nyɔ́ɔ na, wee wi cɛ́rɛ n sɔ̀lɔ lè wi a ba pye fànnɛʔɛgɛ syɛɛnfelege. Mii Yawe, mii a kɔlɔ̀ wári bi kérigèle bee foro ke lǎli ni.»