Ezayi 6 - Cebaara Bible 2010

Ezayi n wiyɛɛ gaan bàā báara Yawe ma

¹ Fànʔafɔw Ozyasi yɛɛguuli na, a mii Kàfɔw nyaa wodɛ́ɛɔn ní fàngolo na, lee li yìri ǹjogi ni lè gbanʔama, á wi búrogi táàma kpɔ̀ʔɔrɔli kpaʔa nyìn.

² Seerafɛɛnbéle maa pye woyérebéle ní wi ǹjogi ni. Fókaanya kɔrɔni kɔrɔni maa pye pe myɛ nibin nibin na. Fókaanya siin-ziin n pye n be yɛ́ɛyi tɔ́n, á yee siin-ziin pye n be tɔ́lɔyi tɔ́n, á yee siin-ziin si pye a be i yìrigí ní yoro ní.

³ A seerafɛɛnbèle i yákpogèle wáa ni gi nyuu peyɛɛ ma níì jo: «Yawe wi lè Nyɛ̀ʔɛni Sùlasiibéle Kafɔlɔ, woro wi nyɛ Wojanw, Wojanw, Wojanw. Tári myɛ n nyìn wi nìjangbɔɔri na.»

⁴ A kpaaweegèle kàpɔɔnbēle i cɛ̀lɛ́ pe yákpogèle wáala báriga ni, á kpáagi nyìn wírigi na.

⁵ Lǎli bee ni a mii jo: «Wɔʔɔlɔ i nyɛ mii na! Mii n pùuni, níì cán mii i nyɛ syɔɔnwaa, wee nyɔ́ɔwara di nɔ́nʔɔ lè, mii i nyɛ syɛ́ɛnbèle pèle nínge ni, bele nyɔ́ɔwara di nɔ́nʔɔ lè, á mii nyapiigèle si Fànʔafɔw Yawe nyaa, woro wee wi lè Nyɛ̀ʔɛni Sùlasiibéle Kafɔlɔ.»

⁶ Kàjáa a seerafɛɛnwaa nibin yìri fókaanya na n pan mii ma, naàniganna nibin maa pye wi kɔ́gi ni, lee wi da kpàra ní cabarabile ní n láa sáriga-wòlo-yafaangi na lè.

⁷ A wi baa li tánga mii nyɔ́ɔgi na níì jo: «Lee naa n tánga mɔ nyɔɔwari na, mɔ kolomi n láʔa mɔ na, mɔ kapeeli kùsulugo fáli n kpéʔele.»

⁸ A mii Kàfɔw yákpolo lóʔo a wi jo: «Wìí syɔ́ɔn mii a tun? Wìí wi a tánʔani pye wolo ma?» A mii jo: «Mii wi wee, mii tun.»

⁹ A wi mii pye: «Da syée mi sa syɛ́ɛnbèle bee pye: ‹Ye kòro yaa lúro, yele si a gi kɔ́rɔw cán í! Ye kòro yaa wéle, yele si a ra yafyɛn cángi da láʔala í.›

¹⁰ Ki n yɛlɛ mi syɛ́ɛnbèle naa fúnyo gbàn, pe líiweegèle pɛɛn, mí be nyapiigèle tɔ́n, jàngó pe a kɔ́ ra nyaagi pe nyapiigèle ni í, pe a kɔ́ ra lúro pe líiweegèle ni í, pe a kɔ́ ra kérigèle cángi be fúnyi ni í, pe a kɔ́ kàri si pɔʔɔ í.»

¹¹ A mii jo: «Fwɔɔ bi ba nan làlìí na Kàfɔw?» A wi mii yari: «Fwɔɔ bi taa kěyi í ba kálagi bi pye syɛɛnnɛ fun, kpáayi í pye syɛ̀ɛnnɛ fun, tári í kálagi péw.

¹² Fwɔɔ bi taa Yawe í syɛ́ɛnbèle nɛnɛ tórigo léelige, tári myɛ si kòro wowaara ní.

¹³ Pe tílaya kɛɛ wógi ga kòro di ni, koro a sógi. Ki si a pye àmɛɛ terebɛnti tíige, wàlá syɛni tíige nyɛ lè, pe ga gi kpúmɔn, ki nyúngi n kòro yaà, syɛɛnfelegi bee nyúngo a ba yòdaʔacànga yirige.»