Ezayi 59 - Cebaara Bible 2010

Yapariga Kolocɔlɔɔ ní yele níngi ni

¹ Eʔe, Yawe kɔ́gi ga kpere n sɔ̀lɔ syɔɔn syɔɔlɔ na í, wi líiweeli ga wɔ́ɔ̀ pɛɛn n sɔ̀lɔ lóʔolo na í.

² Kàjáa yele kakolobyeri di wàlima lége yele ní yele Kolocɔlɔw nínge ni, yele kapeegèle ke wi yɛ́ɛgi làriga yele na, koro na wi o lúro yele ma í.

³ Níì cán sìsyaanw n yele kadaagèle nɔ́nʔɔ, a kakolobyeri yele kabegèle nɔ́nʔɔ. Yele nyɔɔwari i jànvaaw nyuu, a yele nyíngèle i námaraw kabala ni nyuu.

⁴ Wàa faala o kútii kúunri ní sínnɛ ní í, wàa faala o jǐn kútii ni kányɛɛgi na í. Pe i peyɛɛ daari gbanzan syɛ́ɛnrɛ na, ní i jànvaa syɛ́ɛnrɛ nyuu, pe i yèré fǎngi gbànna fícɛnnɛ na, ní i sìnzinmi sii.

⁵ Pe i sìnɛ́ màátɔn carigéle na, ni ge ciri, pe i bèémaara tíin. Wee wi ga káa be cárigèle na lè, wi n kùu. Pe ga li làa nibin jaa, wàmɔrɔ n yiri li ni.

⁶ Pe fànitiinw a gbǎn burogo wólo nyɔɔ í, pe a gbǎn peyɛɛ dɔ́n ní be kɔ́yi fáli ní í. Pe kapyegèle i nyɛ sìnzinmɛ kapyegèlē, a péemi kapyere wɔ́ɔ i nyɛ be kɔ́yi ni.

⁷ Pe tɔ́lɔyi i fé ni syée kapeebyeri kurugo, pe fúnyi n wári tɛɛlɛ fun sìsyaanw wolo kurugo. Pe sɔ̀nguri i nyɛ sìnzinmɛ sɔngurɔ, kálagili ní nyáʔamini i nyɛ be kóloyi ni.

⁸ Pe ga yɛɛ̀nyingi kólogo cán í, sínnɛ o nyɛ be túluyi ni í. Pe i kobiikologéle kpéʔele peyɛɛ ma, wee faala ga ni táanri ge ni lè, wi ga yɛɛ̀nyinge cán í.

Kolocɔlɔɔ syɛ́ɛnbèle n be kolomi cán

⁹ Koro na kútiisinw canʔana wolo na, sínni o nangi wolo na í. Wolo maa ni gbɛ̀ɛ́nmi sige, yébilimi si bi bee. Gbɛ̀ɛngbɔɔmɔ wolo da ni sige, á wolo si ba ni táanri yébilimi ni.

¹⁰ Wolo i tala ni syée àmɛɛ fúunbéle nyɛ lè gungo taana. Wolo i tala ni máari àmɛɛ bele nyɛ, bele be lè pe nyapiigèle o nyɛ be ma í. Wolo i kpírigi cânvulɛɛli na àmɛɛ cângwɔɔ-yébilige làla nyɛ lè, n wolo yaʔa cólogomi nínge ni wolo i nyɛ àmɛɛ kúbéle nyɛ lè.

¹¹ Wolo myɛ i kaana àmɛɛ ursibéle nyɛ lè, wolo i kɔ́nʔɔri sìnyére ni àmɛɛ kàtogèlē nyɛ lè. Wolo i kútiisinw sige, yafyɛn si ga nyaa í! Wolo i syɔɔli sige, kàjáa li n canʔana wolo na.

¹² Níì cán wolo kapeeyi n nɛʔɛ mɔ yɛ́ʔɛ ma, a wolo kapeegèle i séera kpéʔele wolo kánmi na. Wolo kapeeyi i nyɛ ní wolo ní, a wolo wolo kolomi kèlē cán.

¹³ Poro bi nyɛ wolo n sìnloʔomɔ kpéʔele níì Yawe jànváa n wàli n léeli wolo Kolocɔlɔw na. Wolo i péemi ní céemi syɛ́ɛnrɛ nyuu, níì jànvaaw syɛ́ɛnrɛ fícɛnnɛ taa, ní i sànʔari kpéʔele wolo fúnyi ni.

¹⁴ Pe n kútiisinw ŋɔrigɔ n wáa, pe n sínni yérige yaà léelige. Níì cán kányɛɛgi i kpírigi syɛ́ɛnmi tɛɛ̀kpoʔorogo ni, sínni a gbǎn tɛɛ̀jeʔe taa yaà í.

¹⁵ Kányɛɛgi n kwɔ́ɔ n yiri yaà, wee wi wiyɛɛ có kapeʔe pyele na lè, pe i woro yáriri fuguri ni lée. Yawe n gee bee nyaa, a gi wi fúngi tanʔa gbanʔama, àmɛɛ wi gi nyaa lè kútiisiɔn ní o beè í.

Yawe dɛ̀ɛmɛni

¹⁶ Wi n gi nyaa syɔɔn faala o yaà í, ki n pye wi ma funwɔɔrɔ àmɛɛ wi gi nyaa lè wàa faala o kùsulugo kpéʔele í. Lǎli bee ni wi tiimaa kɔ́gi n baa pye wi dɛ̀ɛmɛfɔlɔ, a wi sínni wi sígi n yérige.

¹⁷ Wi n sínni le burogo àmɛɛ tunmɔrɔ búrogo nyɛ lè, wi n syɔɔli túnmɔrɔ nyundɔngɔ tɔ́n. Wi n gɔ̀lɔ́-wòlori búroyo le a gi pye burodɔnɔgɔ níì wiyɛɛ dɔ́n ní yejaagi ní àmɛɛ burogbɔʔɔ nyɛ lè.

¹⁸ Wi a syɔɔn o syɔɔn sàra bi yɛlɛ ní gee ní wi yɛlɛ bi taa lè, wi fundanʔari a kòro wi kàsiitun-nyɛ́nbèle na, Wi nigoobèle si gi taa, gee gi yɛlɛ be na lè, bi koro wonijangi kpéʔele lǒgi nínge tátɛɛgéle woolo na.

¹⁹ Pe a ra fɛ̀ɛgí Yawe mɛ́ɛgi na bi séli yaà canʔajeemɛ ma, bàā fɛ̀ɛgí wi nìjangbɔɔri na, bi láa yaà canʔafolomɔ ma. Lǎli ni kasiitun-nyɛ́nw ga pan àmɛɛ cábiga nyɛ lè, Yawe Pǐli a wi nɛnɛ tórigo.

²⁰ «Nyùnzyɔɔɔ i maa Siyɔn ma. Zyakɔbi syɛ́ɛnbèle bele má be kàdoʔo wáa be kapeegi ma lè,» Yawe wi jo nya.

²¹ Yawe n jo: «Mii si na, joogaanni mii a kpéʔele ní be ní lè, loro li nyɛ lee naa: Mii Pǐli li nyɛ mɔ na lè, ní mii syɛ́ɛnri mii le mɔ nyɔ́ɔgi ni lè, ti a láʔa mɔ nyɔ́ɔgi na í, wàlá mɔ piibèle, ní poro pìíbèle nyɔ́ɔyɔ na í, bi séli tɔ́ɔliw naa na bàā syée yaà làla o làla,» Yawe wi jo nya.