Ezayi 58 - Cebaara Bible 2010

Súnw wi Kolocɔlɔɔ dɛ́nɛ lè

¹ «Da yákpoli wáa ní mɔ yákpodirigi myɛ ní, mɔ a kɔ́ li tìrige í, mɔ yákpoli kpɔ́ʔɔ àmɛɛ tòmaʔa wiimɛ nyɛ lè, mi mii syɛ́ɛnbèle kapeeye tɛ̀ɛn be na, mi Zyakɔbi kpáagi wòolo kapeegéle tɛ̀ɛn be na!

² Pe i mii caa canʔa o canʔa, pe i caa poro í mii kóloyi cán. Pe n peyɛɛ bye àmɛɛ syɛɛnfelegaa nyɛ, gee gi sínni sámaga n cò lè, ki si ga téè gi Kolocɔlɔw kútii kéele yaʔa í, pe i kútiisinw kéele yíbe mii ma, pe i caa Kolocɔlɔɔ í nùuni naa.

³ Pe i mii yíbe níì jo: ‹Nyàʔá gi nyɛ wolo súnw kalele, kapye mɔ o wi nyaagi í? Ba nyàʔá na wolo woyɛɛ wɔʔɔ kapye mɔ mako o nyɛ gi ni í?› Koro n taa yele súnw canlege na, yele i syée yele kapyegèle kurugo, ní i yele falipyebèle myɛ có ní fungbanya ní.

⁴ Yele i súnw nii kàkabalayi, ní kàsiiw pyele na, ní i kpúmɔn peemɛ ni, ní kágungèle ní. Yele níjanʔa súnw leganma o nyɛ àmɛɛ gi yɛlɛ kaa kpéʔele lè í, koro na yele yákpogèle o lúro yaà ǹjogi ni í.

⁵ Syɔɔn ga wiyɛɛ dìrige cángee na lè, níì wi nyúngi jùngu àmɛɛ lònyɔɔ nyàákanga nyɛ lè, níì tìgi n too gɔ̀nvaʔaga na cɔ́ɔngi ni, koro lé mɔ yiri súnw? A cángi bee kéele Yawe dɛ́nɛ lé?

⁶ Súnleganmee bi mii dɛ́nɛ lè, poro bi nyɛ bee naa: Bi péemi nyɔ̀ʔɔdiriye cɛnɛ, bi zúuw yapwɔɔrɔ sánʔana, bele na wɔʔɔgi gbàn lè, bi bele bee yirige yaʔa wɔ́rɔbéle, bi zúubèle féleye myɛ cɛnɛ.

⁷ Mɔ liilaa kaan kateèjaaw ma, máā foomɔfɔbèle tìrigí maa légi mɔ kpáagi ni, bele be nyɛ lè tɛɛkòrogo fun ni. Mí burogo le wee na mɔ ga nyaa lè cepyá, mɔ si a kɔ́ kàdoʔo wáa wee ma wi nyɛ lè mɔ tiimaa céri tɛ́ɛgaa í.

⁸ Lǎli bee ni mɔ gbɛɛnmi a yiri àmɛɛ nyǐnjerigi nyɛ lè, mɔ pɔʔɔli si folo bi yiri lǎli bee wonijanna ni. Mɔ sínni a kíni mɔ yɛ́ɛgi na, Yawe nìjangbɔɔri si pye mɔ kurugo.

⁹ Lǎli bee ni mɔ a yeri, Yawe si syɔɔ mɔ ma. Mɔ a yákpoli wáa, wi a mɔ pye: ‹Mii wi wee.› Lǎli ni mɔ ga zúuw yirige mɔ tɛ́ɛgi ni lè, ní kabeli li nyáʔana ní fundanʔara ní lè, níì faʔami syɛɛnjóoro yaʔa,

¹⁰ níì mɔ tiimaa liilaa kaan kateèjaaɔ ma, níì wɔʔɔgɔfɔlɔ kaan a wi lìi n tín, mɔ gbɛɛnmi a ra yirigi yébilimi ni, mɔ yébilimi a kàri bi pye àmɛɛ cânvulɛɛlɛ nyɛ lè.

¹¹ Yawe a pye mɔ yɛ́ɛgi na làla o làla, wi a mɔ tín lìíli na lɔ̀ʔɔ fun tári ni, si ní fànʔa le mɔ yasɛɛyi ni. Mɔ a pye àmɛɛ nángwɔɔ nyɛ, wee be fɔɔnri lè, ní àmɛɛ pùnweele nyɛ, lee lɔ̀ʔɔ gi lè ki o kwóo í.

¹² Mɔ bárigaw ni pe a ní faan gurubɛɛlɛɛyi na, mɔ a ní booma kapɔɔnbèle yìrige. Pe a ra mɔ yiri tǒw wéeye tɔ́nvɔlɔ, ní kóloyi sámagafɔlɔ, ní wee wi gi kaan syɔɔn í ní tɛ́ɛn tári ni lè.

Cândɛnɛgi gi Kolocɔlɔɔ dɛ́nɛ lè

¹³ «Mɔ ga mɔ tɔ́lɔyi cò cândɛnɛgi canʔa na, níì láʔa mɔ nyɛ́nɛ kérigèle kpéʔelele na mii canjǎngi ni, mɔ ga ni cândɛnɛgi yiri mɔ cannidaanmaga, ní i cángi bee córo Yawe canjànga, n gi pye cângbɔʔɔ, mɔ ga fɔ̀lɔ ni mɔ tánʔagèle kpéʔele í, mɔ ga pye mɔ o mɔ fáliw kpéʔele í wàlá ni nyùngo fun syɛ́ɛnri nyuu í,

¹⁴ lǎli bee ni, mɔ a fundaanra taa Yawe ni, mii si mɔ télege tári ǹjoʔo ma tɛ́ɛyɛ ni. Mii a ra mɔ gbóo ní mɔ tóow Zyakɔbi kɔ́rigi ní.» Níì cán Yawe nyɔ́ɔgi ki gi joo.»