Ezayi 57 - Cebaara Bible 2010

¹ Syɛɛnsinw i kúu, wàa faala o sɔ̀ngí wi kéeli na wi fúngi ni í. Syɛɛncanbèle i láari yaà, wàa faala si o gi kɔ́rɔw cángi í, bi cán syɛɛnsiɔn i láari yaà jàngó bi syɔɔ wɔʔɔgi ma í.

² Wi a jée yɛɛ̀nyingi ni, wee wi táanri kôzingi ni lè, wi a sínɛ ŋɔ́ndaala na wi yasinɛgi na.

Fúloli kéele yasunzun-syɛɛnfelegi na

³ «Yele si na, ye nùuni naa, dɛ̀ɛ́mi kèlē kpéʔelefɔjaa pìibēle, ní kanɔnʔɔbyecew, ní nànjaacew yòdaʔaya.

⁴ Wìí na yele yeyɛɛ nyɛ́nɛ? Wìí na yele ye nyɔ́ɔyi múru fáa, ní i yele nyíngèle yirigi? Sìnloʔomɔ piibéle ban yele nyɛ ì, ní jànvaaw yòdaʔaya ì?

⁵ Yele fúnyi n wári terebɛnti tíiyi, ní wabiriri tíiye myɛ láara ni, a yele i pìíbèle kɔnɔgi lòcooloyi nyɔ́ɔ, ní fálakɔriyi láara ni.

⁶ Lòcooloyi kàdɛnɛ-wɔlɔgɔyɔ wéle, yoro na mɔ sɔngumi nyɛ, yoro yi nyɛ mɔ lɛɛli, yoro ma mɔ sáriga-yólogow ŋuu, yoro má mɔ yakaanyi kaangi. A gee bee myɛ pyele a gbǎn mii fúngi nyíngi lé?

⁷ Nyanbenyungee gi tɔnɔ n yìri ǹjoʔo ma lè, koro na mɔ mɔ yasinɛgi taʔa. Beè mɔ wɔ́ɔ i lúru ni sárigaw wóo yaà.

⁸ Mɔ n mɔ yasunyi cɔ̀rɔ tɛɛlaraga ni, kɔ̀riyi, ní kádiribèle na, kàdoʔo ma. Níì cán àmɛɛ mɔ léeli mii na lè, mɔ i miyɛɛ waragi, ní i lúru, mɔ i kàa taari mɔ yasinɛgi kpɔ́ʔɔlɔ na, mɔ n nyɔɔfaliga kpéʔele ní bele ní, bele sínɛnɛ kéele li mɔ dɛ́nɛ lè, mɔ i pe níboribèle sámagi ni wéle.

⁹ Mɔ i tánʔani kpéʔele ni syée fànʔafɔw ma ní sìnmɛ ní, mɔ i mɔ nundaanni yárira nɛʔɛgi, mɔ i mɔ tundunbèle tórogi táleelire ma, mɔ n be kaan a be tìgi n jée fwɔɔ n sáà nan kúbèle tɛɛkòrogo na.

¹⁰ Mɔ n miyɛɛ vɔ̀rɔ mɔ kôdanʔa-nɛʔɛri báriga ni, mɔ si tée o gi nyuu si jo: ‹Ki i nyɛ nyùngo fun í!› Fànʔa sèʔé i nyɛ mɔ kɔ́gi ni, a koro gi kaan mɔ bárigaw ga kwɔ́ɔ í.

¹¹ Wìí na mɔ da ni fɛ̀ɛgí, wìí yɛ́ʔɛ fyáara ti da pye mɔ na, a koro mɔ kaan a mɔ mii jànvaa, mɔ ga níì sɔ̀ngi n taa í, mii kéeli ga níì pye mɔ fúngi ni í? Mɔ ga gi cán ncan a mii da pyèri wii nlaa yaà làridɔɔnnɔ ni ì? A koro gi kaan mɔ ga fyáa mii na í.

¹² Mii a mɔ sínni, ní mɔ kapyegèle joo bi tɛ̀ɛn, ke si a yafyɛn nyɔɔ mɔ na í.

¹³ Mɔ ga yákpoli wáa lǎli ni lè, mɔ yasunnɔnʔɔ-nɛʔɛri n yɛlɛ bi mɔ syɔɔ! Káfalaga a kári ní dee bee myɛ ní, nyɔɔ káfalaga a dee bee láa bi núngo yaà. Wee si wi ga fàn n baa làra mii láari ni lè, wee bee a tári taa kɔrigɔ, si wɔ́ɔ taa mii nyanbejǎngi fáliga na.»

Kolocɔlɔɔ syɛ́ɛnbèle pɔʔɔlɔ kéele

¹⁴ Ki a joo si jo: «Ye gi múgu, ye gi múgu, ye kologo wòlo! Ye tɛɛpeeyi myɛ yirige yaà mii syɛ́ɛnbèle kozɔ̀lɔgɔ ni!»

¹⁵ Níì cán wee wi nyɛ Pe Myɛ Nyúngo na lè, woro wee tɛɛ̀tɛ́nɛgɛ gi nyɛ lè bàngwɔɔ wóʔo, wi mɛ́ɛgi si i nyɛ wojanga ní, wi n jo: «Mii i nyɛ wodɛ́ɛɔn ní ǹjoʔo ma, tɛɛcǎngi ni, kàjáa mii wɔ́ɔ i nyɛ ní syɔ́ɔnwee ní wi kàdoʔo wáa wi kapeegèle ma lè, ní wee wi wiyɛɛ jɛ́rɛ wi pǐli ni lè, koro ga pye bi fànʔa le wee ni wi wiyɛɛ jɛ́rɛ wi pǐli ni lè, bi wɔ́ɔ fànʔa le wee fúngo ni wi kàdoʔo wáa wi kapeegèle ma lè.

¹⁶ Níì cán mii a kòro fúloli na làla o làla í, wàlá bi kòro bàngwɔɔ fundanʔagbɔɔrɔ na í, kapye koro ban í, pǐli ní céri mii sámaga lè, ti a too mii yɛ́ʔɛ ma bi kálagi.

¹⁷ Mii fúngi maa tanʔa Isirayɛli kurugo wi kanaa-sìnzinri kéele na, a mii wi kpúmɔn. Mii fundanʔaratɔw n niyɛɛ làriga. Wi si maa pye sìnloʔoo, wi maa ni syée wi tiimaa funzɔngumi kólogo ni.

¹⁸ Mii n wi kóloyi nyaa, kàjáa mii a wi pɔʔɔ. Mii a wi yɛ́ɛgi kíni, si wi kpɛʔɛlɛ saʔa woro ní bele be nyɛ kùu káyaʔa na ní wi ní lè.

¹⁹ Mii a sòololi taʔa pe nyɔɔwari na. Yɛɛ̀nyinge, yɛɛ̀nyinge í pye wee má wi léeli lè, ní wee má wi nùuni lè!» Yawe wi jo nya. «Ɛɛn mii a be pɔʔɔ.»

²⁰ Kàjáa syɛɛnpeebèle i nyɛ àmɛɛ sólomi lɔ̀ʔɔ nyɛ, gee gi tugu ni yìrigí lè, gee gi lè ki a gbǎn sínɛ sági í, gee lòyo yi yanɔnʔɔri féleye myɛ lée ni wáa lè.

²¹ «Yɛɛ̀nyinge o nyɛ syɛɛnpeebèle ma í,» mii Kolocɔlɔw wi jo nya.