Ezayi 56 - Cebaara Bible 2010

SƐBƐW TILA-TAANRI WOʔO ( 56—66 ) Wonɛnɛ-mí-yirigeo a ní pye yaà í

¹ Yawe wi syɛ́ɛnri naa joo níì jo: «Gee gi sín lè, yaa koro jàtée, yaa sínni kèlē kpéʔele. Níì cán cɛɛri ga pye syɔɔli mii kaangi lè, li a nan naa, mii sínni si liyɛɛ dɛ̀ɛn.

² Syɔ́ɔnwee wi gee bee kpéʔele lè, ní syɔɔn pya wi sámaga n yére gi ni lè, n cândɛnɛgi sámaga n cò gi sìngalagi ni, níì wi kɔ́gi cò kapeeyi féleye myɛ kpéʔelele na, wee bee i nyɛ dùba pyà!»

³ Nibɔnwee wi wiyɛɛ daʔa Yawe na lè, wee bee a kɔ́ gi joo í si jo: «Yawe a tɔ̀nɔ́ mii wàli bi láʔa wi syɛ́ɛnbèle na!» Nǎnwee be wòlo lè, wee bee a kɔ́ gi joo í si jo: «Mii i nyɛ tiiwaʔa yagana!»

⁴ Níì cán Yawe wi syɛ́ɛnri naa joo níì jo: «Nǎnbèle bele be wòlo lè, poro bele be mii cândɛnɛyi sámaga n cò lè, níì gi nyɛ́nɛ n wòlo, gee gi mii dɛ́nɛ lè, níì sámaga n yére mii joogaanni ni,

⁵ mii a be kpéʔele fɛ̀ɛ mii kpáagi ni, ní mii gúnyi ni, si mɛ́ʔɛ le be na, gee gi sɔ̀lɔ lè nànbiigéle, ní calipiigèlē taala na. Mii a bàngwɔɔ mɛ́ʔɛ le be na, gee gi lè ki a tée kwɔ́ɔ bi yiri yaà í.

⁶ Nibɔnbèle be peyɛɛ daʔa Yawe na, ni báara wi ma lè, á Yawe mɛ́ɛgi kéele be dɛ́nɛ, poro í pye wi falipyebèlē, poro bele myɛ be wi cândɛnɛgi kéele sámaga n cò lè jàngó poro a kɔ́ gi kálagi í, níì sámaga n yére mii Yawe joogaanni ni,

⁷ mii a pan ní bele bee ní mii nyanbejǎngi ma, mii a ba fundaanra kaan be ma mii nyɛ́ɛrigi kpaʔa ni. Mii a ra fɔ̀lɔ́ be sáriga-sórigow, ní be sárigaw na be wóo mii sáriga-wòlo-yafaangi na lè. Níì cán pe a ra mii kpáagi yiri Kolocɔlɔɔ nyɛ́ɛrigɛ kpaʔa, gee ki a pye lè syɛɛnfeleyi myɛ wóʔo.»

⁸ Kàfɔw Yawe, woro wee wi Isirayɛli wojarigabèle kpóʔoro lè, wi n jo: «Mii a pèle nikwɔɔlɔ kpóʔoro bi fàra mii syɛ́ɛnbèle bele na be kpóʔoro n kwɔ́ɔ lè.»

Kùndigibèle be lè pe ga yɛlɛ ní kùndigiri ní í

⁹ Sìnbirigi yaweere myɛw, yaa maa nɛɛ naa, yaa maa ye ba káa, yele kɔ́ligi yaweere myɛw!

¹⁰ Isirayɛli kpaàwelebèle myɛ i nyɛ fúunbéle, pe o yafyɛn cángi í. Pe myɛ i nyɛ pɔn-bobooyo, yee yi lè yi o gbàn ni nyàʔá í. Pe n sínɛ ni ŋúnɔ ní ŋúnɔyɔ ní. Ŋúnɔmi n be dɛ́nɛ.

¹¹ Pe i nyɛ laaweeye pɔɔnnɔ, bele be lè pe o tíngi ni nyaagi í. Bànaʔabēle bɛɛ, bele be lè pe o yafyɛn cángi í, pe myɛ i pe nyɛnɛ kóloyi lée, pe myɛ nibin nibin i peyɛɛ tɔ̀nɔw caa yagana.

¹² «Yaa maa, mii a sa dùvɛɛn caa, wo a ba singbǎnmi gbaa yɛ́ɛyi í da wóo! Wo a ní gi pye nyɛ̀ʔɛna, wonɛʔɛtelemɛ a kòro!»