Ezayi 55 - Cebaara Bible 2010

Yaa maa, àlí wáli fun ni

¹ «Ee, yele bele myɛ na lògbaʔa nyɛ lè, yaa maa lǒgi ma, àlí bele be lè wáli o nyɛ be ma í! Yaa maa ye ba syɔɔ ye lìi kawaʔa na, yaa maa ye ba dùvɛɛnw ní nɔ́nɔw syɔɔ wáli fun ni.

² Gee gi lè ki o nyɛ lìile í, nyàʔá na yele wáliw nii gee bee ni? Gee gi lè ki a syɔɔn tín í, nyàʔá na yele wɔʔɔ gi kéeli na? Koro na ye líiyi cáan ye lóʔo mii ma yáā gi líi gee gi nyɔɔ lè. Yele a ra yele nyɛ́nɛ yaliitaanri fundaanra pingi.

³ Ye líiyi cáan, yáā maa mii ma, ye lóʔo, yele pìígèle a sìi taa. Mii a bàngwɔɔ joogaanna kpéʔele ní yele ní, kacǎnyi nyɔ́ɔ mii fàli Davidi ma lè, mii a yi foro.

⁴ Wéle, mii n wi télege wi pye syɛɛnfeleyi séera, wi pye syɛ́ɛnbèle yɛɛ̀kinio, ní be kàrigafɔw.

⁵ Wéle, mɔ a syɛɛnfelegaa yeri, gee gi lè mɔ da gi cán í, syɛɛnfelegaa a ra fé ra maa mɔ ma, gee gi lè ki da mɔ cán í, Yawe kéeli na wi lè mɔ Kolocɔlɔw, Isirayɛli Wojanw, woro wee wi kpɔʔɔgbɔɔri kaangi mɔ ma lè.»

Nyɔɔfaligi gi lè ki a kòro sìnvoro ni í

⁶ Yaa Yawe caa wi làrinyaani ni, yaa wi mɛ́ɛgi yeri lǎli ni wi nyɛ lè tɔ́ɔnrɔ.

⁷ Syɛɛnpeew n yɛlɛ wi wi kólogi yaʔa, syɛɛnnaa-sìnzinw n yɛlɛ wi wi sɔ̀ngubeeri yaʔa, wi lúru Yawe ma, woro wee wi a nyinimɛ taa wi na lè, wi lúru wolo Kolocɔlɔw ma, woro wee wi kùsulugi syoo lè saʔa.

⁸ «Níì cán mii sɔ̀nguri, ní yele wóri o nyɛ sèjira í, yele kóloyi ní mii wóyi o nyɛ sèjira í,» Yawe wi jo nya.

⁹ «Kánmee na nyɛ̀ʔɛgèle léeli tári na lè, ànbée mii kóloyi léeli yele wóyi na, a mii sɔ̀nguri léeli yele wóri na kánmi bee na.

¹⁰ Amɛɛ zěgi ní lànɛɛzyiw yìrigí nyɛ̀ʔɛgèle na ni tíri lè, ti si a ní lúru kári tári sìnvɔɔn ni í, fwɔɔ di tári tɛ́nɛ, si yaliiri fìin, si yaliipyá kaan yaliiwáaw ma, bi lìile kaan lìifɔw ma,

¹¹ kánmi bee na mii syɛ́ɛnri nyɛ, dee di yirigi mii nyɔ́ɔgi ni lè, ti a lúru pan mii ma sìnbaara ni í, fwɔɔ bi taa ti mii nyɛ́nɛ kéeli kpéʔele bi foro, si di katunni kpéʔele bi nyɔɔ.

¹² Ɛɛn, yele a yiri yaà ní fundaanra ní, pe a yele lúrugo tórigo naa yɛɛ̀nyinge na. Nyanbeleyi ní dǎndamayi a ra fundaanra yákpogéle wáa yele yɛ́ʔɛ ma, sìnbirigi tíire myɛ sáā kadafori kóri.

¹³ Siipirɛ tíire a fìin wúuro tiipiire sindɛʔɛ ni, miiriti tíire a fìin wúuro tírire sindɛʔɛ ni. Gee bee a Yawe mɛ́ɛgi kpɔ́ʔɔ, gee bee a pye bàngwɔɔ fɛ̀ɛ, wee wi lè wi a kwɔ́ɔ bi nyaa í.»