Ezayi 54 - Cebaara Bible 2010

Zyerusalɛmi ga níì yaʔa í

¹ «Mɔ cenaa-sìnzeeo, mɔ wee wi lè mɔ ga pìibēle see í, da fundaanra yákpolo wáa, da fundaanra yákpolo wáa, maa muguri, mɔ wee wi lè wi ga pyà see dulunyanw ni í. Níì cán céwee be yaʔa lè, woro pìíbèle a ba nɛʔɛ bi sɔ̀lɔ wee wòolo na, wee má nàɔn nyɛ lè,» Yawe wi jo nya.

² «Ki n yɛlɛ mi mɔ fanikpaagi tɛ́ʔɛ kpɔ́ʔɔ. Mɔ fanikpaagi fàniya kpólo, mɔ a kɔ́ yi cɛ́rɛ í. Ki mɛ́ɛngèle tɔnɔ, mí gi cèferigèle sámaga mi kóri.

³ Níì cán mɔ a cariga bi kári kàliige, ní kàmɔnɔ ma. Mɔ yodaʔayi a syɛɛnfeleyi kɔ́rigɔ lìi, si kěyi nyìn, yee yi nyɛ lè wowaaya ní.

⁴ Mɔ a kɔ́ fyáa í, níì cán fɛ̀ɛrɛ a mɔ taa í, mɔ a kɔ́ mɔ nyúngi jùngu í, níì cán faʔara a tée too mɔ na í. Mɔ a fɛ̀ʔɛ mɔ cárimi làla fɛ̀ɛrɛ kèlē na, mɔ a ní tée sɔ̀ngí taa mɔ lɔguugi faʔara na í.

⁵ Níì cán mɔ Faanfɔw wi nyɛ mɔ nanbɔriw. Wi mɛ́ɛgi gi nyɛ Yawe wi lè Nyɛ̀ʔɛni Sùlasiibéle Kafɔlɔ. Isirayɛli Wojanw wi nyɛ mɔ Nyunzyɔɔw, wi mɛ́ɛgi gi nyɛ tári myɛ Kolocɔlɔɔ.

⁶ Kányɛʔɛ na, Yawe ní i mɔ yiri àmɛɛ cɔlɔɔ nyɛ, wee pe da yaʔa lè, á wi fúngi nyáʔami. A cárima cɔ́ɔ a gbǎn yaʔa lé?» Mɔ Kolocɔlɔw wi jo nya.

⁷ «Làrigbele ni mii da mɔ yaʔa, kàjáa mii a ní mɔ syɔɔ lége mii nyinigbɔɔmi kéele na.

⁸ Mii fundanʔagbɔɔri làrigbele ni, mii maa mii yɛ́ɛgi làriga mɔ na làla cɛɛri ni. Kàjáa mii a nyinimɛ taa mɔ na ní bàngwɔɔ tàmaga ní,» Yawe wi lè mɔ Nyunzyɔɔw, woro wi jo nya.

⁹ «Ki a pye mii ma àmɛɛ gi pye Nowe cányi ni lè. Mii maa kàli níì jo Nowe lònɛʔɛgi a ní tìgi bi tári tɔ́n í. Kánmi bee na mii wɔ́ɔ̀ kàli n jo mii fúngi a ní tanʔa mɔ kurugo mii í ní fúlo mɔ na í.

¹⁰ Alí nyanbeleyi ga yìri yi tɛ́ɛyi ni, àlí dǎndamayi ga ni kpírigi, mii funjǎngi gi nyɛ mɔ kabangi na lè, ki a tée cúngo í, mii yɛɛ̀nyingi joogaanna a tée kpírige í.» Yawe wi nyinimɛ taagi mɔ na lè woro wi jo nya.

Nyɛ̀ʔɛna Zyerusalɛmiw kéele

¹¹ «Mɔ wee na wɔʔɔgi nyɛ lè, a káfalakpɔɔgi mɔ kpúmɔn n cáan, kpɛʔɛlɛfɔlɔ si ga taa mɔ na í! Wéle mii a tɔ̀nɔ́ mɔ faan ní nìjanra kadɛnɛyɛ ní. Mii a mɔ kapɔɔnw le ní safiiri ní.

¹² Mii a mɔ jɛɛ́ngèle sámaga ní wurubii ní, mɔ kɔriyi a sámaga ní kirisitali ní, mɔ tow myɛ a faan bi màʔa kpàra ní lɔgbanra kadɛɛngèlē ní.

¹³ Mɔ piibèle myɛ a pye Yawe pìitamabéle, mɔ piibèle a tɔ̀nɔ́ yɛɛ̀nyingbɔʔɔ taa.

¹⁴ Mɔ a sámaga yére sínni báriga ni, bi syɔɔ fǎngi gbànna ma, níì cán mɔ a ní da fɛ̀ɛgí í, bi syɔɔ fyáakpɔɔri ma, níì cán ti a léeli mɔ na.

¹⁵ Pe ga yìri bi too mɔ na, mii má ban gee bee a yìri í. Wee wi ga baa too mɔ na lè, wee bee a too mɔ yɛ́ʔɛ ma.

¹⁶ Wéle, mii wi tunmɔgbumɔnw sámaga, wee wi kànʔana náa fee lè, wee wi kapɛɛnkpumɔn-yárira sámagi lè wi fáliw pyeganma na. Mii si wi wɔ́ɔ̀ kálagifɔw sámaga wi di tɔ́nʔɔnɔ.

¹⁷ Kapɛɛnkpumɔn-yáriri myɛ di sámagi mɔ kánmi na lè, ki kàa a yafyɛn nyɔɔ í, ní nyinnɛ o nyinnɛ li yìri kútii na ní mɔ ní lè, mɔ a joo bi li péemi jáa. Koro ki a pye Yawe falipyebèle kɔ́rigɔ, loro li nyɛ sínni, lee li yìrigí mii ma ni maa be ma lè,» Yawe wi jo nya.