Ezayi 53 - Cebaara Bible 2010

¹ Gee ki da joo wolo ma lè, wìí wi tága gi na? Ba wìí syɔ́ɔn na Yawe kɔ́gi kiyɛɛ dɛ̀ɛn?

² Wi n yìri n lɛɛ wi nyɛnɛ na, àmɛɛ tiifolovɔ́ngɔ nyɛ lè, àmɛɛ nìnge nyɛ, gee gi folo n yiri lɔ̀ʔɔ fun tára ni lè. Nìjanra da pye wi na í, wàlá darigala í, jàngó wolo a kɔ́ ra wi wéle í. Wi céri kánma da ni syɔɔn kíle wi kàbangi na í.

³ Syɛ́ɛnbèle n wi faʔa, níì wi cée n yaʔa, funnyɛnigɛ syɔ́ɔn wi pye, wee wi tàli wɔʔɔgi na lè, wi n pye àmɛɛ wàa nyɛ, wee na syɔɔn wiyɛɛ yɛ́ɛgi tɔ́ngi lè, pe maa ni wi faari, wolo da wi córo í.

⁴ Wolo wɔʔɔyi si wi da tɔ̀nɔ n taʔa wiyɛɛ na, wolo fɔ̀rɔyi wi da tugo wiyɛɛ na. Bi gi taa wolo n wi córo mɔ a jo wee na kpàliga taʔa lè. Mɔ a jo syɔɔnwaa wii, wee Kolocɔlɔɔ kpúmɔn lè níì wi cɛ́rɛ.

⁵ Kàjáa wolo kapeeyi kéele na pe da wi súu n fùru, pe maa wi tɔ́nʔɔnɔ wolo kolomi kéele na. Wɔʔɔgee gi yɛɛ̀nyinge kaangi wolo ma lè, koro n too wi na. Wolo n pɔʔɔ wi kpumɔnnamiyi báriga ni.

⁶ Wo myɛ maa pùuni àmɛɛ bàala nyɛ lè, wo myɛ nibin nibin maa ni wo nyɛ́nɛ kóloyi lée, a Yawe si wo myɛ sìnzinmɛ túgoro tugo wi na.

⁷ Pe maa wi wɔʔɔ gbanʔama, níì wi fɔ̀rɔ, wi si ga wi nyɔ́ɔgi múgu í. Wi n pye àmɛɛ bàpile nyɛ, lee be cò ni syée kaàkpoo-tɛ́ʔɛ ma lè, níì pye àmɛɛ byà nyɛ, wee wi kòro lè pyèrio wi síicɛnɛbèle kɔ́yɔ ni. Wi ga wi nyɔ́ɔgi múgu í.

⁸ Pe n wi kɔ́ri fànʔa na n sáà kútii. Wìí syɔ́ɔn na wi kéeli da wári wi yìrili syɛ̀ɛnnɛ ni? Ncan pe n wi sìíw ceri n yirige niweebèle tára ni. Pe n wi kpúmɔn kùumɔ wi syɛ́ɛnbèle kapeegéle kéele na.

⁹ Pe n wi nyángi sámaga syɛɛnpeebèle nínge ni, wi woguuw n pínɛ n pye ní lɔrɔfɔbèle ní, àlí n gi yaʔa wi ga tanʔara kéelaa faala pye í, jànvaa da wɔ́ɔ̀ yiri wi nyɔ́ɔgi ní í.

¹⁰ Ki n Yawe dɛ́nɛ a wi wi tɔ́nʔɔnɔ ní wɔʔɔgi ní. Wi n wiyɛɛ sìíw kaan kapeegèle kùsulugo sáriga. Wi a wiyɛɛ yòdaʔayi nyaa, si wiyɛɛ sìíw canya nɛʔɛ, wi a ra Yawe kínidɛnɛgi forogi.

¹¹ Wi fúngi wɔʔɔgɔ kadoʔo ma, gee wi a nyaa lè koro a wi yɛlɛ. Mii falipyew wi sín lè, wi a syɛɛnnɛʔɛmɛ kpéʔele syɛɛnsinbéle, wi cánni báriga ni pe a taa lè, si wi nyúngi le be kolomi kèlē láara ni.

¹² Koro na mii a wi lɛɛli pínɛ kaan wi ma ní wogbolobèle ní. wi a yakoliri lɛɛ ní séew fɔ̀ɔlɔ ní, níì cán wi tiimaw n wiyɛɛ gaan n kùu, a be wi córo kakolobyebèle nínge ni, ní àmɛɛ wi syɛɛnnɛʔɛmɛ kapeegéle túgoro tugo, níì nyɛ́ɛri kakolobyebèle kéele na lè.