Ezayi 52 - Cebaara Bible 2010

Yìri ŋúnɔmi na Zyerusalɛmi

¹ Yìri ŋúnɔmi na! Yìri ŋúnɔmi na! Mɔ fangi le burogo, Siyɔn! Kècǎngi Zyerusalɛmi, mɔ burojǎnyi le! Níì cán sìngɛ́nɛɔ wàlá syɛɛnnɔnʔɔɔ a ní jée mɔ ni í.

² Mɔ cíbigi kóri mi láʔa, mí ní yìri mi tɛ́ɛn Zyerusalɛmi! Púlow, Siyɔn calipili, yapwɔɔri sánʔana mi yirige mɔ yátiigi ni!

³ Níì cán Yawe wi syɛ́ɛnri naa joo níì jo: «Kawaʔa na pe da yele pára, yele nyùnzyɔɔri si a wɔ́ɔ kpéʔele wáli fun ni.»

⁴ A Kàfɔw Yawe níì jo: «Mii syɛ́ɛnbèle maa kári gbɛnʔɛnɛ Ezyipiti ma bi sa tɛ́ɛn yaà beè, koro kàdoʔo ma a Asirii ye be wɔʔɔ nyúngo fun.»

⁵ Yawe n jo: «Nyàʔá si mii a pye tɔ́ɔliw ni, àmɛɛ pe da mii syɛ́ɛnbèle cò n kári lè kawaʔa na? Pe jáafɔbèle i fàndaara yákpogéle wáa, mii mɛ́ɛgi si i faari canʔa o canʔa,» Yawe wi jo nya.

⁶ «Gee bee na mii syɛ́ɛnbèle a mii mɛ́ɛgi cán. Gee bee na pe a gi cán cángi bee na bi cán mii wi gi nyuu níì jo: Mii wi wee.»

⁷ Tundunw wi maa ní syɛɛnjóocǎnri ní lè, wee wi yɛɛ̀nyingi syɛ́ɛnrɛ jáari lè, tundunw wi syɛɛnjóocànra nyuu lè, woro wee wi syɔɔli kéele jáari lè, ní i gi nyuu Siyɔn ma níì jo: «Mɔ Kolocɔlɔw i nyɛ fǎngi na,» wi nyɔ̌ndanʔani n nyɔɔ nyanbeleyi ǹjoʔo ni.

⁸ Mɔ kɔrɔsiifɔbèle joomɔ bii! Pe i nyuu gbanʔama, pe n pínɛ ni fundaanra yákpogéle wáa. Níì cán pe n Yawe nyaa ní be tiimaa nyapiigèle ní, a wi lúru ni maa Siyɔn ma.

⁹ Zyerusalɛmi gurubɛɛri, ye pínɛ yaa fàndaara yákpogéle wáa! Níì cán Yawe i wi syɛ́ɛnbèle kpɛʔɛlɛ, wi i Zyerusalɛmi nyúngi syoo.

¹⁰ Yawe n wi cǎnmi kɔ́lɔ múgu syɛɛnfeleyi myɛ nyɛ́nɛ na, tári láʔagéle myɛ wòolo si a syɔɔli nyaa, lee wolo Kolocɔlɔw kaangi lè.

Ye yiri Babilɔni ni

¹¹ Ye kári, ye kári, ye yiri yaà beè! Yele a kɔ́ tánga yanɔnʔɔgɔ faala na í! Ye yiri gi níngi ni! Ye yeyɛɛ jée ye mùnu, yele bele ye Yawe yacanri tugu lè.

¹² Yele a kɔ́ yiri yaà funvuugo na í, yele a kɔ́ kári kàfyaala na í. Níì cán Yawe i syée yele yɛ́ɛgi na, Isirayɛli Kolocɔlɔw a ra táanri yele kàdoʔo ma.

Yawe falipyew kéele (Ŋúnu-sicɛrɛ wógi)

¹³ Mii falipyew wi wee, wi a báriga. Wi a yìri ǹjoʔo ma, wi a lúgu si kpɔ́ʔɔ gbanʔama.

¹⁴ Kánmi bee na wi nyaani maa tɔ̀nɔ n fyáakpɔɔrɔ wáa syɛɛnnɛʔɛmɛ na, a wi céri kánma fàli, ti da pye àmɛɛ syɔɔn wóro nyɛ lè í, wi kánmi da pye àmɛɛ syɔɔn ye wómi nyɛ lè í.

¹⁵ Amɛɛ gi nyɛ lè wi a syɛɛnfele-nɛʔɛyɛ jéemununɔ kpéʔele lè, fànʔafɔɔlɔ saʔa a kòro ní be nyɔ́ɔyi ní wodɔnyɔ ní wi yɛʔɛ̀ ma. Níì cán gee gi nyɛ lè ki da kɔ́ɔ̀ joo be ma í, pe a gee bee nyaa, gee gi lè pe da kɔ́ɔ̀ gi lóʔo í, pe a gi kɔ́rɔw cán.