Ezayi 51 - Cebaara Bible 2010

Kwɔ́ɔmɔ fun syɔɔli kéele

¹ «Yele bele ye yeyɛɛ daʔa sínni na lè, ní i Yawe caa, ye lóʔo mii ma! Yaa wéle fálagi ma gee ni yele tan n yirige lè, wéegee fúngo ni pe yele yirige lè, yaa wéle koro ma.

² Ye yele tóow Abirahami wéle, ní Sara, wee wi yele see lè. Níì cán wi maa pye wi nibin lǎli ni mii wi yeri lè, níì dùbaw kpéʔele wi ma, níì wi yòdaʔayi nɛʔɛ.»

³ Yawe i nyinimɛ taagi Siyɔn na kányɛʔɛ na, wi tɛɛ̀kalagiyi myɛ nyínimɛ i nyɛ wi na. Wi a wi fìími tára kàriga àmɛɛ Edɛn nángwɔɔw nyɛ lè, bi lɔ̀ʔɔ fun tɛ́ɛyi pye àmɛɛ Yawe nángwɔɔw nyɛ lè. Mugurumi, ní fundaanri a pye wi níngi ni, n fàra bariga kaanni ŋúnuyo, ní kpɔ̀ʔɔrɔli ŋúnuyo na.

⁴ «Mii syɛ́ɛnbèle, ye lóʔo mii ma! Mii syɛɛnfelegi, ye líiyi cáan mii ma! Níì cán mii má làlwaw a yìri, mii a mii kútiisinw yaʔa wi pye syɛɛnfeleyi gbɛ̀ɛnmɛ.

⁵ Mii sínni n nùuni, syɔɔli mii kaangi lè, li a liyɛɛ dɛ̀ɛn, mii kɔ́yi si kútiiw kúun syɛɛnfeleyi na. Lǒgi nínge tátɛɛgéle woolo a be sɔ̀ngumi taʔa mii na, pe a peyɛɛ yaʔa mii kɔ́yi ni.

⁶ Ye nyapiigèle yìrige yaa nyɛ̀ʔɛni wéle, yé ní wéle táàma tári na! Níì cán nyɛ̀ʔɛni a cariga bi kwɔ́ɔ àmɛɛ wírige nyɛ lè, tári si yɛ́rɛ àmɛɛ burogo nyɛ lè, di tɛ́ɛnfɔbèle si kùu àmɛɛ sísyɔɔnrɔ nyɛ lè. Kàjáa syɔɔli mii kaangi lè, li a kòro beè bàngwɔɔ, mii sínni a tée kwɔ́ɔ í.

⁷ Ye lóʔo mii ma, yele bele ye sínni cán lè, syɛ́ɛnbèle, yele bele fúnyo ni mii làlwaw nyɛ lè! Yele a kɔ́ ra fɛ̀ɛgí syɛ́ɛnbèle faʔara na í, yele a kɔ́ ra cɛ̀lɛ́ be tɛʔɛlɛyi na í.

⁸ Níì cán káfyaanw a ba be kálagi bi kwɔ́ɔ àmɛɛ burogo nyɛ lè, dɔ́nw a be lìi àmɛɛ bàsiire nyɛ lè. Kàjáa mii sínni a pye bàngwɔɔ wólo, syɔɔli mii kaangi lè, li a kòro beè yìrigèle myɛ syɛ̀ɛnnɛ ma.»

Yìri ŋúnɔmi na Yawe

⁹ Yìri ŋúnɔmi na, yìri ŋúnɔmi na! Fǎngi le burogo, Yawe kɔ́gi! Yìri ŋúnɔmi na, àmɛɛ ki da pye lè booma cányi ni, yìrigèle gele syɛ̀ɛnnɛ lala ni be sɔ̀lɔ lè! Mɔ ban wi Arahabi kpúmɔn n cáan, níì Diragɔnw súu n fùru ì?

¹⁰ Mɔ ban wi sólomi lɔ̀ʔɔ waʔa ì, ki lè weekpɔɔ-cùrugi lɔ̀ʔɔ, níì kologo wòlo sólomi lɔ̀ʔɔ tɛɛcùruyo ni, jàngó bele nyùnzyɔɔrɔ di kpéʔele lè, poro í gbǎn sɔ̀lɔ ì?

¹¹ Kánmi bee na bele Yawe syɔɔ lè, pe a lúru pan, pe a ra ŋúu bàā maa ní fundaanra ní bi ba nan Siyɔn na, bàngwɔɔ fundaanra a pye àmɛɛ fànʔafɔ-nyùndɔnnɔ nyɛ lè pe nyúnyi ni. Mugurumi ní fundaanri a pye be ma, fúnyi wɔʔɔgɔ, ní cɛ́ɛnmi a fàn bi kári.

Mii syɛ́ɛnbèle, nyàʔá na yele a ra fɛ̀ɛgí?

¹² Mii si na, mii wi nyɛ mɔ kpɛʔɛlɛfɔw. Wìí wi nyɛ mɔ, á mɔ si i fɛ̀ɛgí syɔɔn na wi nyɛ lè yakuugo, syɔɔn pya na, wee kwɔ́ɔganma bi nyɛ àmɛɛ nyàā nyɛ lè?

¹³ A mɔ si fɛ̀ʔɛ Yawe na woro wee wi mɔ sámaga lè, woro wee wi nyɛ̀ʔɛgèle càli ǹjogi ni lè, níì tári kàpɔɔn le! Mɔ si ga láʔa cɛ̀lɛli na syɛɛnwɔʔɔw fundanʔagbɔɔrɔ yɛ́ʔɛ ma í, àmɛɛ wi wiyɛɛ zámagi bi gàlagí kpéʔele lè! Koro na sán si syɛɛnwɔʔɔw fundanʔagbɔɔrɔ nyɛ tɔ́ɔliw ni?

¹⁴ Wee be pwɔɔ n le kàso ni lè, cɛɛri na pe a wi yaʔa wi pye wiyɛɛ ma. Wi a kùu yaà wéegi ni í, wi lìíli a tée wi kólogo í.

¹⁵ Mii wi nyɛ Yawe, mɔ Kolocɔlɔw, wee wi sólomi lɔ̀ʔɔ yìrigí lè, ní i gi kùnguruyi fúugu, mii mɛ́ɛgi gi nyɛ Yawe wi lè Nyɛ̀ʔɛni Sùlasiibéle Kafɔlɔ.

¹⁶ Mii n mii syɛ́ɛnri le mɔ nyɔ́ɔgi ni, níì mii kɔ́gi nyínmɛ tɛ́ʔɛ n mɔ tɔ́n, níì nyɛ̀ʔɛni càli ǹjogi ni, níì tári kapɔɔn le, níì Siyɔn pye: «Yele i nyɛ mii syɛ̀ɛnnɛ!»

Ní mi nìrimɛ le Zyerusalɛmi

¹⁷ Yìri ŋúnɔmi na, yìri ŋúnɔmi na! Yìri mi yére, Zyerusalɛmi, mɔ wee wi Yawe fundanʔagbɔɔri yagbaʔa syɔɔ wi kɔ́gi ni n gbaa lè, mɔ wee wi gbaa lè, mɔ wee wi yɛɛwɔɔw yagbaʔa gbaa n kwɔ́ɔ lè!

¹⁸ Nànbiigèle myɛ wi see lè, li làa faala o yaà bi wi yɛ́ɛgi kíni í. Nànbiigèle myɛ wi gbóo lè, làa faala o yaà bi wi cò kɔ́gi na í.

¹⁹ Wɔʔɔyi naa tɛɛyɛ siin n too mɔ na, wìí wi a gi yáa ní mɔ ní? Yoro yi nyɛ kolili ní kálagili, ní ŋɔséew ní kateegi? Mɛ̀ɛ́ si mii a gbǎn mɔ kpɛʔɛlɛ bi sɛ́ɛ?

²⁰ Mɔ jáabèle n too ni kirigi kalari-koloyi jɛ̀ɛ́ngéle myɛ na àmɛɛ kafáaɔ cò cɔ̀ɔ ni lè, koro n pye Yawe fundanʔagbɔɔri báriga ni, mɔ Kolocɔlɔw joogbanna báriga ni.

²¹ Koro na ki n yɛlɛ mi gee naa lóʔo wɔʔɔgɔfɔlɔ, mɔ yɛ́ɛgi i wóo, dùvɛɛn kéele si ban í.

²² Mɔ Kafɔw Yawe, wi lè mɔ Kolocɔlɔw, woro wee wi wi syɛ́ɛnbèle tánʔa nyuu lè, woro wi syɛ́ɛnri naa joo níì jo: «Yagbaali li nyɛ mɔ kɔ́gi ni lè, li fúngi yagbaʔa si i syɔɔn yɛ́ɛgi wóo lè, wéle, mii a li syɔɔ mɔ ma, mɔ a ní gbaa mii fundanʔagbɔɔri yagbaala ni í!

²³ Mii a li le bele kɔ́yɔ ni pe da ni mɔ wɔʔɔ lè, poro bele pe da ni gi nyuu mɔ ma lè níì jo: ‹Sínɛ mi fàbiga, wolo si sɔ̀lɔ!› Mɔ maa mɔ kadogi pye lǎli bee ni àmɛɛ tára nyɛ, ní àmɛɛ kàlari-kólogo nyɛ bele má be sɔ̀lɔ́ gi ni lè.»