Ezayi 50 - Cebaara Bible 2010

Yaʔala o nyɛ Kolocɔlɔɔ ní wi syɛ́ɛnbèle nínge ni í

¹ Yawe n syɛ́ɛnri naa joo níì jo: «Sán ceyaʔa-sɛ́bɛw nyɛ, wee mii tɛ́ʔɛ n yele nɔ́ɔw yaʔa lè? Wàlá mii fwɔɔlɔfɔwìí má mii yele pára? Ye wéle, yele n pára yele kolomi kéele na. Yele sìnzinmi kéele na yele nɔ́ɔw yaʔa.

² Mii pan lè, nyàʔá na mii ga baa syɔɔn faala nyaa í? Mii yeri lè, nyàʔá na syɔɔn faala ga syɔɔ í? A mii kɔ́gi kpere lé wii n sɔ̀lɔ syɔɔn syɔɔlɔ na? Fànʔa o nyɛ mii ma bi gbǎn syɔɔn syɔɔ wii ì? Mii i mii fúloli téeri ni sólomi lɔ̀ʔɔ waari, mii i cábiyi kàragí fìimɛ tára. Yi fábèle i fɔ́ɔnri lǒgi fɔ̀ngɔ kéele na, pe i kúu lògbaalaagi kéele na.

³ Mii i yébilimi nii nyɛ̀ʔɛgèle na burogo, mii i gɔ̀nvaʔaga kpéʔele ke yatɔngi.»

Yawe falipyew kéele (Ŋúnudaanri wógi)

⁴ Kàfɔw Yawe n pìitamaɔ jooganma kaan mii ma, koro ga pye mii syɛ́ɛnri í gbǎn ra fànʔa kaangi syɛɛnfɔrɔgwɔɔɔ ma. Wi i mii yìrigí nyɛ̀ʔɛ nyɔ́ɔ o nyɛ̀ʔɛ nyɔ́ɔ na, wi i mii líiweeli yìrigí, koro ga pye mii í da lúro àmɛɛ pìitamabèle lúro lè.

⁵ Kàfɔw Yawe n mii líiweeli múgu, mii si ga cée í, mii ga lúru kàdoʔo ma í.

⁶ Mii n mii kàdogi kaan bele ma pe da ni mii kpúmɔn lè, n mii bɛ̀ɛ́nyi kaan bele má pe da ni mii bàʔajɔɔw kɔ́nɔgi lè. Bele pe da ni mii faari ní i tɛ́ɛri wáa mii na lè, mii ga cée mii yɛ́ɛgi na be ma í.

⁷ Kàfɔw Yawe i mii dɛ̀ɛmɛ́, koro na faʔari o jǐn mii ni í, koro na mii mii yɛ́ɛgi waʔa àmɛɛ fálaga nyɛ lè, mii n gi cán fɛ̀ɛrɛ a mii taa í.

⁸ Wee wi tànʔa kaangi mii ma lè wi i nyɛ mii taana, wìí wi caa bi mii kútii? Wo cáan wo yiri woyɛɛ ma. Wìí wi túngu ní mii kányɛɛgi ní? Waa maa naa mii ma!

⁹ Kàfɔw Yawe tɔ̀nɔ́ i mii dɛ̀ɛmɛ́, wìí wi a kálagili kútii kúun mii na? Wéle, pe myɛ a ba yɛ́rɛ àmɛɛ burogo nyɛ lè, fyɛ́ɛnri a be káa bi kwɔ́ɔ.

Ye bo waa lúro Yawe falipyew ma

¹⁰ Wìí syɔ́ɔn wi fɛ̀ɛgí yele ni Yawe na, ní i lúro wi falipyew ma? Wee wi táanri yébilimi ni lè, gbɛ̀ɛnmɛ si o nyɛ wi ma í, ki n yɛlɛ wi wiyɛɛ daʔa Yawe mɛ́ɛgi na, wi wiyɛɛ zígi wi Kolocɔlɔw na.

¹¹ Yele bele myɛ si ye naà le lè, níì yeyɛɛ màʔa ní naagbanga ŋáaya ní lè, yaa syée yele náagi ni, ní fúruw ni, ní yele naagbanga ŋáayi nínge ni yele le lè. Mii kɔ́gi gi gee bee taʔa yele na. Wɔʔɔgi ni yele a tìgí sínɛ.